Read Baibul, Mizo 2 Chronicles 29 Bible Online

2 Chronicles 29 - Baibul, Mizo bible

2 Chronicles 29

¹Hezekia chu kum sawmhnih leh kum nga mi a nihin a lal tan a; Jerusalem-ah kum sawmhnih leh kum kua a lal a: a nu hming chu Abijai, Zekaria fanu a ni a.

²Tin, a pu Davida thiltih apiang ti vein LALPA mithmuhah thil tha a ti thin a.

³Ani chuan a lal tan kum thla khatnaah LALPA in kawngkharte chu a hawng a, a chei tha a.

⁴Puithiamte leh Levi-hote a hruai lut a, chhak lampang hmun zau laiah a hruai kkawm a,

⁵an hnenah, "Nangni Levi hote u, ka thu hi ngaithla rawh u; nangmahni intithianghlim phawt u la, tin, LALPA, in pi leh pute Pathian in hi tithianghlim ula, hmun thianghlim - ata bawlhhlawhte hi paih chhuak rawh u.

⁶Kan pi leh pute chuan thil an lo tisual ta a, LALPA kan Pathian mithmuha thil tha lo chu an lo ti a, an lo hawisan a, LALPA awmna chu an hawisan a, an lo hnuchhawn ta a.

⁷Hulhliap kawngkharte chu an khar a, khawnvarte chu an timit a, Israelte Pathian hmun thianghlimah chuan rimtuite an hal lo a, halral thilhlante an hlan lo bawk a.

⁸Chuvang chuan LALPA thinurna chu Judate leh Jerusalemte chungah a awm a, in mita in hmuh ang hian, ram tin, ram tanga tei tei tur leh mak tih atan leh nuihzatbur atan a lo siam ta a ni.

⁹Ngai teh u, kan pi le pute chu khandaiha tihtlawmin an lo awm a, kan fanu leh kan fapte, kan nupuite chu, chung avang chuan salah an lo awm a.

¹⁰Ngai te u, a thinurna nasa tak chu a kian theihna'n LALPA Israelte Pathian hnena thuthlun ka tum a ni.

¹¹Ka naute u, ngur chuai suh u, LALPA chuan a rawngbawltu in ni a, a hmaa a rawngbawla awm tur le rimtui haltuah a thlang tawh che u a ni," a ti a.

¹²Chutichuan Levi mi Amasaia fapa Mahata te, Kohat mi Azaria fapa Joela te; Meraria fapate zinga Abdia fapa Kisa te, Jahalelela fapa Azaria te, Gersonmi Zima fapa Hova te, Jova fapa Edena te; Zima fapa Jova te, Jova fapa Edena te;

¹³Elizaphana fapate zinga mi Simria leh Jeuela te; Asapha fapate zinga mi Zekaria leh Matania te;

¹⁴Hemana fapate zinga mi Jehuela leh Simeia te; Jeduthuna fapate zinga mi Semaia le Uziela te chu an thawk chhuak a.

¹⁵An unaute an ko khawm a, an intithianghlim a, LAPA thua lal thupek anga LALPA in tifai turin an lut a.

¹⁶Tin, puithiamte chu a tifai turin LALPA in chhung ril lamah an lut a, LALPA biak ina thil bawlhlawh an hmuh zawng zawng chu LALPA in kawtah an la chuak a. Tin, Levi-hoin an la a, Kidron luiah an kalpui a.

¹⁷Thla khatna ni khat niin an bei tan a, chu mi thla ni riat niin LALPA hulliap an bei tleng a; tichuan ni riatah LALPA in chu an tithianghlim a; thla khatna, ni sawm leh ni ruk niin an zo vek a.

¹⁸Chutichuan lal Hezekia hnenah lal ina an lut a, "LALPA in chu kan tifai zo ta vek a, halral thillan hlanna maicham te, chu mia bungbel zawng zawng te, chhang chhiahna dawhkan te, chu mia hmanrua zawng zawngte pawh.

¹⁹Tin, lal Ahazan a lal laia thil a tihsual a, a thehthang bo bungbel zawng zawngte pawh kan din leh vek a, kan titianghlim bawk a; tin, ngai teh, LALPA maicham hma lamah a awm e," a ti a.

