Read Baibul, Mizo 2 Chronicles 5 Bible Online

2 Chronicles 5 - Baibul, Mizo bible

2 Chronicles 5

¹Tichuan Solomonan LALPA in atana a sak chu a peih ta vek a; tin, Solomona chuan a pa Davida'n thil alo hlan tawh zawng zawngte chu a la lut a; tangkarua te, rangkachak te, hmanrua zawng zawngte chu Pathian ina ro dahnaah a dah ta a.

²Chutichuan Solomona chuan Israel upaho te, an hnam puipa, Israela thlahho chhungkaw puipa zawng zawng chu, Davida khawpui Zion ata LALPA thuthlunna bawm zawn chho turin Jerusalem khuaah a khaw chiam a.

³Chutichuan Israel mi zawn zawngte chu thla sarihnaa kutah chuan lal hnenah an kal khawm chiam a.

⁴Tin, Israel upaho zawng zawng chu an lo kal a, Levi-hote chuan bawm chu an zawn a.

⁵Tin, LALPA bawm le, inbiakna puan in leh pua ina bungbel thianghlim zawng zawngte chu an zawn chho a; chungte chu puithiam Levi-hote chuan an zawn chho a.

⁶Tin, lal Solomona leh Israel-ho pungkhawm zawng zawng a hnena rawn inkhawmte chu bawm hmaah an awmho a, beram leh bawngpa sawi sen rual loh leh chhiar sen rual lohin an inthawi a.

⁷Tichuan puithiamte chuan LALPA thuthlunna bawm chu a awma tura an la lut a, in chhunga biakna hmun, hmun thianghlim berah, cherub-te thla hnuaiah chuan.

⁸Cherub-te chuan bawm awmna chung zawnah chuan an thla an zar reng a, cherub-te chuan bawm leh a zawnfungte chu an khuh vek a.

⁹Tin, a zawnfungte chu a sei khawp a, a zawnfung hmawrte chu biakn ahma, hmun thianghlim atang chuan a hmuh theih a; amaherawhchu pawn lamah zawng a lang lo: tun thleng hian huta chuan a la awm reng a ni.

¹⁰Aigupta ram ata an chhuah a, LALPA'n Israela thlahte hnana thu a thlun laia Mosia'n Horeb tlanga lungphek pahnih a dah chauh lo kha chu chu mi bawm chungah chuan engmah dang a awm lo.

¹¹Tin, heti hi a ni a, puithiamhote chu hmun thianghlim ata an lo chhuah veleh chuan, (puithiam awmho zawng zawngte chu an intithianghlim a, apawlin an insiam chuang lo a;

¹²Levi-ho hla satu zawng zawngte pawh an zavaiin Asapha te, Hemana te, Jeduthuna te, an fapate leh an unaute nen, puan zai sina intuamin darbenthek te, perhkhuang te, tingtang te nen, maicham chak lampangah an ding a, an zingah chuan puithiam za leh sawmhnih tawtawrawt hamin an awm bawk a ni:)

¹³heti hi a ni a, tawtawrawt hamtute le hla satuten LALPA fakna leh lawm thu sawi nana an tum rik chu ri khat ang maiin a hriat a; tawtawrawt leh darbenthek le thil tum rik nena an aw an han chauh a, "Ani chu a tha si a, a ngilneihna chu kumkhuain a awm dawn a ni," tiin Lalpa an han fak chuanin, Lalpa in chu chhumin a khat ta mup mup mai a,tichuan chhum avang haun puithiamte chuan rawng pawh an bawl thei ta lo hial a; LALPA ropuinain Pathian in chu a khat ta vek si a.

¹⁴tichuan chhum avang haun puithiamte chuan rawng pawh an bawl thei ta lo hial a; LALPA ropuinain Pathian in chu a khat ta vek si a.