Read Baibul, Mizo Nehemia 9 Bible Online

Nehemia 9 - Baibul, Mizo bible

Nehemia 9

¹Chutichuan chu mi thla ni sawmhnih leh ni li ni chuan Israela thlahte chu chaw nghei a, saiip puan sin a, lei kai luamin an kal khawm a.

²Tin, Israel hnam chu hnam dangte lakah an intihrang a, an ding a, an sualnate leh an pi leh pu bawhchhiatnate thupha an chawi a.

³Tin, mahni hmun hmunah an ding a, chu mi ni hmun lia thena hmun khat chhung chuan LALPA an Pathian dan bu an chhiar a; tin, hmun lea thena hmun khat dang chhung chuan thupha an chawi a, LALPA an Pathian an bia a.

⁴Chutichuan Levi-ho dawhkan sangah chuan jesua te, Bania te, Kadmiela te, Sebania te, Bunia te, Serebia te, Bania te, Kenania te chu an ding a, ring takin LALPA an Pathian an au a,

⁵Chutichuan Levi mi, Jesua leh Kadmiela te, Bania te, Hasabneia te, Serebia te, Hodia te, Sebania te, leh Pethahia te chuan, "Ding u la, LALPA in Pathian chu chatuan ata chatuant hlengin fak rawh u; tin, chawimawina leh fakna zawng zawngina a phak loh, i hming ropui chu fakin awm rawh se," an ti a.

⁶Israel mipuite chu hetiangin an tawngtai a, "LALPA, Nangmah chauh hi LALPA i ni a, vante van leh a chhunga awm zawng zawngte nen, leilung leh a chhunga awm zawng zawngte nen tuifinriat leh a chhunga awm zawng zawngte nen i siam a, a azain i vawng tha thin a: tin vana awmhote chuan chibai an buk thin che a.

⁷Abrahama chu thlanga, Kaldai ram Ur khua ata hruai chhuak a, a hminga Abrahama saksaktu, LALPA Pathian i ni a;

⁸tin, a thinlung chu i hmaah rinawmin i hria a, Kanan-hote, Hit-ho te, Amor-ho te, Periz-hote, Jebus-ho te, Girgas-hote ram chu pe turin a thlahte lam pe turin thu i thlung a; tin, i thu i hlen bawk a; fel tak i ni si a.

⁹Aigupta rama kan pi leh pute hreawmzia chu i hmu reng a, Tuifinriat Sen kama an au thawmte chu i hria a;

¹⁰Pharaoa leh a chhiahhlawh zawng zawngte leh a rama mi zawng zawngte chungah chhinchhiahnate leh thil makte i lantir a; chapo takin an chungah thil an ti tih i hre si a, tichuan tun thleng hian hming i insiam ta a.

¹¹Tin, an hmaah tuifinriat chu i tithen a, tichuan lei charah tuifinriat chu an kal tlang a; tin, anmahni umtute chu tui thuk takah, tui thuk taka lung paih luh ang maiin i paih lut a.

¹²Tin, chhunah chhumdingin i hruai thin a, zanah pawh an kalna tur kawnga anmahni en turin meialh dingin i hruai thin a.

¹³Sinai tlangah chuan i lo chhuk bawk a, van atangin an hnenah thu i sawi a, rorelna dik tak te, dan dik tak te, thuriat leh thupek tha takte i pe a,

¹⁴tin, i chawlhni thianghlim chu anmahni i hriattir a, i chhaihhlawh Mosia hmangin thupek te, thu ruat te, dante i pe a;

¹⁵tin, an riltam tihrenna'n van atangin chhang i pe a, an tuihal tihrehna'n lungpui ata tui i tihchhuahsak a, pek i tum ram chu luah turin i pe a.

¹⁶Nimahsela anni leh kan pi leh pute chuan chapo takin thil an ti a, an intiluhlul a, i thupekte chu an pawm lo a.

¹⁷an awih duh lo a, an zinga i thil mak tihte pawh chu an hre duh tawh hek lo; an intiluhlul a, an helin an bawih nihna lamah let leh turin hotu an ruat ta zawk a: nimahsela nang chu ngaidam tura inpeih reng Pathian, mi khawngaih thei, lainatna a khat, thin nel, ngilneihna ngah i ni a, anmahni i thlahthlam chuang lo a.

¹⁸A ni, bawng no lem an insiam a, 'Hei hi a ni, Aigupta ram ata hruai chhuaktu che i Pathian chu,' an tiha, thinurthlak tak thil an tih laite pawh khan,

¹⁹i ngilneihna nasa tak chuan thlalerah khan i thlahthlam chuan lo va: kawnga anmahni hruai tura an chunga chhumding chuan chhunah a kalsan lo a, anmahni en tur leh ankalna tur kawng kawhhmuh tura meialh ding pawh chuan zanah a kalsan hek lo.

