Read Baibul, Mizo Exodus 2 Bible Online

Exodus 2 - Baibul, Mizo bible

Exodus 2

¹Tin, mi pakhat, Levia chhungte zinga mi a va chhuak a, Levia fanu nupuiah a va nei a.

²Tin, hmeichhia chu a rai a, tin, fapa a hring a: tin ani chuan naute chu hmel tha a ti em a, thla thum a thukru a.

³Tin, a lo thukru reng thei ta lo a, a tan luang lawng a la a, chu chu chirh leh alkatra-in a char a, tin, naute chu chutah chuan a muttir a, tichuan lui kama phairuang zingah chuan a dah ta a.

⁴Tin, a chungah eng tak la thleng ang maw tia hriat tumin a farnu chu hla feah a ding a.

⁵Tin, Pharaoa fanu chu luia inbual turin a zu kal a; tin, a bawihnute chu lui kamah chuan an kal ve a; tin, phairuang zinga bawm a han hmuh chuan a bawihnu a va laktir a.

⁶Tin, a han hawn chuan naute chu a hmu ta a: tin, ngai teh, nausen chu a tap ta a. Tin, a khawngaih ta em em a, "Hei Hebrai fa a nih hi le," a ti a.

⁷Tichuan a farnu chuan Pharaoa fanu hnenah chuan, "He naute awmsaktu tur che Hebrai hmeichhia nau awmtu ka kohsak ang che chu?" a ti a.

⁸Tin, Pharaoa fanu chuan a hnenah, "Kal rawh," a ti a. Tin, nula chu a kal a, chu nausen nu chu a ko ta a.

⁹Tin, Pharaoa fanu chuan a hnenah, "He naute hi kalpui ta la, mi awmsak ang che, tichuan i hlawh ka pe ang che," a ti a. Chutichuan hmeichhia chuan naute chu a la a, a pawm ta a.

¹⁰Tin, naute chu a lo thang lian a, Pharaoa fanu hnenah a hruai a, tichuan a fapaah a awm ta a. Tin, "Tui ata ka lak chhuah avangin," a ti a, a hmingah chuan Mosia a sa a.

¹¹Tin, heti hi a ni a, chung laia Mosia a lo puitlin chuan, a unaute a va kan a, an phurritte chu a va hmu a: tin, Aigupta mi pakhat hian a unau pakhat Hebrai mi hi a vaw lai a han hmu a.

¹²Tin, Mosia chu a hawi vel ruai a, tin, tumah an awm lo tih a hriat veleh, Aigupta mi chu a vawhlum a, leiah a phum ta a.

¹³Tin, atukah a va chhuak leh a, tin, ngai teh, Hebrai mi pahnih an lo insual a: tin, a thiam lo zawka hnenah chuan, "Engati nge i thian i vuak le?" a ti a.

¹⁴Tin, ani chuan, "Kan chungah hotuah leh roreltuah tuin nge siam che? Aigupta mi i tihhlum ang khan mi tihhlum i tum elo?" a ti a. Tin, Mosia chuan a hlau ta a, "An hre ta ngei zuk nia le" a ti a.

¹⁵Tichuan Pharaoan chu chu a lo hriat veleh, Mosia chu thah a tum ta a. Nimahsela Mosia chu Pharaoa hnen ata a tlan bo a, Midian ramah a awm ta a: tin, tuichhunchhuah sirah hian a thu a.

¹⁶Tin, Midian rama puithiam chuan fanu pasarih a nei a: tin, anni chuan tui an rawn chawi a, an pa beram rual in turin tui inna thlengte chu an tikhat a.

¹⁷Tin, beram vengtute an lo kal a, an rawn hnawt darh a: nimahsela Mosia chu a tho a, anmahni chu a rawn tanpui a, an beram rual chu tui a intir ta a.

¹⁸Tin, an pa Reuela hnen an va thlenin ani chuan, "Engtizia nge vawiin chu in va lo haw hma ve le?" a ti a.

¹⁹Tin, anni chuan, "Aigupta mi pakhatin beram vengtute lak ata min chhanhim a ni, tin, chu chang ni loin, tui te min thalsak a, beram rual tui a intir a ni," an ti a.

²⁰Tin, ani chuan a fanute hnenah chuan, "Chu, khawiah nge a awm le? Eng tizia nge in rawn hawnsan mai ni le? Va ko ta che u, chaw te rawn ei ang hmiang," a ti a.

²¹Tin, Mosia chuan chu mi hnena awm chu rem a ti a: tin, a fanu Zipori chu Mosia a pe a.

²²Tin, fapa a hring a, tin, Mosia'n a hmingah Gersoma a sa a; "Mi rama pem ka nih avangin," a ti a ni.

²³Tin, heti hi a ni a, ni rei fe chinah chuan Aigupta lal chu a thi ta a: tin, Israela thlahte chu an hnathawh hautak avang chuan an rum a, tin, an au a, tichuan an hnathawh hautak avanga an au thawm chu Pathian hnena a han thleng ta a.

²⁴Tin, Pathianin an rum chu a hria a, tin, Pathianin Abrahama te, Isaaka te leh Jakoba te hnena a thuthlun kha a hre reng a.Tin, Pathian chuan Israela thlahte chu a thlir reng a, tichuan Pathian chuan anmahni chu a zuk ngaihsak reng bawk a.

²⁵Tin, Pathian chuan Israela thlahte chu a thlir reng a, tichuan Pathian chuan anmahni chu a zuk ngaihsak reng bawk a.