Read Baibul, Mizo Nehemia 5 Bible Online

Nehemia 5 - Baibul, Mizo bible

Nehemia 5

¹Chutichuan mipuite leh an nupuite chu an unau Judate chunga phunnawiin an au ta mur mur mai a.

²Keiniho hi kan fapate leh kan fanute nen kan thahnem hle a, ei tur lamah hian kan hautak hle si a," an ti a.

³Thenkhatin, "Kan tam si a, ei tur kan nei lo. Kan lote kan dahkham si a," an ti a.

⁴Lal hnena chhiah chawi atan sum kan puk a, chu mi atan chuan kan lote leh kan grep huante kan dahkham a.

⁵Kan tisa chu kan unaute tisa ang bawk a ni a. Kan fate pawh an fate ang bawk an ni si a: nimahsela hei, kan fanute leh kan fapate hi chhiahhlawh atana bawihah kan luhtir takngial dawn hi; kan fanu thenkhatte phei chu bawiah an lut tawh nghe nghe a: chhan ngaihna hre hek lo i, miin kan lote leh kan grep huante lah chu an nei ta si a," tite an awm nual bawk a.

⁶Chung thute leh an au thawm chu ka hriatin ka thinur hle mai a.

⁷Chutichuan ka rilruin ka ngaihtuah a, mi thate leh roreltute chu ka khak a, an hnenah, "Mi tinin in unaute a pung umin sum in puktir reng mai a," ka ti a. Tin, an chungchang ngaihtuah turin mi ka khawm chiam a.

⁸Tin, an hnenah, "Hnam dangte hnena hralh kan unau Juda-hote chu kan theih ang angin kan tlan a: nangnin in unaute chu zawrh in tum a ni maw? Keini hnenah kher hian hralh an ni dawn em ni?" ka ti a. Chutichuan an ngawi reng mai a, chhanna engmah an hre lo a.

⁹In thiltih hi a tha tawp lo mai a ni: kan hmelma, hnam dangte mi sawichhiatna avangte hian kan Pathian tih a in awm a tul a ni lo'm ni?

¹⁰Kei leh ka unaute leh ka tlangvalte pawhin chutianga a pung um chuan kan sum leh buh kan puktir ve bawk a sin. A pung uma puktir hi i ban teh daih ang u khai.

¹¹Vawiinah ngei hian an lo te, an grep huan te, an oliv huan te, an inte leh an sum leh an buh leh an uain leh hriak hmun zaa hmun khat in lak thin pawh chu pe leh vek rawh u khai," ka ti bawk a.

¹²Chutichuan anni chuan, "kan pe leh vek ang, an lakah engmah kan phut lo ang; it ih ang tak chuan kan ti ang," an ti a. Chutichuan puithiamte ka ko a, an hmaah chuan mi thutiam ang taka ti ngei tur chuan chhia ka chhamtir a.

¹³Ka puan ven chu ka thing a, "He mi thutiam anga ti lo apiang hi Pathianin an in atang leh a hnathawh atangin hetiang hian thing thla rawh se; hetiang thinthlakin awm se la, tiruahin awm rawh se," ka ti a. Tin, pungkhawmho zawng zawng chuan, "Amen," an ti a, lalpa an fak a. Tin mipuite chuan chu mi thutiam ang chuan an ti ta a.

¹⁴Chu lo pawh chu Judai rama an mahni awptu atana ruat ka nih achin, lal Artazerzia kum sawmhnih a lal kum atanga kum sawmthum leh kum hnih a lal kum thleng, kum sawm leh pahnih chhung chuan kei leh ka unaute hian ram awptu buh chhiah kan la lo a.

¹⁵Nimahsela tun hmaa ram awptu, mite lakah an lo hautak hle mai a, tangka sekel sawmli tiam loin an chhangte leh uainte an laksak thin a; chu mi ahnu hmanah an chhiahhlawhte chu mite chungah an intilal hle mai a: nimahsela kei zawngin Pathian tihna avangin chutiang chuan ka ti ve lo.

¹⁶A ni, he mi kulh hnathawk hian ka awm reng a, ram reng reng lei pawh ka lei lo va: ka tlangvalho zawng zawng pawh hna chu thawkin chutah chuan an awm khawm reng bawk a ni.

¹⁷Chu chang pawh ni loin kan vela hnam dangte zing atanga lo kal tiam loin Juda-te leh roreltute zinga ka dawhkan kil mi za leh sawmnga an awm reng a ni.

¹⁸Tin, ni khat atana an buatsaih chu sebawngpa pakhat leh beram paruk a tha thiau a ni a; tin, arte pawh ka tan an buatsaih a, ni sawm dan zelah uain chi hrang hrang tam zet nen: chutiang chuan buatsaih mah se la, he mite tuar hi a rip em avangin ram awptu pual chhang chu ka phut lo reng reng a ni.Aw ka Pathian, he mite tana ka thiltih zawng zawng hi ka thatna turin hre reng ang che.

¹⁹Aw ka Pathian, he mite tana ka thiltih zawng zawng hi ka thatna turin hre reng ang che.