Read Baibul, Mizo 2 Chronicles 26 Bible Online

2 Chronicles 26 - Baibul, Mizo bible

2 Chronicles 26

¹Tin, Juda mi zawng zawng chuan kum sawm leh kum ruk mi Uzia chu an hruai a, a pa Amazia aiah lalah an siam ta a.

²Ani chuan lal chu a pi leh pute hnenah a muthilh hnuah Elot khua chu a siam tha a. Judai ramah a telh leh a.

³Uzia chu a lal tantirhin kum sawm leh kum ruk mi a ni a, Jerusalem-ah kum sawmnga leh kum hnih a lal a, a nu hming chu Jekoiliai, Jerusalem mi a ni a.

⁴Tin, a pa Amazia thiltih ang apiang ti vein LALPA mithmuha thil tha tak a ti thin a.

⁵Pathian inlarna hrethiam Zekaria dam chhung chuan Pathian zawng turin a insiam tlat a: Pathian a zawn chhung zawng chuan Pathianin a tihmuingil zel a.

⁶Philistia-ho run turin a thawk chuak a, Gat kulh te, Jabne kulh te, Asdod kulh te a tichim a; tin, Asdod ramah leh Philistia-ho zingahte khua a siam a.

⁷Tin, Pathian Philistia hote lakah leh Gur-baal-a awm Arabia-ho leh Meun-ho lakahte a tanpui a.

⁸Tin, Amon-hote chuan Uzia lakah chhiah an chawi thin a; tichuan a lo chak tak ema vangin Aigupta ram thlengin a hming a thang ta a.

⁹Tin, Uzia chuan Jerusalem-ah Kil kawngkaah te, Ruam Kawngkaah te, kulh kawina lai kawngkaah te in sang a sa bawk a, kulhin a hung a.

¹⁰Tin, thlalerah pawh in sang a sa a, ran tam tak a neih avangin tui te a lai chhuak thluah mai a, phai lam leh phai zawlahte pawh; tin, lo nei mite leh uain sawr mite tlang lamah leh ram thaahte chuan a nei a, thlawhhma lam ngaina mi tak a ni.

¹¹Tin, Uzia chuan sipai indo mi, lal sipai hotu Hanania hnuaia mi, lehkha ziaktu Jeiela leh hotu Maaseia ten an ruat ang zela a pawl pawla ralkap mi a nei bawk a.

¹²Mi chak huaisen thiau, an chhungkaw puipa zawng zawng chu 26,000 an ni a.

¹³Tin, an hnuaia chuan sipai zir thiam sa thiau 307500 hmelma laka lal tanpuitu ral bei mi tak tak an awm a.

¹⁴Tin, Uzia chuan sipai zawng zawng tan phaw te, fei te, thir lukhum te, thir kawr te, thalngul te, virvawm atan lungte a buatsaih a.

¹⁵Tin, Jerusalem-ah in sang leh kulh kil tina daha thal lo kahna leh lung lian fe fea lo denna tur, mi fingte hriat chhuah khawlte a siam a. A ming chu ram tin, ram tangah a thang ta a; a lo chak hle thlengin amaka maka tanpuiin a awm a.

¹⁶Nimahsela a lo chak tak hnu chuan a rilru a lo sang ta a, tha lo takin thil a ti a, LALPA a Pathian chungah thil a tisual ta a; maicham rimtui hal turin LALPA biak inah a lut ta maia.

¹⁷Tin, puithiam Azaria chuan a zui a, mi huai tak tak LALPA puithiam sawmriat an el ve a;

¹⁸tin, lal Uzia chu an khap a, a hnenah, "Uzi, LALPA tana rimtui hal hi i tih tur a ni lo a, rimtui hal tura tihhran Arona fapa puithiamte tih tur a ni zawk e; hmun thianghlim ata hi chhuak rawh; thil i tisual a nih hi, LALPA Pathian laka i ropuina tur pawh a ni bawk lo," an ti a.

¹⁹Chutichuan Uzia chu a thinur ta a; rimtui halna tur mei lakna a keng a;tin, chutia puithiamte chunga a thinur lai tak chuan LALPA inah, rimtui halna bulah puithiamte hmaah chuan a chalah a lo phar chhuak ta a.

²⁰Tin, puithiam hotu Azaria leh puithiam zawng zawng chuan an han en a, ngai teh, a chalah chuan a lo phar a, chuta tang chuan an nam chuak ta thuai a: a ni, LALPA'n a hrem avangin amah pawh hmanhmawh tak bawkin a chhuak ta a.

²¹Tichuan lal Uzia chu a thih ni thlengin a lo phar ta a, a phar avangin in hrangah a awm ta a; LALPA in ata chu tihchhhuah a ni a, tichuan a fapa Jothama chu an rama mite rorelin lal ina awptuah a awm ta a.

²²Tichuan Uzia thiltih dang zawng zawngte chu a bul atanga a tawp thlenga Amoza fapa zawlnei Isaian a ziak a.Chutichuan Uzia chu api leh a pute hnenah chuan a muhil a, lal inphumna hmuna a pi leh a pute zingah an phum a, "Ani zawng phar a ni si a," an ti a: tin, a fapa Jothama chu a aiah a lal ta a.

²³Chutichuan Uzia chu api leh a pute hnenah chuan a muhil a, lal inphumna hmuna a pi leh a pute zingah an phum a, "Ani zawng phar a ni si a," an ti a: tin, a fapa Jothama chu a aiah a lal ta a.