Read Baibul, Mizo Ezra 4 Bible Online

Ezra 4 - Baibul, Mizo bible

Ezra 4

¹Juda mi leh Benjamina mite hmelma te chuan sal chhuakhoin LALPA, Israelte Pathian biak in an saksak tih an lo hriat chuan,

²Zerubabela leh an chhungkaw puipate hnen lamah an va kal a, an hnenah, "Kan sakpui ve ang che u; keini pawhin in zawn ang hian in Pathian chu kan zawng ve a; heta min hruai chhotu Assuria lal Essar-haddona a lal lai atang khan a hnena kan inthawi thin a sin," an ti a.

³Nimahsela Zerubabela leh Jesua leh Israelte chhungkaw puipa dangte chuan an hnenah, "kan Pathian in saksaknaa hian in tel vena kawng reng reng a awm lo e; Persia lal Kura thu min pek angin keimahniho ngawtin LALPA, Israelte Pathian kan saksak dawn a ni," an ti a.

⁴Chutichuan chu mi rama mite chuan Juda mite kut chu an tihchauhsak a, an in sa chu chu an tibuai a.

⁵Persia lal Kura lal chhung zawng, Persia lal Daria lal thleng hialin an thiltih tumte engmahlova siam turin sawipuitute an ruai a.

⁶Chutichuan Ahasuera lal lai, a lal tantirh laiin Judai ram leh Jerusalem-a awmte hekna lehkha an phuah a.

⁷Tin, Artazerzia lal lai chuan Bislama te, Mithredatha te, Tabeela te leh an thian dangte nen chuan Pesia lal Artazerzia chu lehkha an thawn a; an lehkha ziak chu Aramik tawngin Aramik hawrawpa ziak a ni.

⁸Hotu Rehuma leh lehkha ziaktu Simsaia chuan Jerusalem-a mite hekin Persia lal Artazerzia hetiang lehkha hi an thawn a:

⁹Lehkha thawntute chu: Hotu Rehuma leh lehkhaziaktu Simsaia leha thiante - roreltute leh, ram awptu te, Persia mi te, Elam rama awm thin Erek mi te, Babulon mi te leh Susan mi te;

¹⁰Mi ropui Asurpanipalan sala a hruai Somorasia khuaah leh Euphrates lui thlang lama a awmtir takte an ni.

¹¹Lal Artezerzia chu hetiangin lehkha an thawn a: "Lalber Artezerzia chi i chiahhlawh Euphrates lui khawthlang lam ram miten chibai kan buk e.

¹²I hnen atanga Juda mi lo chote chu kan hnenah Jerusalem-ah an lo kal a; khaw hel hmang leh sual chu an din tha a, a kulh chu an peih tawh a, a lungphum chu an siam tha tawh tih lal chuan lo hre rawh se.

¹³He mi khua hi an din a, a kulhte an siam zawh chuan, chiah te, thil neih man te leh leiman te an chawi duh lo ang a, a tawpah chuan lalte tan chhiatna a lo ni mai ang tih lalin lo hre rawh se.

¹⁴Lal ina chi liak kan nih avangin lal mawi lohna hmuh hi kan tan a fel lo hle si a;

¹⁵chuvangin i pi leh pute thil chhinchhiah ziakna buah i zawn a, chu mi ziakna buah chuan i hmuh a, he mi khua hi hel hmang khua a nih leh lalte leh an ramte tana thil hlauhawm tak a nih a, an hel kumkhua a, chu mi avangin he khua hi a lo chia a ni tih i hriatna'n lehkha kan thawn a, lal kan hriattir a ni.

¹⁶He mi khua hi an din a, a kulhte an peih vek chuan lui ral lama reng reng chuan chan i neih loh phah ang tih lal kan hriattir a ni," an ti a.

¹⁷Chutichuan Lalber chuan chhanna a thawn a, "Hotu Rehuma te, lehkha ziaktu Simsaia te leh an thian dang Samaria ram leh Euphrates lui thlang lama awmte chibai ka buk a che u.

¹⁸Kan hnena in lehkha rawn thawn kha ka hmaah fiah takin an chhiar a.

¹⁹Tin, thu ka pe a, an zawng a, he khua hi hman atangin lal chunga an hel thin a, chutah chuan helna leh buaina a awm thin tih chu kan hmu chhuak a ni.

²⁰Jerusalem-ah khan lal thiltithei tak tak lui ral lehlam ram thlinga rorolte pawh an lo awm tawh a; chhiah te, thil neih man te, leiman te an la thin a.

²¹Khang mite kha chawlhtir u la, thu ka pek hma loh chuan khua chu din su se.

²²Muang hauh suh u: engah tehlul nge lalte tana chhiatna thil pawi tak a lo zualkai ang?" a ti a.

²³Chutichuan lal Artazerzia lehkha chu Rehuma leh lehkhaziaktu Simsaia leh an thiante hmaa an chhiar zawh chuan hmanhmawh takin Jerusalem-a Judate hnenah an kal a, thuneihnain an ban luihtir a.Chutichuan Jerusalem-a Pathian in an bei chu an chawlhsan ta a; Persia lal Daria lal kum hnihna thlengin chawlhsan a ni ta a.

²⁴Chutichuan Jerusalem-a Pathian in an bei chu an chawlhsan ta a; Persia lal Daria lal kum hnihna thlengin chawlhsan a ni ta a.