Read Baibul, Mizo Estheri 2 Bible Online

Estheri 2 - Baibul, Mizo bible

Estheri 2

¹Chung thil hnua lal Ahasuera thinrim chu a la daih hnu chuan Vasti leh a thiltih leh a chungchanga thupek chu a hre chhuak a.

²Chutichuan lal chhiahhlawh, a rawngbawltute chuan a hnenah, "Lal tan nula hmel tha zawn ni se la;

³lal pindan enkawltu Hegaia, hmeichhe enkawltu hnuaiah, Susana lal hmeichhe dah khawmna inah nula hmel tha zawng zawng ko khawm turin lalin a ram chhunga ram then zawng zawngah hotu ruat se la; tin, an intihthianghlimna turte pek ni theuh sela;

⁴lal tilawmtu ber nula chu Vasti aiah lalnu ni se la, " an ti a. Tichuan chu chuan lal chu a tilawm a, chutiang chuan a ti ta a.

⁵Lal khawpui Susan-ah chuan Juda mi, mi pakhat a awm a, a hming chu Mordekaia a ni a, Benjamin mi Kisa fa Simeia fapa Jaira fapa a ni;

⁶Babulon lal Nebukadnezaran Juda lal Jekonia sala a hruai laia Jerusalem atanga hruai a ni.

⁷A pami fanu, Hadasi, Estheri an tih chu a enkawl seilian a; pa a nei lo a, nu a nei bawk si lo a, nula chu a nalhin a hmel a tha hle mai a; anu leh a pa an thih hnu khan Mordekaia chuan a fanu a tan a awmpui ta a ni.

⁸Chutichuan lal thupek leh lal thurat chu an lo hriat a, nula tam tak, lal khawpui Susan-a Hegaia vennaah an kal khawm chiam lai chuan, heti hi a ni a, Estheri chu lal inah hmeichhe vengtu Hegaia vennaah chuan an hruai lut a.

⁹Tin, nula chuan a tilawm a, a duhsakna a chang a, lal in ata a chanvo leh a intihthianghlimna tur chu a pe thuai mai a, nula pasarih pek awm deuh deuhte nen; amah leh a nulatpuite chu hmeichhe awmna hmun tha berah a hruai ta a.

¹⁰Estheri chuan eng chi nge a nih leh tute nge a laichinte a hriattir hauh lo a; Mordekaia chuan hriattir lo turin thu a pe tlat a ni.

¹¹Estheri chuan eng nge a tih thin a, engtin nge a awm tih hre turin Mordekaia chu ni tin, hmeichhe awmna, kawt hung chhungah chuan a kal thin a.

¹²Tin, thla sawm leh thla hnih hmeichhe tana dan anga an chungchanga thiltih hnua lal Ahasuera hnena nulaho an kal hun a lo thlen chuan (chutiangah chuan an intihthianghlim hun a kim tawh thin a, hetiang hian an ti thin a ni, thla ruk chhung mura hriakin an zut a, thla ruk dang leh chhung rimtui leh hriak dangin an zut leh a),

¹³hetiang hian an kal thin a, lal ina luhpui turin hmeichhe awmna ata an duh apiang an pe thin a ni.

¹⁴Tlai lamah an kal a, atukah, hmei vengtu, lal pindan vengtu Saasgaza ven hmeichhe awmna pahnihnaah an let leh thin a; lalin a duh a, an hming lama a kohte chauh lo chu lal hnenah an kal leh tawh thin lo.

¹⁵Chutichuan Mordekaia pami Abihaila fanu, a fanu atana a awmpui Estheri chu lal hnena a kal hun a thlen chuan, hmeichhe vengtu, lal pindan vengtu Hegaia ruat chauh lo chu engmah a duh lo a. Estheri chu a hmu apiangte duhzawng mi nih a kai a.

¹⁶Chutichuan Estheri chu lal Ahasuera lal inah thla sawmna, Tebet thlaah kum sarih a lal kumah an hruai lut a.

¹⁷Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan lallukhum a khumtir a, Vasti aiah lalnuah a siam ta a.

¹⁸Chutichuan Estheri hmingin lal chuan a mi liante leh a mite tan ruai ropui tak a theh a; a rama mite tan awm ni a khamsak a, lal tih awm rengin phal takin thilte a sem a.

¹⁹Tin, nulaho an inkhawm leh lai chuan Mordekaia chu lal kawt hung kawngkaah a thu a.

²⁰Mordekaia thupek avangin Estheri chuan tute nge a laichinte leh eng chi nge a nih a la hriattir lo fo a; Estheri chuan Modekaia thu chu a awmpui laia a zawm thin ang khan a la zawm reng a ni.

²¹Tin, lal kawt hung kawngkaa Mordekaia a thut lai chuan lal pindan vengtu zinga mi pahnih Bigthana leh Teresa, kawngka veng thintute chu an lo thinur a, lal Ahasuera chungah kutthlakna remchang an zawng a.

²²Chu thil chu Mordekaian a lo hria a, lal nu Estheri chu a hrilh a, tin, Estheri chuan Mordekaia hmingin lal a hrilh a.Tin, chu mi thu chu an dap vel a, chutiang chu a lo ni ngei tih an hriat chhuah chuan an awhhlumtir ve ve a; chu chu la kawl, lal chanchin ziakna buah an ziak a.

²³Tin, chu mi thu chu an dap vel a, chutiang chu a lo ni ngei tih an hriat chhuah chuan an awhhlumtir ve ve a; chu chu la kawl, lal chanchin ziakna buah an ziak a.