Read Baibul, Mizo 2 Chronicles 18 Bible Online

2 Chronicles 18 - Baibul, Mizo bible

2 Chronicles 18

¹Tichuan Jehosaphata chu a lo hausain a lo ropui ta hle mai a; tin, Ahaba nena inkungkaihna a siam a.

²Tin, kum eng emaw zat lai hnu chuan Samari-ah Ahaba hnenah a zuk kal a. Tin, Ahaba chuan amah leh a hote chu beram leh bawngpate tam tak a lo talh a, Ramoth-gilead khuaa han chhohpuiah a sawm a.

³Tin, Israel lal Ahaba chuan Juda lal Jehosaphata hnenah chuan, "Ramoth-gilead khuaah kan han chho dun dawn lawm ni," a ti a. Tin, ani chuan a chhang a, "Kei leh nang, ka mite leh i mite chu pumkhat kan ni alawm, ral chu kan beiza ang chu," a ti a.

⁴Tin, Jehosaphata chuan Israel lal hnenah chuan, "LALPA thu ngaichang rih phawt la maw le," a ti a.

⁵Chutichuan Israel lal chuan, zawlneiho mi zali a ko khawm a, an hnehah, "Ramoth-gilead khua bei turin kan han thawk ang nge thawk lo ang?" a ti a. Tin, anni chuan, "Han thawk rawh khai, Pathianin lal kutah a pe dawn a ni," an ti a.

⁶Nimahsela Jehosaphata chuan, LALPA zawlnei tu emaw kan han rawn tur an awm lawm ni aw?" a ti a.

⁷Tin, Israel lal chuan Jehosapahta hnenah, "LALPA min rawnsak tur mi pakhat chu a la awm kha maw; nimahsela ani chu zawng ka huatzawng tak a ni; ka chungchang thu hi a chhe lam ngawt lo a tha lam reng reng a sawi ngai si lo a; chu mi chu Imla fapa Mikaia a ni," a ti a. Tin, Jehosaphata chuan, "Lal chuan chutiang chuan ti teh suh se a," a ti a.

⁸Tichuan Israel lal chuan hotu pakhat a han ko a, "Imla fapa Mikaia han hruai thuai teh," a ti a.

⁹Tin, Israel lal leh Juda lal chu Samari kulh kawngka luhna bul hmun thawl laiah an lal puana inthuamin an lalthutthleng ve veah an thu a; tin, zawlnei zawng zawng chuan an hmaah thu an sawi a.

¹⁰Tin, Kenaana fapa Zedekian thir kite a siam a, "LALPA'n heti hian a ti, 'Hengte hian Suria-hote chu boral der khawpin i si ang,' tiin, " a ti a.

¹¹Tin, chutiang bawkin zawlnei dangte pawh chuan, "Ramoth-gilead-ah chuan han cho la, han hmuingil rawh khai; LALPA'n lal kutah hian a pe dawn a ni," tiin an sawi a.

¹²Tin, Mikaia ko tura an tirha chuan, "Ngai teh khai, zawlneite chuan thukhat vuain a tha lamin lal hnenah thu an sawi theuh a; chuvangin nang pawhin an sawi tak angin a tha lamin han sawi ve teh khai," tiin a sawi a.

¹³Tin, Miakai chuan, "LALPA nunna chhalin ka sawi e, ka Pathianina sawi ang chiahin a ni ka sawi dawn ni," a lo ti a.

¹⁴Tin, lal hnen a han thlen chuan lalin a hnenah, "Mikai, Ramoth-gilead khua bei turin kan han thawk ang nge thawk lo ang?" a ti a. Tin, ani chuan, "Han thawk ula, han hmuingil rawh u, i kutah pek a ni dawn a ni," a ti a.

¹⁵Tin, lal chuan a hnenah, "Thu tak ngawt lo chu ka hnenah LALPA hminga sawi lo turin vawi engzat nge maw chhia ka chhamtir dawn che le?" a ti a.

¹⁶Tin, a ni chuan, "beram vengtu nei lo angin Israel-ho zawng zawngte chu tlangahte darh vekin ka hmu a; tin, LALPA'n, 'Hengho hian hotu an nei ta lo a, mahni in lamah thlamuang takin haw dial mai rawh se,' a ti a ni," a ti a.

¹⁷Tin, Israel lal chuan Jehosaphata hnenah, "Ka chungchang thu hi a chhe lam ngawt lo chu a tha lam reng reng zawng a sawi hlei lo ang e tih ka hrilh che ani lawm ni kha?" a ti a.

