Read Baibul, Mizo 2 Chronicles 31 Bible Online

2 Chronicles 31 - Baibul, Mizo bible

2 Chronicles 31

¹Tin, chung zawng zawng chu an tih zawh chuan chuta Israel mi awm zawng zawng chuan Judai ram zawng zawng leh Benjamin ram leh Ephraim leh Manase rama mi lungphunte an tisawm a, Aserite an kit a, hmun sangte leh maichamte an tihchim vek hma loh chuan Judairam khuaahte an kal zel a. Tin Israela thlahte zawng zawng chu an ramah mahni khaw lam theuhvah an haw leh ta a.

²Tin, Hezekia chuan puithiamte leh Levi-hote chu an pawl dan ang zelin mi tin, puithiamte leh Levi-hoten an tlawh theuh turin, halral thilhlan leh remna thilhlan hlantu atan te, rawngbawltu atan te, lawm thu sawitu leh LALPA awmna kawngkaa vengtu turte pawl a siam sak hlawm a.

³Tin, LALPA dana chuang angin zing lam leh tlai lam halral thilhlan atan te, chawlhni leh thla thar leh hunbi nei kut atan te lal chanvo atan ran a ruat bawk a.

⁴Tin, Jerusalem-a mipuite chu LALPA dana an intihchakna'n puithiamte leh Levi-hote chanpual pe turin thu a pe bawk a.

⁵Tin, thupek chu a han darh veleh chuan Israela thlahte chuan an bu te,uain te,hriak te, khawizu te, an loa thil haw hmasa berte an rawn pe chiam a; tin, an engkim sawma pakhat an rawn pe chiam bawk a.

⁶Tin, Israela thlahte leh Juda thlahte, Juda khuatea awmho chuan an bawng leh beram sawma pakhat te, LALPA an Pathian puala an voh sawma pakhat te an rawn pe a, an dah khawm teuh mai a.

⁷Thla thumnaah an dah khawm tan a, thla sarihnaa an dah khawm zo a.

⁸Tin, Jezekia leh an milianten an han hmuh chuan LALPA leh a mi Israelte chu an fak a.

⁹Chutichuan Hezekian an thil dah khawm chungchang thu chu puithiamho leh Levi-hote chu a zawt a.

¹⁰Tin, Zadok mi, puithiam hotu Azarian a chang a, "Miten LALPA ina thilpek an rawn lak tir atangin kan ei zel a, kan khawpkham hle a, a la awm rui mai a; LALPA'n a mite mal a sawm zel a, he mi la awm rui hi kan ei bang a nih hi," a ti a.

¹¹Chutichuan Hezekian LALPA inah chuan pindante siam turin thu a pe a; tichuan an siam ta a.

¹²Tin, thilpek te, sawma pakhat te, Pathian pualte chu rinawm takin an thiar lut a: tin, a hotu chu Levi mi Konania a ni a, a unau Simeia chu a dawttu a ni a.

¹³Tin, Konania leh a unau Simeia hnuaiah chuan lal Jezekia leh Pathian ina hotu Azaria ruatin endiktu Jehiela te, Azria te, Nahatha te, Asahela te, Jerimotha te, Jozabada te, Eliela te, Ismakia te, Mahatha te, Benaia te an awm a.

¹⁴Tin, Levi mi Imna fapa Korea, chhak lam kawngkhar vengtu chu Pathian hnena mahni duh thua thilpek enkawltu leh LALPA tan thilpek leh thil thianghlim semtu a ni a.

¹⁵Tin, ama hnuaiah, puithiam awmna khuaahte chuan Edena te, Miniamina te, Jesua te, Semaia te, Amaria te, Sekinia te, an awm leh a; chung chuan an unaute chu a pawl pawlin a lian leh a te te hnenah an chanvo tur an sem bawk a:

¹⁶thlahtua ngaih mipa kum thum achin chung lam, ni tina LALPA ina thawh tur mamawh nei an pawl dan ang zela kal thinte tiam loin,

¹⁷Puithiamte hna inchhawk dan tur chu a chi chiin an ruat a, Levia chite erawh chu kum sawmhnih achin chunglam a pawl pawlin a ruat a.

¹⁸Puithiamte chu an nupui te, an fapa te, a fanu te leh an chhungkuaa mi dangte nen rinawm taka an intihthianghlim reng avangin chhinchhiah vek an ni a.

¹⁹Tin, Arona thlah, khaw tin, daifema awm puithiamte leh Levi-ho thlahte ziaknaa chuang apiangte chanvo pe turin mi ruat bik an awm.

²⁰Tin, chutiang chuan Judai ram zawng zawngah Jezekian a ti a. LALPA a Pathian mithmuha tha leh dik leh rinawm thil a ti thin a,Pathian ina rawngbawl lam thuah te, dan lam thuah te, thupek lam thuah te, a Pathian zawn thuah te a tih piangah a rilru zawng zawngin a ti a, a hmuingil ta zel a.

²¹Pathian ina rawngbawl lam thuah te, dan lam thuah te, thupek lam thuah te, a Pathian zawn thuah te a tih piangah a rilru zawng zawngin a ti a, a hmuingil ta zel a.