Read Baibul, Mizo Exodus 12 Bible Online

Exodus 12 - Baibul, Mizo bible

Exodus 12

¹Tin, LALPA'n Mosia leh Arona chu Aigupta ramah chuan a bia a:

²Tun thla hi in tan thla chhiar tanna a ni ang a: in tan kum khat chhunga thla chhiar tanna a ni ang.

³Israel-ho pung khawm zawng zawngte hnenah hian, 'Tun thla ni sawm ni takah hian mi tinin an chhungkaw khawsa ang zelin an chhungkua atan beram no pakhat la theuh se la:

⁴tin, an chhungkua chu beram no talhna tham ni lo khawpa tlem lutuk an nih chuan, a thenawm nen an chhungkaw mihring zir zelin beram no pakhat intawm se la; mi tin ei tawk tur ang zel ngaihruatin beram no chu in ruat tur a ni.

⁵In beram no chu a pa, kum khat hnuai lam, hmelhem lo a ni tur a ni: beram zinga mi emaw kel zinga mi emaw a ni tur a ni a:

⁶tin, chu mi thla ni sawm leh ni li ni thlengin in dah tur a ni a: tichuan Israel-ho pung khawm zawng zawng chuan tlai lamah an talh tur a ni.

⁷Tin, a thisen chu an la ang a, an eina tur in kawngka biang pahnihah leh kawngka lu chungah an tat tur a ni.

⁸Tin, chu mi zan chuan a sa chu rawh se la, chhang dawidim telh loh nen ei rawh se; hnim kha nen an ei tur a a ni.

⁹Tin, a helin ei suh se la, tui pawhin chhum hauh suh se la, a rawhin rawh zawk rawh se, a lu leh a ke chawpin, a kawchhung nen.

¹⁰Tin, atuk atan chuan engmah in dah tur a ni lo a; atuk thlenga a bang la awm chu meiah in rawh ral tur a ni.

¹¹Tin, hetiangin in ei tur a ni; in puan vengin, pheikhawk bunin, tiang kengin; tin, hmanhmawh takin in ei tur a ni; LALPA kalhlen a ni dawn si a.

¹²Chu mi zan chuan Aigupta ram chhung chu ka fang dawn si a, Aigupta rama fa tir zawng zawng, mi leh sa chu ka tihlum ang a; Aigupta rama pathian zawng zawngte chu an ro ka relsak ang: LALPA ka nih hi.

¹³Tin, thisen chu un tan in awmna inchhinchhiahna a ni anfg a; tin, thisen chu ka hmuh chuan ka kal hlen ang che u a, tichuan Aigupta ram ka hrem hunah chuan nangmahni tiboraltu tur inchungah hri reng reng a lo leng lo ang.

¹⁴Tin, he mi ni hi in tan hriat rengna ni a ni ang a, LALPA tan kut niah in ruat tur a ni: in thlahte thlengin kumkhaw thuruat atana awm reng turin kut niah in hmang tur a ni.

¹⁵Ni sarih chhung chu chhang dawidim telh loh in ei tur a ni a: ni khat ni atang reng chuan in in chhung ata dawidim chu in thian fai vek tur a ni: tupawh ni khat ni thlenga chhang dawidim telh ei apiang chu, chu mi chu Israel-ho zing ata tihboral a ni ang.

¹⁶Tin, ni khat niah chuan inkohkhawmna thianghlim in nei ang a, tin, a ni sarih niin inkohkhawmna thianghlim a awm leh ang; mi tinin an mamawh ei tur buatsaih tih loh chu chu mi chhung chuan hna reng reng thawh hlek tur a ni lo, ei tur buatsaih chauh tihthian a ni ang.

¹⁷Tin, chhang dawidim telh loh kut ni chu in serh tur a ni, chu mi ni ngei chuan Aigupta ram ata in mipuihote chu ka hruai chhuak si che u a: chuvangin in thlahte thlengin kumkhaw thuruat atana awm reng turin chu mi ni chu in serh tur a ni.