²⁰Chutichuan lal Hezekia chu zing takah a tho a, khuaa mi lianhote chu a ko khawm a, LALPA inah chuan an chho a.

²¹Tin, ram leh hmun thianghlim leh Juda-hote tana sual thawina tur bawngpa pasarih leh berampa pasarih leh beram no pasarih leh kelpa pasarih an kai chho a. Tin, Arona fapa puithiamte chu LALPA maichama hlan turin thu a pe a.

²²Chutichuan bawngpate chu an talh a; tin, puithiamte chuan thisen chu an la a, maicham chu an theh a, tin, berampate pawh chu an talh a, a thisen chuan maicham chu an theh a, tin, beram note pawh chu an talh a, a thisen chuan maicham chu an theh a.

²³Tin, kelpate chu sual thawina'n lal leh mipuiho kiangah chuan an rawn kai hnai a, an chungah chuan an kut an nghat a;

²⁴tin, puithiamte chuan an talh a, an thisen chuan Israel mi zawng zawng tana remna siamna'n maichamah sual thawina an hlan a; Israel mi zawng zawng tan halral thilhlan leh sual thawina siam turin lal chuan thu a pe a.

²⁵Tin, Davida leh lal zawlnei Gada leh zawlnei Nathana thupek angin LALPA inah chuan Levi-ho chu darbenthek te, perhkhuar te, tingtangte tum tum turin a dah a; thupek chu a zawlnei te hmanga LALPA pek a ni si a.

²⁶Tin, Levi-ho chu Davida siam thil tumrik mi nen an ding a, puithiamte chu tawtawrawt nen.

²⁷Tin, Hezekia chuan maichama halral thilhlan hlan tur chuan thu a pe a. Tin, halral thilhlan an han hlan tan chuan LALPA hla chu tawtawrawt leh Israel lal Davida siam thil tum rik nen an sa tawn bawk a.

²⁸Tin, mipuite chuan Pathian chibai an buk a, hla satute chuan hla an sa a, tawtawrawt hamtute chuan an ham a, halral thilhlan hlan zawh hma loh chuan chutiang chuan an ti reng a.

²⁹Tin, thil hlan an hlan zawh chuan lal leh a hnena awm ve zawng zawngte chuan kunin Pathian chibai an buk a.

³⁰Tin, lal Hezekia leh mi liante chuan Levi-hote chu Davida leh zawlnei Asapaha phuah fakna hla sa turin thu an pe a. Tin, hlim takin fakna hla an sa a, an kun a, Pathian chibai an buk a.

³¹Chutichuan Hezekia chuan, "LALPA tan in intithianghlim ta a, lo hnai u la, LALPA inah inthawina leh lawm thu sawina thilhlan rawn hlan rawh u khai," a ti a. Tin mipuite chuan inthawina te, lawm thu sawina thilhlante an rawn hlan a: a duh apiangin halral thillan an rawn hlan a.

³²Tin, mipuiin halral thilhlan an rawn hlan zat chu bawngpa sawmsarih leh berampa za leh beram no zahnih a ni: he'ng zawng zawng hi LALPA tana halral thilhlan vek a ni.

³³Thilhlan zawng zawng chu bawngpa zaruk, berampa sangthum a ni.

³⁴Amaherawhchu puithiam an tlem lutuk a, halral thilhlan chu an lip seng lo a; chuvangin an unaute Levi-hoin an peih hma chuan puithiamte an intithianghlim thlengin an puibawm a: (Levi-hote chu puithiamhote ai mahin intihthianghlim thuah an khermei zawk mah si a)

³⁵Tin, halral thilhlante chu a tam em a, halral thilhlan tin atana remna thilhlan thau te, in tur thilhlan atan te pawh a tam em em bawk a. Chutichuan LALPA in rawngbawl dan an tifel a.Mipuite tana Pathianin a buatsaih thil avang chuan Hezekia leh mi zawng zawng hhu an lawm em em a; rin loh taka thil lo awm thut a ni lehnghal si a.

³⁶Mipuite tana Pathianin a buatsaih thil avang chuan Hezekia leh mi zawng zawng hhu an lawm em em a; rin loh taka thil lo awm thut a ni lehnghal si a.