²⁰Anmahni zirtir turin i thlarau tha tak chu i pe bawk a, i manna chuan i chawm a, an tuihal tihrehna'n tui i pe a.

²¹A ni, thlalerah khan kum sawmli i chawm a, engmah an tlachham lo a; an silhfente a hlui lo a, an kete chu a vung lo a.

²²Tin, ram leh hnamte i pe a, chung chu an chanpual i sem theuh va: chutichuan Sihon-a ram, Hesbon lal ram leh Basan lal Oga ram chu an luah a.

²³An thlahte chu vana arsi zatin i tipung bawk a, an luah tura an pi leh pute hnena i lo sawi tawh ramah chuan i hruai lut ta a.

²⁴Chutichuan an thlahte chuan ram chu an luah ta a, tin, nangin chu mi rama awm Kanan mite chu an hmaah i titlawm a, an duh duha tih atan an lalte leh chu mi rama mite nen an kutah i pe a.

²⁵Kulh nei khawpiute ram tha tak takte an la a, thil tha tinrenga khat inte an luah a, tuikhur hiah sa te, grep huan te, oliv huan te, thei kung tam takte an nei a: tichuan an ei a, an puar a, an lo thau a, i thatna nasa takah chuan nuam an chen a.

²⁶Nimahsela an tihmawh a, i chungah an hel a, i dan chu an hnuchhawn daih a, i lam hawi lehtir tuma zilhtu i zawlneite chu an that a, thinurthlak tak tak thil an ti a.

²⁷Chuvang chuan anmahni tihreawmtu an hmelmate kutah chuan i pe a: an mangan laia an auh che khan van atangin i lo ngaithla a; tin, i ngilneihna nasa tak chuan an hmelmate laka chhanchhuaktu tur chhandamtute i pe a.

²⁸Nimahsela ralmuanga an han awm hnu chuan, i mithmuhah thil tha lo an ti leh mai a: chuvangin an hmelmate kutah i hluihlawn a, tichuan an chungah thu an nei a; mahse an lamleta an auh che khan, van atangin i lo ngaithla a, vawi tam tak i ngilneihna chuan i chhanchhuak a;

²⁹tin, i dana i hruai luh leh theihna'n i zilh thin a; nimahsela chapo takin thil an ti a, i thupekte an pawm lo a, i rorelna kalhin thil an tisual a; (miin an zawma an nunpui tur chu;_ tin, tukkhum chan an chhawn a, an intiluhlul a, an ngaithla duh lo a.

³⁰Nimahsela kum tam tak anmahni i dawh a, i thlarauva i zawlneite hmangin i zilh thin a; nimahsela an beng an chhu ngawng a; chuvangin chung rama mite kutah chuan i pe ta a.

³¹Nimahsela i ngilneihna nasa tak chuan an tawp hlenna hlauh chu i thlensak lo a, i thlahthlam hek lo; Pathian, mi khawngaih thei tak, lainatnaa khat i ni si a.

³²chuvangin kan Pathian, Pathian ropui, engkim ti thei leh hlauhawm, thuthlung hlena khawngaihna tilangtu chuan kan chung leh kan lal te, kan mi lian te, kan puithiam te, kan zawlnei te, kan pi leh pute leh i mite zawng zawng chunga Asuria lalte lal lai atanga tun thlenga hreawmna lo thleng zozaite hi thil te thamah ngai suh ang che.

³³Engpawh ni se la, kan chunga thil lo thleng zawng zawngah hian nang chu i fel a; nang chuan dik takin thil i ti a, keini erawh chuan thalo takin kan ti a ni;

³⁴kan lal te, kan mi lian te, kan puithiam te, kan pi leh pute pawhin i dan chu an zawm lo a, i thupek leh i thu hriattir, anmahni i zilhnate chu an pawm hek lo.

³⁵An chunga i that thin tehlul nen, an ramah, ram zau tak leh ram tha tak i pekah chuan i rawng an bawlsak si lo chia, an thil tihsual an ban chuan hek lo.

³⁶Ngai teh, tunah hi chuan bawih kan ni ta a, a chhunga thil rah leh thil tha kan pi leh pute ei atan i pek ramah hian bawih kan ni.

³⁷Kan sual avanga kan chunga lal atana i ruatte lah chuan an neihnun phah a: kan taksa chungah leh kan ran chungah te lam pawh an duh duhin thu an nei a, kan mangang em em mai a ni.Chung zawng zawng avang chuan thu nghet tak kan thlung a, kan ziak a; kan mi lian te, kan Levi-hote leh kan puithiamten min nemnghehpui a.

³⁸Chung zawng zawng avang chuan thu nghet tak kan thlung a, kan ziak a; kan mi lian te, kan Levi-hote leh kan puithiamten min nemnghehpui a.