¹⁸Thla khatna, chu mi thla ni sawm leh ni li ni, tlai lamah chuan chhang dawidim telh loh chu in ei ang a, chu mi thla ni sawmhnih leh ni khat ni tlai tlengin.

¹⁹Ni sarih chhung chu in in chhungah reng reng dawidim a awm tur a ni lo a; tupawh dawidim telh ei apiang chu, chu mi chu hnam dang pawh, in rama piang pawh ni se la, Israel-ho pung khawm zing ata hi tihboral tur a ni ang.

²⁰Dawidim telh reng reng chu in ei tur a ni lo a: in chenna hmun apiangah chuan chhang dawidim telh loh in ei tur a ni,' tiin sawi ang che," tiin.

²¹Tin, Mosia'n Israel upaho zawng zawng chu a koh khawmtir a, tin, an hnenah, "chhungkaw tinin beram notete chu va la chhuak ta u la, kalhlunna tur talh rawh u.

²²Tin, husop kau in la ang a, tin, maihuna thisenah chuan in zu hnim ang a, tin, kawngka luchungah leh kawngka biang pahnihah chuan maihuna thisen chu tat ang che u; tin, khawvar hma loh chuan tumah mahni in ata in chhuak tur a ni lo a.

²³LALPA chu Aigupta mite tihlum turin a lo kal tlang dawn si a; tichuan kawngka lu Chung leh kawngka biang pahniha thisen kai a hmuh chuan LALPA chuan kawngka chu a kal hlen ang a, in in chhungah chuan nangmahni tihlum turin tiboraltu chu a rawn luhtir lo ang.

²⁴Tin, hetiang hian nangmah leh i fate tana kumkhuaa thuruat awm reng turin in rawn ti thin tur a ni.

²⁵Tin, heti hi a ni ang a, LALPA'n pek a lo tiam tawh anga a pek che u ram chu in thlen hunin he rawngbawlna hi in zawm tur a ni.

²⁶Tin, heti hi a ni ang a, in faten in hnena, 'He rawngbawlna awmzia hi eng tihna nge ni ngai le?' an rawn tih chuan,

²⁷nangnin, 'Hei hi LALPA kalhlen inthawina a nih, ani chuna Aigupta mite a tihhlum lai khan kan inte chu a rawn zuah a, Aigupta rama Israela thlahte in chu a rawn kal hlen a ni,' in la ti dawn nia," a ti a. Tin, mipuite chu an lu an kun a, chibai an buk ta a.

²⁸Tin, Israela thlahte chu an kal a, chutiang chuan an ti a; LALPA'n Mosia leh Arona thu a pek ang chuan an ti ta a.

²⁹Tin, heti hi a ni a, zan laiah chuan LALPA chuan Aigupta rama fa tir zawng zawng lalthutphaha thu Pharaoa fa tir atanga rip chhunga tang fa tir lamin a zuk tihlum ta vek a, ran piang hmasa ber zawng zawngte nen.

³⁰Tin, Pharaoa chu amah leh a chhiahhlawh zawng zawngte leh Aigupta mi zawng zawngte nen zanah chuan an tho ta a; tin, Aigupta ramah chuan tahna nasa tak a awm a; mitthi awm lohna in reng reng pakhat mah a awm si lo a.

³¹Tin, Mosia leh Arona chu a zan a zanin a kohtir a, "Tho u la, ka miteho zing ata hi chhuak rawh u, nangmahni leh Israela thlahteho nen hian; tin, kal u la, in sawi ang khan LALPA rawng chu va bawl tawh u.

³²In sawi ang khan in beram rualte leh in sebawng rualte pawh chu kalpui rawh u; kal tawh u; tin, kei pawh mal mi sawm ve bawk rawh u," a ti a.

