Read Baibul, Mizo 2 Chronicles 28 Bible Online

2 Chronicles 28 - Baibul, Mizo bible

2 Chronicles 28

¹Ahaza chu a lal tantirhin kum sawmhnih mi a ni a; tin, Jerusalem-ah kum sawm leh kum ruk a lal a: a pu Davida angin LALPA mithmuhah thil tha a ti ve lo va:

²Israel lalte kawng a zawh zawk a, Baala-te tan milem chhun chawpte a siam bawk a.

³Hinoma fapa ruamah rimtuite a hal a. LALPA'n Israela thlahte hmaa a hnawhchhuah tak hnamten thil tenawm tak an ti thin angin a fate meiah a luhtir a.

⁴Tin, hmun sangah te, tlangah te, thing hring tin hnuaiah te a inthawi a, rimtuite a hal thin a.

⁵Chuvangin LALPA a Pathianin Suria lal kutah a pe a; an bei a, a mite tam tak salah an hruai a, Damaska-ah an kalpui a. Tin, Israel lal kutah pek a ni bawk a, ani chuan tam tak a that a,

⁶Remalia fapa Peka chuan Judai ramah nuaikhat leh singhnih ni khatah a that a, an za chuan mi huaisen theuh an ni; an pi leh pute lalpa Pathian chu an hawisan vang a ni.

⁷Tin, Ephraim mi chhung puipa Azrikama leh Elkana, lal dawttur chu a that a.

⁸Tin, Israela thlahten an unaute nuaihnih, hmeichhia te, an fapa te, an fanute salah an hruai a; rallak tam tak an laksak bawk a, rallak chu Samari-ah an thlen a.

⁹Nimahsela chutah chuan LALPA zawlnei a lo awm a, a hming chu Odeda a ni; Samaria lo kal tur sipaite chu a va hmuak a, an hnenah, "Ngai teh u, LALPA in pi leh pute Pathian chu Judate chungah a thinur a, in kutah a pe che u a ni a, thinrima in thahna chuan van a han tawng ta a.

¹⁰Tin, Juda leh Jerusalem mite chu bawihnu le bawihpaa siam in tum a: nimahsela nangni ngei pawh hian LALPA in Pathian chungah in tisual ve a ni lo'm ni?

¹¹Chuvangin ka thu hi pawm u la, in unau sala in mante hi hawntir leh rawh u, LALPA thinurna nasa tak mai chu in chungah a awm a ni," a ti a.

¹²Tichuan Ephraim-ho hotu thenkhat, Johanana fapa Azaria te, Mesilemotha fapa Berekia te, Saluma fapa Jehizkia te, Haldaia fapa Amasa te chuan indona atanga lo hawte chu an lo khalh ve bawk a,

¹³an hnenah, "Salte chu in rawn hruai lut tur a ni lo; kan sual leh kan bawhchhiatna belhchhahin LALPA chungah bawhchhiatna min thlensak dawn a ni; kan sualna chu a nasa hle si a, Israel mite chunga thinurna nasa tak a awm a ni," an lo ti a.

¹⁴Chutichuan sipaite chuan mi liante leh mipi hmaah chuan salte leh rallak sumte chu an hnutchhiah ta a.

¹⁵Tin, an hming lam takhote chu an lo tho a, salte chu an hruai a, rallak thil chuanin saruaka awm zawngte chu silhfen an ban a, an tuam a, pheikhawkte an buntir a, ei tur leh in tur an pe a, hriakte an thih a, a chhia thate zawng zawng chu sabengtungah an chuantir a, Tum khua Jerikova an unaute hnenah an kaltir ta a; tin anni chu Samari-ah an haw leh ta a.

¹⁶Chu mi lai chuan lal Ahaza chuan Suria lalte tanpuia sawm turin mi a tir a;

¹⁷Edom-ho chuan Juda-ho chu an han bei a, salah te an rawn man leh avangin.

¹⁸Tin, Philistia-hote pawhin phai lamkhuate leh Juda Chhim te an rawn la a, Beth-semes te, Aijalon te, Gederot te, Soko te a khawperte nen, tin, Timna leh a khawper te, Gimzo pawh a khawperte nen an la a, chungah chuan an awm a.

¹⁹Juda lal Ahaza khan Judate dik lo takin a timualpho fo a, LALPA chungah thil sual nasa tak a tih avang khan LALPA'n Judate chu a titlawm a ni.

²⁰Tin, Suria lal Tilgath-pilnesera a hnenah a kal a, tihchak ahnekin a timangang zawk a.

²¹Ahaza chuan LALPA in leh lal in leh mi lian ina mi thilte a la a, Suria lal a pe a; nimahsela a sawt chuang si lo.

²²A mangan lai takte pawh chuan he lal Ahaza hian LALPA chungah thil a la tisual deuh deuh ta mai a.

²³Amah beitu Damaska-ho pathian hnena te a inthawi a; "Suria lalte pathian chuan anmahni a puih avangin mi puih ve theihna'n an hnenah ka inthawi dawn a ni," te a ti a. Nimahsela amah leh Israel mi zawng zawng chhiatna a ni si a.

²⁴Tin, Ahaza chuan Pathian ina bungbelte chu a khawm vek a, Pathian ina bungbelte chu a tisawm vek a, LALPA in kawngkarte chu a khar tlat a; tin, Jerusalem kil tinah maicham a siam a.

²⁵Tin, Juda khaw tam takah chuan Pathian dangte tan rimtui halna'n hmun sangte a siam a, LALPA a pi leh pute Pathian a tithinur a.

²⁶A thiltih dang zawng zawng leh a awm dan zawng zawng a bul atanga a tawp thlengin, ngai teh, Judate leh Israelte lalte chanchin buah a chuang a.Tin, Ahaza chu api leh a pute hnenah a muhil a, Jerusalem khawpuiah chuan an phum a; Israel lalte thlanah chuan an da lo a ni: tin, a fapa Hezekia chu a aiah a lal ta a.

²⁷Tin, Ahaza chu api leh a pute hnenah a muhil a, Jerusalem khawpuiah chuan an phum a; Israel lalte thlanah chuan an da lo a ni: tin, a fapa Hezekia chu a aiah a lal ta a.