Read Baibul, Mizo Exodus 13 Bible Online

Exodus 13 - Baibul, Mizo bible

Exodus 13

¹Tin, LALPA'n Mosia a bia a,

²Israela thlahte zinga fa tir zawng chhul keu hmasa ber apiang, mihring pawh sa pawh ka tan serhah in ruat tur a ni; ka ta a ni e," tiin.

³Tin, Mosia'n mipuite hnenah chuan, "Vawiin ni, Aigupta ram ata, bawih ata in chhuah ni hi hre reng ang che u; kut chak takin LALPA'n he mi hmun ata hi a hruai chhuah che u hi: chhang dawidim telh reng reng chu ei tur a ni lo e.

⁴Abib thla, vawiin ni hian in chhuak a ni.

⁵Tin, heti hi a ni ang a, LALPA'n Kanaan-hote, Hit-hote, Amor-hote, Hiv-hote,Jebus-hote ram, khawizu leh hnutetuia luanna ram, in thlahtute chhechhama pek a tiamah khan a hruai thlen hunah che u chuan, he mi thla hian he rawngbawlna hi in zawm tur a ni.

⁶Ni sarih chhung chu chhang dawidim telh loh in ei tur a ni a, tin, a ni sarih ni chu LALPA tan kut ni a ni ang.

⁷Ni sarih chhung chuan chhang dawidim telh reng reng chu a awmin awm hlek suh se, in awmna hmunah reng reng dawidim pawh a awmin awm hlek suh se.

⁸Chu mi niah chuan in fate hnenah, 'Aigupta ram ata kan lo chhuah lai khan LALPA'n thil min lo tihsak vang a ni e,' tiin in hrilh tur a ni e.

⁹LALPA dan chu in kaa a awm reng theih nan, in kutah in tan chhinchhiahna leh in mit inkarah hian hriat rengna tur a ni ang: Kut chak takin LALPA'n Aigupta ram ata a hruai chhuah che u hi.

¹⁰Chutichuan he thuruat hi kum tin a hun takah chuan in rawn zawm thin tur a ni.

¹¹Tin, heti hi a ni ang a, LALPA'n in hnenah leh in thlahtute hnena chhechhama pek a tiam tawh che u anga, Kanaan-hote rama a hruai thlen che u a, a pek hun che u chuan,

¹²chhul keu hmasa ber apiang leh in ran piang thla hmasa ber apiang chu LALPA tan in dah hrang zel tur a ni; a pate chu LALPA ta tur a ni ang.

¹³Sabengtung piang hmasa ber apiang chu beram noin in tlan tur a ni ang. In tlan duh loh erawh chuan a nghawng chu in titliak tur a ni: tin, in fate zinga mipa piang hmasa ber apiang chu in tlan tur a ni.

¹⁴Tin, heti hi a ni ang a, nakin lamah te in faten, "Hei engtizia nge ni le?' tia an la rawn zawh hun che u chuan nangnin an hnenah, 'Kut chak takin LALPA'n Aigupta ram ata bawiha kan awm kha min hruai chhuak a ni:

¹⁵tin, heti hi a ni a, Pharaoan kan chhuah thu a tihkhirh em avangin, LALPA'n Aigupta rama fa tir zawng zawng, mihring fa tir apiang leh ran piang hmasa ber apiang chu, a tihlum vek a: chuvangin a pa, chhul keu hmasa ber apiang hian LALPA hnenah kan inthawi a nih hi: amaherawhchu kan fapate zinga fa tir zawng zawngte chu kan tlan a ni,'ti ang che u.

¹⁶Tin, in kutah in tan chhinchhiahna a ni ang: in mit leh mit inkara chalhrennate nen: kut chak takin LALPA'n Aigupta ram ata min hruai chhuak ta si a," a ti a.

¹⁷Tin, heti hi a ni a, Pharaoa mite chu a chhuahtir phal veleh chuan, Pathianin Philistia-ho ram lamah chuan a hnai zawk nain a hruai lo a; Pathianin, "Indonate an hmuhin an inchhir ang a, Aigupta ramah an kir leh hlauh dah ang e," a ti si a:

¹⁸amaherawhchu Pathianin mite chu Tuifinriat Sen lam panin thlaler lamah a hruai kikawi ta zawk a: tin, Israela thlahte chu Aigupta ram ata chu inralring rengin an chhuak ta a.

¹⁹Tin, Mosia'n Josefa ruhte chu a chhawm a: Israelaa thlahte khka, "Pathianin a la rawn kan ngei ngei ang che u a; tin, ka ruhte hi heta ta in zawn chho tur a ni," tiin chhia a lo chhamtir tlat si a.

²⁰Tin, Sukoth hmun ata chu an chhuak a, thlaler tawntirh Etham hmunah an riak a;

²¹Tin, LALPA'n chhun laiah chuan chhum dingin an hma a hruai a; tin, zanah chuan anmahni en turin meialh dingin an hma a hruai a; chhun leh zan an kal theih zelna turin:chhuna chhum ding leh zana meialh ding chuan mipui chu a kalsan ngai hauh lo a ni.

²²chhuna chhum ding leh zana meialh ding chuan mipui chu a kalsan ngai hauh lo a ni.