Read Baibul, Mizo Exodus 15 Bible Online

Exodus 15 - Baibul, Mizo bible

Exodus 15

¹Chutichuan Mosia leh Israela thlahte chuan LALPA chawimawiin he hla hi an sa a, an sawi dual dual a, "LALPA chawimawiin hla ka sa ang, ropui takin a hneh tak hi: Sakawr leh a chunga chuang chu tuipuiah a paih thla ta a.

²LALPA chu ka chakna leh ka hla a ni, Ani chu ka chhandamna a lo ni ta bawk a: Ka Pathian a ni a, amah chu ka fak ang; Ka pa Pathian a ni a, amah chu ka chawimawiang.

³LALPA chu indo mi a ni: A hming pawh LALPA a ni.

⁴Pharaoa tawlailirte leh a sipaihote chu tuipuiah a paih thla ta a: Tin, a sipai hotu thlante pawh Tuifinriat Senah an tlahlum zo ta.

⁵Tui thuk takin a chim zo ta: Lung angin tui thuk takah an pil ta.

⁶I kut ding lam chu, aw LALPA, thiltihtheihnain a ropui a, i kut ding lam chuan, aw LALPA, hmelma chu a tisawm ta dep a.

⁷I ropuina nasa tak chuan nangmah dotute chu i tiboral vek a: i thinrim i rawn hrithla a, buhpawl ang maiin an kangral zo ta a.

⁸I hnara thawin tuite chu a lo in tiang a, Tuite chu englo dah khawm thur angin a ding luah a: Tuifinriat chhung daiha tui thuk takte chu a lo khal zo ta a,

⁹Hmelma chuan, 'Ka um ang a, ka umphak ngei ang, rallak sum chu ka sem ang: Anmahniah chuan ka chak daih ka hmu tawh ang: Ka khandaih ka phawi ang a, ka kutin anmahni chu ka tiboral ang,' a ti a.

¹⁰I thli chu i han tlehtir ta mai a, tuifinriatin a chim pil ta vek a: Tui thuk takahte chuan suan angin an pil ta vang vang a.

¹¹Aw LALPA, pathiante zingah hian nang ang hi tu nge awm le? Thianghlimna lama ropui leh, Fak tlak nihna lama zahawm leh, thilmakte ti thin hi nang ang tu nge awm le?

¹²Nangin i kut ding lam i han phar a, Leiin anmahni chu a lem zo ta a.

¹³Nangin i khawngaihnain mipui i tlante kha i hruai a: I chenna thianghlimah chuan i chaknain i hruai ta a.

¹⁴Mi tinrengin an hria a, an khur thlu zo a, Philistia rama chengte chu thlaphannain a man ta.

¹⁵Tichuan Edom rama hotute chuan mak an ti hle a; Moab mi chakte chu khurhnain a rawn man a: Kanaan rama awm zawng zawngte chu an tui zo ta a.

¹⁶Tihna leh hlauhnain a tlakbuak a; I ban chaknain lung ang maiin a tingawi hle hle a; Aw LALPA, i mite an kai vek hma loh chuan, Mi i leite an kai vek hma loh chuan.

¹⁷Nangin anmahni chu i hruai lut ang a, i roluahtu tlangah chuan i phun ang, Aw LALPA, nangin i awmna tura hmun i buatsaihah chuan, Aw LALPA, hmun thianghlim i kut ngeiin a lo dinnaah chuan,

¹⁸LALPA chuan chatuanin ro a rel tawh ang," tiin.

¹⁹Pharaoa sakawrte chu a tawlailirte chawpin a sakawr chung chuang mite nen chuan tuipuiah an lut thla a, tin, LALPA'n tuifinriat tuite chuang a rawn vur leh ta a; Israela thlahte erawh chu tuipui chhung leicharah chuan an kal vek a.

²⁰Tin, zawlnei Miriami, Arona farnuin khuangte a keng a; tin, hmeichhia zawng zawngin khuangte kenga lamin an zui chhuak ve ta hlawm a.

²¹Tin, Miriami chuan "LALPA chawimawiin hla sa rawh u, ropui takin a hneh tak hi; Sakawr leh a chunga chuang chawpin tuipuiah a paih thla ta a," tiin hlain a hruai a.

²²Tichuan Mosia'n Israel-hote chu Tuifinriat Sen ata a hruai chhuak a, Sur thlaler lam panin an chhuak ta a; tin, thlalerah chuan ni thum zet an kal a, tui an hmu zo ta lo a.

²³Tin, Mara hmun an va thleng a, Mara hmuna tuite chu a lo khak avang chuan an in thei lo a: chuvang chuan a hmingah Mara vuah a ni.

²⁴Tichuan, mipuite chuan, "Engnge ni kan in dawn le?" tiin Mosia chungah an phunnawi ta a.

²⁵Tin, ani chuan LALPA chu a au a; tin, LALPA chuan thing pakhat hi a han kawhhmuh a, chu chu tuiah chuan a zuk paih lut a, tichuan tui chu a lo tui ta a. Chutah chuan chuan thuruat leh rorelna a siamsak a; chutah chuan anmahni fiahna a siam a;

²⁶LALPA i Pathian aw hi ngun taka i ngaihthlak a, a mithmuha tha a tih zawngte i tih a, a thupekte i ngaihsan a, a thuruat zawng zawngte i pawm chuan Aigupta mite chunga hri ka lentir tak angte kha i chungah reng reng ka lentir ve lo vang: LALPA a tidamtu che ka nih hi," a ti a.Tin, Elim hmun an va thleng a, chutah chuan tuihna nei sawm leh pahnih leh tum thing sawmsarih a awm a; tin, chuta tui kamahte chuan an riak ta a.

²⁷Tin, Elim hmun an va thleng a, chutah chuan tuihna nei sawm leh pahnih leh tum thing sawmsarih a awm a; tin, chuta tui kamahte chuan an riak ta a.