¹⁸Tin, Mikaia chuan, "Khai le, LALPA thu ngaithla teh u, LALPA chu a lal thutthlenga thua van mipuiho zawng zawng a ding lam leh a vei lama dingin ka hmu a.

¹⁹Tin, LALPA chuan, 'Israel lal Ahaba hi Ramoth-gilead a han chho a, han thi turin tuin nge thlem dawn?' a tih hun chuan pakhatin, 'Chu tin, khatin, a ti a, mi dangin, Chutiang khatiang chuan, ' a ti a.

²⁰Tin, thlarau pakhat a lo chhuak a, LALPA hmaah a ding a, 'Keimahin ka thlem ang e,' a ti a. Tin, LALPA'n a hnenah, 'Engtin maw?" a ti a.

²¹Tin, ani chuan, 'Ka va kal ang a, a zawlneite zawng zawng kaaah chuan thlarau dawtheiah ka va chhang ang,' a ti a. Tin, ani chuan, 'I va thlem ngei ang a, hlawh pawh i hlawhtling bawk ang, va kal ta la, chutiang chuan va ti rawh le,' a ti a.

²²Chutichuan ngai teh, LALPA chuan he'ng i zawlneite kaah hian thlarau dawthei a dah a; i chungchang thu LALPA'n a tha lo lamin a sawi ta a ni," a ti a.

²³Chu veleh chuan Kenaana fapa Zedekia chuan a va hnai a, Mikaia biangah a va beng a, "I hnenah thu sawi turin LALPA thlarau chuan khawi lamah nge mi chhuahsan?" a ti a.

²⁴Tin, Mikaia chuan, "Ngai teh, pindan chhungrila biru tura i luh niin i la hria ang," a ti a.

²⁵Chutichuan Israel lal chuan, "Mikaia hi hruai u la, khaw awptu Amona leh lal fapa Joasa hnenah kalpui leh rawh u;

²⁶tin, 'Lalin heti hian a ti, He mi hi lung inah khung u la, thlamuang taka ka lo haw leh hma loh chuan hreawm chaw leh hreawm tui lo pe rawh u, a ti,' ti ang che u," a ti a.

²⁷tin, Mikaia chuan, "Thlamuang taka i lo haw leh chuan kei mi hmangin LALPA'n thu a sawi lo a ni ang le," a ti a. Tin, amah vekin, "Nangin mipui zawng zawng pawhin lo hre rawh u," a ti a.

²⁸Tin, Israel lal leh Juda lal Jehosaphata chu Ramoth-gilead khuaah chuan an han chho a.

²⁹Tin, Israel lal chuan Jehosaphata hnenah chuan, "Ka inbawl danglam ang a, inbeihnaah chuan ka kal ve ang a; nang erawh chu i lal puan inbel rawh," a ti a. Chutichuan Israel chu a inbawl danglam a, inbeihnaah chuan an han kal a.

³⁰Tin, Suria lal chuan a tawlailirte chunga hotute hnenah chuan, "Israel lal ngawt lo chu mi te pawh mi lian pawh bei suh ang che u," tiin ahtu a pe a.

³¹Tin, heti hi a ni a, tawlailir chunga hotute chuan Jehosaphata an han hmuh chuan, "Israel lal anih saw maw," an ti a. Tichuan bei tumin an hual ta a; nimahsela Jehosaphata chu a au a, tin, LALPA'n a pui ta a, tichuan Pathianin a tihkirsak ta a.

³²Tin, heti hi a ni a, tawlailir chunga hotuten Israel lal a ni lo tih an hriat chuan um loin an kirsan leh ta a.

³³Tin, mi pakhat hian tum bik nei lem loin a thlangul ahan kuai a, Israel lal chu a awmphaw inkarah akap a; tichuan tawlailir khaltu hnenah chuan, "Khalh let la mipui zing ata hi mi chhuahpui rawh khai, hliam na tak ka tawk a ni," a ti a.Tin, chu mi ni chuan inbeihna chu a nasa hle mai a; tin, Israel lal chu Suria-hote lam hawiin a tawlailirah tlai lam thlengin a ding a; tin, ni tlak dawn velah a thi ta a.

³⁴Tin, chu mi ni chuan inbeihna chu a nasa hle mai a; tin, Israel lal chu Suria-hote lam hawiin a tawlailirah tlai lam thlengin a ding a; tin, ni tlak dawn velah a thi ta a.