³³Tin, Aigupta mite chuan zan chu mi ram ata chu hmanhmawh taka tir chhuak turin mite chu an tur ta chhen a; "Kan thi vek a ni ta mai," an ti a.

³⁴Tin, mite chuan an chhang hmehte chu dawidim an telh hmain an la a, an chhang hmehna thlengte chu an puanin an tuam a, an kokiah an bat ta mai a.

³⁵Tin, Israela thlahte chuan Mosia thu ang chuan an ti a; tin, Aigupta mite chu tangkaraw incheinate leh rangkachak incheinate leh, puante an dil a:

³⁶tin, LALPA chuan mite chu Aigupta mite a khawngaihtir a, chutichuan an dil apiang an neihtir zel a. Tin, Aigupta mite thil chu an rawksak ta a.

³⁷Tin, Israela thlahte chu Rameses khua ata an chhuak a, Sukoth hmun thlengin an kal ta a, naupangte tiam lohin, mipa puitling hlir nuairuk lai kein an kal a.

³⁸Tin, an hnenah chuan mipui inpawlhsawp tam tak an kal ve bawk a; tin, ran rual tam tak, beram leh bawngte an chhawm bawk a.

³⁹Tin, Aigupta ram ata an ken chhuah chhang hmeh hmangin chhang, dawidim telh lohte chu an ur a, dawidim telh loh a ni si a; Aigupta ram chu hnawh chhuaha an awm avang leh, an awm rei theih tak loh a, ei tur takngial pawh an inbuatsaih hman tak loh avangin.

⁴⁰Tichuan Israela thlahte Aigupta rama an awm chhung chu, kum 430 a ni.

⁴¹Tin, heti hi a ni a, kum 430 a lo ral chuan, chu mi ni ngei chuan heti hi a ni a, LALPA mipuiho zawng zawngte chu Aigupta ram ata an chhuak ta a.

⁴²Chu mi zan chuan Aigupta ram ata anmahni a hruai chhuah avangin LALPA tana zan serh tak ni tur a ni a: Israela thlahte zawng zawngin chhuan zawng zawng thlengin chu zan chu LALPA zan atan serh hle tur a ni.

⁴³Tin, LALPA'n Mosia leh Arona hnenah, "Hei hi kalhlen thuruat dan tur a ni ang: hnam dang chuan an ei ve tur a ni lo a:

⁴⁴amaherawhchu miin a chhiahhlawh, tangkaa a lei tawhate chu a serh i tansak tawh phawt chuan a ei ve thei ang.

⁴⁵Hnam dang leh chhiahhlawh rawihte erawh chuan an ei tur a ni lo a.

⁴⁶In khatah ei tur a ni; pawn lamah a sa reng reng ken chhuah tur a ni lo; a ruh reng reng pawh in titliak tur a ni lo e.

⁴⁷Israel-ho zawng zawngin an zawm tur a ni.

⁴⁸Tin, hnam dang in hnena awm hian LALPA kalhlen hi tih ve a duh chuan, a mipa zawng zawngte serh tan ni se la, tichuan rawn ti ve rawh se; ani chu chu mi rama piang anga ngaih a ni ang: amaherawhchu serhtan loh mi chuan a ei hauh tur a ni lo.

⁴⁹Chu mi rama piang leh, hnam dang in zinga awmte tan hian dan angkhat a awm tur a ni," a ti a.

⁵⁰Israela thlahte zawng zawng chuan chutiang chuan an ti a, LALPA'n Mosia leh Arona thu a pek ang ngei chuan an ti ta a.Tin, heti hi a ni a, chu mi ni ngei chuan LALPA'n Israela thlahte chu Aigupta ram ata mipuiho chu a hruai chhuak ta a ni.

⁵¹Tin, heti hi a ni a, chu mi ni ngei chuan LALPA'n Israela thlahte chu Aigupta ram ata mipuiho chu a hruai chhuak ta a ni.