Read Baibul, Mizo Exodus 14 Bible Online

Exodus 14 - Baibul, Mizo bible

Exodus 14

¹Tin, LALPA'n Mosia a bia a,

²Israela thlahte hnenah hian thu sawi rawh khai, kir leh se la, Migdol hmun leh tuipui inkar Pi-hahiroth hmun bul, Baal-Zephon hmun bulah chuan riak rawh se: chu mi dep tuipui kamah chuan riak rawh u.

³Tichuan Pharaoan Israela thlahte chungchang thu-ah, 'Ram lakah an mangang ta zet le, thlalerah an tang ta,' a ti ang a.

⁴Tin, keiin Pharaoa thinlung chu ka tihkhauhsak ang a, tichuan anmahni chu a um ang a; tin, keiin Pharaoa lakah leh a sipaiho zawng zawng lakah chuan chawimawina chu ka hlawh ang; tichuan Aigupta miten kei hi LALPA chu ka ni tih an hria ang," tiin. Tin, chutiang chuang an ti a.

⁵Tin, mite chu an tlan bo zo ta tih Aigupta lal chu an hrilh a: tin, Pharaoa thinlung leh a chhiahhlawhte thinlung chu a lamlet leh ta a, tichuan, "Israel mite kan rawngbawl lai kan chhuahtir ta ngawt mai hi engtiziaa hetianga ti ta nge maw kan nih chu le?" an ti ta a.

⁶Tin, an tawlailir an buatsaih a, tin, mite chu a hnenah a hruai a:

⁷tin, tawlailir zaruk tha thiau leh Aigupta rama tawlailir zawng zawng, an zaa chunga hotute nen a hruai ta a.

⁸Tin, LALPA'n Aigupta ram lal Pharaoa thinlung chu a tihkhauhsak a, tin, Israela thlahte chu a um ta a: Israel thlahte lah chu induh takin an chhuak a ni si a.

⁹Tin, Aigupta mite chuan sakawr zawng zawng leh Pharaoa tawlailir leh a sakawr chung chuang mite leh a sipaihote nen chuan an um a, tin, Pi-hahiroth hmun bul, Baal-Zephon hmun depa tuipui kama an riak chu an va umpha ta a.

¹⁰Tin, Pharaoan a va pan hnaih chuan Israela thlahte chu an han dak a, tin, ngai teh, Aigupta mite chuan an lam chu an pan phei ta a: tichuan an lo hlau ta em em mai a: tin, Israela thlahte chuan LALPA chu an au ta a.

¹¹Tin, Mosia hnenah, "Aigupta ramah khan thlan a awm loh avangin em ni thlalerah hian thi tura min hruai chhuah ni? eng vangin nge ni hetianga min ti tura Aigupta tam ata min hruai chhuah ni?

¹²Aigupta ramah pawh khan, 'Aigupta mite rawngbawl hian kan awm mai ang,' tiin i hnenah khan kan sawi reng lo em ni? thlalera thih tlaw ngawt mai te ai chuan Aigupta mite rawng kha lo bawl ta i la a that zawk dawn hi," an ti a.

¹³Tin, Mosia'n mipuite hnenah chuan, "Hlau suh u, awm hle hle mai u la, LALPA chhandamna, vawiina a thawhsak tur che u hi en ngawt mai rawh u, vawiina Aigupta mi in hmuhate hi kumkhuain in hmu leh dawn tawh lo e.

¹⁴LALPA'n a dosak ang che u a, nangni chu in awm hle hle mai ang," a ti a.

¹⁵Tin, LALPA'n Mosia hnenah chuan, "eng vangin nge maw mi auh le? Israela thlahte hi kal zel turin hrilh ta che.

¹⁶Tin, nang pawhin i tiang kha han la la, tin, tuipui chungah khan lek la, tui chu lo inthen rawh se: tichuan tuipui chhung lei charah Israela thlahte chu an kal ang.

