Read Baibul, Mizo Exodus 19 Bible Online

Exodus 19 - Baibul, Mizo bible

Exodus 19

¹Israela thlahte Aigupta ram ata an chhuah achin a thla thumna, chu mi ni tak chuan Sinai thlaler an thleng a.

²Rephidim hmun ata an chhuah a, Sinai thlaler an va thlen chuan thlalerah chuan an riak a; chutah chuan Israel-hote chu tlang bulah chuan an riak a.

³Tin, Mosia chu Pathian hnenah a han chho a, tichuan LALPA chuan tlang atangin a bia a, a hnenah, "Jakoba chhungte hnenah hetiang hian ti la; tin, Israela thlahte hnenah pawh,

⁴'Aigupta-hote chunga ka tiziate leh, mupui thlaa ka put che u a, ka hnena ka hruai thlenzia che u hi in hmu a.

⁵Chuvangin ka thu in ngaihthlak tak zet a, ka thuthlung hi in pawm chuan khawvel hnam zawng zawng zingah hian ka tan ro thlan bik in ni ang: khawvel pum pui hi ka ta a ni si a:

⁶tichuan ka tan puithiam chi, hnam thianghlim in ni ang,' tiin hrilh ang che. Heng thu hi Israela thlahte hnena i sawi tur chu a ni," a ti a.

⁷Tin, Mosia'n mipui zinga upahote chu a rawn ko khawm a, LALPA thupek zawng zawngte chu a hrilh vek a.

⁸Tin, mipuiteho zawng zawng chuan, "LALPA sawi ang zawng zawngte chu kan ti zel ang e," tiin, arualin an chhang dual dual a. Tichuan Mosia'n mipuite thusawi chu LALPA a hrilh leh chhawng a.

⁹Tin, LALPA chuan Mosia hnenah, "Ngai teh, ka biak lai tak che mipuiin an hriat ve theih a, kumkhuaa i thu chu an awih fona turin chhum chhah mupah i hnenah ka lo kal dawn e," a ti a. Tichuan Mosia'n mipuite thusawi chu LALPA a hrilh leh chhawng a.

¹⁰Tin, LALPA'n Mosia hnenah, "Mipuiho hnenah va kal la, vawiin leh naktuk hian anmahni chu tithianghlim ang che, an puante sufai se la,

¹¹a ni thum ni atan inpuahchah rawh se: a ni thum ni chuan mipuiho zawng zawng mithmuhah Sinai tlangan chuan LALPA a lo chhuk dawn e.

¹²An hnenah, 'Fimkhur u la, tlangah khian han lawn hauh suh u la, tlang hmawr pawh han dek hlek suh ang che u: tupawh tlang han dek apiang chu tihhlum ngei ngei tur a ni ang:

¹³kut reng rengin deh tur a ni lo a, lunga denhlum ngei ngei tur a ni, a nih loh leh, kah tlang tur a ni ang; sa pawh mihring pawh a nung lo ang: tawtawrawt a rik ruai ruai hunah chuan tlangah khian an lawn chho tur a ni, a ti,' tiin mipuiho tan ri khamsak ang che," a ti a.

¹⁴Chutichuan Mosia chu tlang ata mipuiho zingah chuan a lo chhuk a, mipuite chu a tithianghlim a; tin, an puante an su fai a.

¹⁵Tin, mipuihote hnenah chuan, "A ni thum ni atan chuan inpuahchah rawh u: hmeichhe kiangah reng reng kal suh u," a ti a.

¹⁶Tin, heti hi a ni a, a ni thum ni zingah chuan khawpuite a lo ri a, kawlte a lo phe a, tlang chhipah chuan chhum a lo zing chhah mup a, tawtawrawt ring em em maiin a lo ri a; tichuan mipui riahhmuna awmho zawng zawng chu an khur a.

¹⁷Tichuan Mosia'n mipuiho chu Pathian han be turin riahhmun ata chu a hruai chhuak hlawm a; tlang bulah chuan an ding a.

¹⁸Tin, Sinai tlangah chuan LALPA chu meia a lo chhuk avangin a khu phui ta mup a: tin, chu mi meikhu chu rawhtuina meikhu ang maiin a khu chho ngut ngut a, tichuan tlang pum pui chu a nghing dur dur a.

¹⁹Tin, tawtawrawt ri chu a ring telh telh a, Mosia chuan thu a han sawi a, Pathian awin a lo chhang a.

²⁰Tichuan LALPA chu Sinai tlang, tlang chhipah chuan a lo chhuk a: tin, LALPA chuan Mosia chu tlang chhipah a ko chho a; tichuan Mosia chu a han chho a.

²¹Tin, LALPA chuan Mosia hnenah, "Zuk chhuk langin, mipuite khu zuk zilh rawh, chutilozawng LALPA hmel hmuh tumin an lo lut tlang mai ang e, mi tam tak an boral mai tur a nia.

²²Tin, Puithiamho, LALPA kianga lo kal vete pawh chu intithianghlim ve rawh se, chutilozawng anchungah LALPA chu a tuan mai ang," a ti a.

²³Tin, Mosia'n LALPA hnenah, "Mipuiho hi Sinai tlangah hian an lo chho thei hlei nem: nangin, 'Tlang velah hian ri khamsak u la, tithianghlim ang che u,' tiin, nangmah ngeiin thu min tiam alawm," a ti a.

²⁴Tin, LALPA'n a hnenah, "Kal la, zuk chhuk tawh; tin, Arona nen lo chho leh ang che u: amaherawhchu puithiamho leh mipuiho chu LALPA hnena lo kal tumin lo lut tlang mai suh se chutilozawng an chungah a tuan mai tur a nia," a ti a.Chutichuan Mosia chu mipuite hnenah chuan a zuk kal a, chung thu chu a zuk hrilh a.

²⁵Chutichuan Mosia chu mipuite hnenah chuan a zuk kal a, chung thu chu a zuk hrilh a.