Read Baibul, Mizo Nehemia 2 Bible Online

Nehemia 2 - Baibul, Mizo bible

Nehemia 2

¹Tin, heti hi a ni a, lal Artazerzia kum sawmhnih a lal kum, Nisan thlaah uain an rawn hlui hnuin uain chu ka la a, lal chu ka pe a.Tun hma lam chuan a hmaah lungngai hmel ka pu ngai lo a.

²Tin, lal chuan ka hnenah, "I dam lo pawh a ni si lo a, eng tizia nge lungngai hmel i put chu le? Thil dang a ni lo ang, i rilru lam a lungngai a nih hi maw," mi ti a. Chutichuan ka hlau ta em em mai a.

³Tin, kei chuan lal hnenah, "Lal chu kumkhuain dam reng rawh se: mi thlahtute thlan awmna khua chu a ramin a kawngkharte chu a kang vek si a, lungngai hmel pu lo thei em ka nih ang?" ka ti a.

⁴Chutichuan lal chuan ka hnenah, "Eng nge ini i dil?" a ti a. Chutichuan van Pathian hnenah ka tawngtai ta a.

⁵Tin, lal hnenah chuan, "Lal remtihzawng a nih a, i chhiahhlawh hian i mit ka lo thlun thin chuan, Judai ramah mi thlahtute thlan awmna khuaah mi kaltir la, khua chu ka va din leh ang e," ka ti a.

⁶Tin, lal chuan ka hnenah, (lalnu pawh a kiangah chuan a thu a) "Eng chen nge i thang ang a, eng tikah nge i lo haw leh ang?" a ti a. Chutichuan lal chuan lawm takin mi kaltir ta a; tin, keiin hunbi ka tiam a.

⁷Chu chauh chu ni loin lal hnenah chuan, "Lal remtihzawng a nih chuan, lui rala roreltute hmuh atan Judai ram ka thlen thlenga mi kaltir zel phalna turin lehkhate mi pe la;

⁸tin, lal ngaw hak vengtu Asapha hmuh turin in venna kulhbing kawngkhar rel atan te, khawpui kulh atan te, ka va luah tur in atan te thing mi pek theihhna turin lehkha mi pe bawk rawh," ka ti a. Tin, ka Pathianin mi duhsak avangin lal hnena ka dil ang zelin mi pe a.

⁹Chutichuan lui rala roreltute hnen chu ka han thleng a, lal lehkhate chu ka han pe a. Tin, lal chuan ka hnenah sipai hotute leh sipai sakawr chung chuang mite a kaltir ve a ni.

¹⁰Tin, Horon mi Sanbalata leh Amon mi, chhiahhlawh Tobia ten an lo hriat chuan, Israraela thlahte thawvenna ngaihtuah turin mi an lo kal zu nia tiin an lo lungni lo hle mai a.

¹¹Chutichuan Jerusalem ka han thleng a, ni thum ka han awm phawt a.

¹²Tin, zanah chuan ka tho a, kei leh mi dang tlem te te nen; Jerusalem tana ka tih tur ka Pathianin ka rilrua a dah chu tumah ka hrilh lo a, ka chuanna sa ngawt lo chu sa dang kan keng lo a.

¹³Tin, zanah chuan ruam kawngkaah ka chhuak a, dragon tuichhunchhuah lam leh bawlhhlawh kawngka lamah ka kal a, Jerusalem kulh chim leh a kawngkhar kangte chu ka en vel a.

¹⁴Tin, tuichhunchhuah kawngka leh lal dil thlengin ka kal zel a: nimahsela ka chuanna sa kal tlang theihna reng reng a awm lo a.

¹⁵Chutichuan zanah lui ka zawh chho a, kulh chu ka en a; tin, ka let leh a, ruam kawngkaah chuan ka lut a, chutiang chuan ka haw leh ta a.

¹⁶roreltute chuan khawiah nge ka kal a, eng nge ka tih pawh an hre lo: tin, Judate, puithiam te, mi thate, roreltute leh mi dang hnathawktu tur reng reng pawh ka lahrilh rih lo bawk a.

¹⁷Chutichuan an hnenah, "kan chan a chhiatzia hi in hmu a, Jerusalem a ram tih te, a kawngkhar te a kang tihte pawh in hria a: hawh u, sawichhiat kan nih tawh loh nan Jerusalem kulh chu i din leh ang u," ka ti a.

¹⁸Tin, ka Pathian mi duhsak thute ka hrilh a, ka hnena lal thu sawite pawh. Tin, anni chuan, "I tho ang u khai; i din teh tak ang u," an ti a. Chutichuan chu hna tha thawk tur chuan an kut an tichak a.

¹⁹Amaherawhchu Horon mi Sanbalata leh Amon mi, chhiahhlawh Tobia leh Arab mi Geseman an hriat chuan, mi nuihzatbur a, min hmusit a, "In thiltih hi eng tizia nge ni? Lal chungah in hel elo ni?" te min ti a.Chutichuan an ni chu ka chhang a, an hnenah, "Van Pathian chuan mi tihmuingil ang a; chutichuan keini a chhiahhlawhte chu kan tho ang a, kan din ang a: nangni erawh chuan Jerusalem-ah hian chanvo emaw, thuneihna emaw, hnuhma emaw in nei lo reng reng," ka ti a.

²⁰Chutichuan an ni chu ka chhang a, an hnenah, "Van Pathian chuan mi tihmuingil ang a; chutichuan keini a chhiahhlawhte chu kan tho ang a, kan din ang a: nangni erawh chuan Jerusalem-ah hian chanvo emaw, thuneihna emaw, hnuhma emaw in nei lo reng reng," ka ti a.