Read Baibul, Mizo Exodus 11 Bible Online

Exodus 11 - Baibul, Mizo bible

Exodus 11

¹Tin, LALPA'n Mosia hnenah chuan, "Pharaoa chungah leh Aigupta ram chungah hian vawi khat chu hri ka han lentir leh ang e; chu mi hnuah zawng a chhuahtir tawh ang che u: a chhuahtir vek vek che u zawngin heta ta hi a hnawt chhuak daih mai ang che u.

²Chutichuan mipuite bengah hian thu va sawi rawh, mipa leh hmeichhe tinin an vengte chu tangkaraw incheina leh rangkachak incheinate chu dil rawh se," a ti a.

³Tin, LALPA'n mite chu Aigupta mite a khawngaihtir ta a. Chu chang a ni lo a, Mosia chu Aigupta ramah chuan Pharaoa chhiahhlawhteho ngaihah leh mipuite ngaihah chuan mi ropui tak a ni a.

⁴Tin, Mosia chuan, "LALPA'n heti hian a ti, 'Zan lai velah chuan Aigupta ram chhungah hian ka lo kal tlang ang a:

⁵tichuan Aigupta rama fa tir zawng zawng lalthutphaha thu Pharaoa fa tir atanga buh rawt sawmna bula awm bawihnu fa tir lam pawhin an thi ang, ran piang hmasa ber zawng zawngte nen.

⁶Tin, Aigupta ram chhung zawng zawngah chuan tahna nasa tak a awm ang a, chutianga nasa reng reng a la awm ngai lo a, chutiang reng reng chu a awm leh tawh hek lo ang.

⁷Nimahsela Israela thlahteho zawng mihring leh sa lamah reng reng ui pawhin a lei a phut lo ang: LALPA chuan Aigupta mite leh Israela mite hi a thliar ngei a ni tih in hria ang.

⁸Tin, he'ng i chhiahhlawh zawng zawngte hi ka hnenah an lo chhuak ang a. Chhuak rawh, i hnung zuitute zawng zawng nen hian, tiin ka hmaah an kun ang: tin, chu mi hnuah chuan ka chhuak ang,' tiin," a ti a. Pharaoa hnen ata chu thinrim zet maiin a chhuak ta a.

⁹Tin, LALPA'n Mosia hnenah chuan, "Pharaoan in thu a pawm lo ang: ka thil makte Aigupta ramah hian tihpuna a awm theih nan," a ti a.Tin, Mosia leh Arona chuan Pharaoa hmaah chuan chung thilmak zawng zawngte chu an ti a: tin, LALPA'n Pharaoa thinlung chu a tihkhauhsak a, tichuan Israela thlahte chu a ram ata a chhuahtir phal lo a.

¹⁰Tin, Mosia leh Arona chuan Pharaoa hmaah chuan chung thilmak zawng zawngte chu an ti a: tin, LALPA'n Pharaoa thinlung chu a tihkhauhsak a, tichuan Israela thlahte chu a ram ata a chhuahtir phal lo a.