¹⁷Tin, keiin, ngai teh, Aigupta mite thinlung chu ka tihkhauhsak ang a, tichuan an um zel ang: tin, Pharaoa lakah leh a sipaiteho zawng zawng lakah leh a tawlailirte lakah a sakawr chung chuang mite lakah chuan chawimawina chu ka hlawh ang.

¹⁸Tin, Pharaoa lakah leh, a tawlailirte lakah leh a sakawr chung chuang mite laka chawimawina ka hlawh hunah chuan Aigupta miten kei hi LALPA chu ka ni tih an hria ang," a ti a.

¹⁹Tin, Pathian vantirhkoh, Israela mite hma hruai thin kha an hnung lamah a insawn ta a; tin, chhum ding kha an hma lam ata a insawn a, an hnung lamah a ding ta a:

²⁰tin, Aigupta mite leh Israel mite inkarah a lo tla ta a, tichuan chhum chu a lo awm a, a thim bawk a, amaherawhchu chhum chuan zan chu a tieng a: tin, zankhuain a tu lam mah mah an inpan lo a.

²¹Tin, Mosia'n tuipui chungah a kut a han phar a: tin, LALPA'n zankhuain khawchhak thli na takin a rawn thlehtir a, tuipui chu a nem kirtir a, tin, tuipui chu lei charah a chantir a, tin, tuite chu a lo inthen ta a.

²²Tin, Israela thlahte chu tuipui chhung lei charah chuan an kal ta a: tin, tuite chu an ding lampangah leh an vei lampangah chuan an tan bang a lo ni ta mai a.

²³Tin, Aigupta mite chuan an um a, Pharaoa sakawr zawng zawngte leh a tawlailirte leh a sakawr chung chuang mite chuan tuipui chhungah chuan an um lut ta a.

²⁴Tin, heti hi a ni a, khawfing chah veleh, LALPA'n Aigupta mite chu meialh ding leh chhum dingah chuan a zuk timangang ta a.

²⁵An tawlailir kete chu a thlawnsak a, an khalh chak thei ta l o a; chutichuan Aigupta mite chuan, "Israel-hote hi i tlansan ang u; LALPA'n an lama tangin he mite hi Aigupta mite a dopui a nih hi," an ti ta a.

²⁶Tin, LALPA'n Mosia hnenah, "Aigupta mite, an tawlailirte, an sakawr chung chuang mite chu tuiin a rawn chim leh theihna turin i kut kha tuipui chungah han phar rawh khai," a ti a.

²⁷Tin, Mosia'n tuipui chungah chuan a kut chu a han phar a, tin, khua a var veleh chuan tuipui chu a luan pangngaiin a luang leh ta a; tin, Aigupta mite chu an tlan kir leh a; tin, LALPA'n Aigupta mite chu tuipui chhungah chuan a paih thla ta a.

²⁸Tin, tuite chu a luang leh ta a, tichuan tawlailirte leh sakawr chung chuang mite, tuipuia um luttu, Pharaoa sipaiho zawng zawngte lam chuan tuiin a chim pil ta vek a; pakhat mah chhuak reng reng an awm hauh lo mai a.

²⁹Israela thlahte erawh chu tuipui chhung lei charah chuan an kal vek a; tin, tuite chu an ding lampangah leh an vei lampangah chuan an tan bang a lo ni ta mai a.

³⁰Chutiang chuan a ni, LALPA'n Israel-hote chu, chu mi ni chuan Aigupta mite kut ata a chhanchhuah ni; tin, Israel-hote chuan Aigupta mi thite chu tuipui kamah chuan an hmu a.Tin, Israel-hote chuan LALPA'n Aigupta mite chunga thil ropui tak a tih chu an hmu a, tin, mipuite chuan LALPA chu an tih a: tichuan LALPA leh a chhiahhlawh Mosia chu an ring ta a.

³¹Tin, Israel-hote chuan LALPA'n Aigupta mite chunga thil ropui tak a tih chu an hmu a, tin, mipuite chuan LALPA chu an tih a: tichuan LALPA leh a chhiahhlawh Mosia chu an ring ta a.