Read Baibul, Mizo 2 Chronicles 21 Bible Online

2 Chronicles 21 - Baibul, Mizo bible

2 Chronicles 21

¹Tin, Jehosaphata chu a pi leh pute hnenah a muhil a, a pute zinga a pu Davida khawpuiah an phum a; tin, a fapa Jehorama a aiah a lal ta a.

²Tin, ani chuan unau, Jehosaphata fapate a nei hlawm a, Azaria te, Jehiela te, Zekaria te, Azaria te, Mikaela te, Sephatia te an ni. Heng zawng zawng hi Israel lal Jehosaphata fapate vek an ni.

³Tin, an pa chuan thil ropui tak tak a pe a, tangkarua te, rangkachak te, thil hlu tak tak te, Judai rama kulh nei khuate nen: nimasela ram chu Jehorama hnenah fa u ber a nih avangin a pe a.

⁴Chutichuan Jehoraman a pa ram a han luah chuan a lo intichak ta a, a unaute zawng zawng chu Israelte zinga puipa tam takte nen khandaihin a tihlum vek a.

⁵Jehorama chu kum sawmthum leh kum hnih a nihin a lal tan a; Jerusalem-ah kum riat a lal a.

⁶Ahaba chhungte tih angin Israel lalte kawng chu a zawm ve a: Ahaba fanu nupuiah a nei a ni: tichuan LALPA mithmuhah thil tha lo tak a ti thin a.

⁷Nimahsela LALPA'n Davida chhungkua chu a tiboral duh lo a, Davida hnena thuthlung avang leh amah leh a thlahte chena khawnvar neihtir reng a lo tiam tawh avangin.

⁸Ama chanah chuan Edom-ho chu Judate laka an hel a, lal an insiam chawp a.

⁹TichuanJehorama chu a sipai hotute leh a tawlailir zawng zawngte nen a va thawk chhuak a, zanah a va thawk a, anmahni leh tawlailir chunga hotute hualtu Edom-hote chu a va bei a.

¹⁰Chutichuan Edom-hote chu tun thlengin Judate lakah an la hel ta reng a ni; tin, LALPA, an pi leh pute Pathian chu a hawisan avangin, chu mi lai bawk chuan Libna khua pawh a lakah an hel ve a.

¹¹Tin, Judai ram tlangahte hmun sang a siam a, Jerusalem mite chu a uiretir a, Judate chu a hruai bo a.

¹²Tin, zawlnei Elija atangin a hnenah lehkha a lo thleng a, "LALPA, i pu Davida Pathian chuan heti hian a ti, ' I pa Jehosaphata kawngte i zawh lo a, Judate lal Asa kawngte pawh zawh bawk hek lo a,

¹³Israel lalte kawng i zawh zawk a, Judate leh Jerusalem-a awmte Ahaba chhungte anga i uiretir a, i unau, i pa chhungte i aia tha zawk i thah bawk avangin,

¹⁴ngai teh, LALPA'n i mi te, i fa te, i nupuite i rante hripuiin a hrem ang a;

¹⁵tin, nangin ril natna nasa tak i nei ang a, ni tin, chu natna avanga i ril chu a tlak a tlak a, a tlak zawh vek thlengin," tiin.

¹⁶Chutichuan Ethiopia mite kiang vela mi Philistia-ho leh Arabia-ho rilru chu Jehorama bei turin LALPA'n a chawk tho va:

¹⁷tichuan Judate chu an han bei a, an ramah an lut a, lal ina thil zawng zawng chu an la vek a, a fapate, a nupuite pawh; chutichuan a fapa naupang ber Jehoahaza chauh lo chu a fa pawh an hnutchiahsak lo.

¹⁸Tin, chu mi hnuah chuan LALPA'n tihdam theih loh ril natnain a hrem a.

¹⁹Tin, heti hi a ni a, a kum hnihna a lo vei hnuin a natna avang chuan a ril chu a tla ta a, a natna rapthlak takin a lo thi ta a. A mite chuan a pa meipui an chhehsak ang khan an chhehsak ve lo.A lal tirhin kum sawmthum leh kum hnih a ni a, Jerusalem-ah kum riat a lal a; tuma ui hlawh loin a thi a, Davida khawpuiah an phum a, lalho thlanah erawh chuan a ni lo.

²⁰A lal tirhin kum sawmthum leh kum hnih a ni a, Jerusalem-ah kum riat a lal a; tuma ui hlawh loin a thi a, Davida khawpuiah an phum a, lalho thlanah erawh chuan a ni lo.