Read Baibul, Mizo Exodus 21 Bible Online

Exodus 21 - Baibul, Mizo bible

Exodus 21

¹Tichuan hengte hi a ni an hnena rorel dan tur i hriattir turte chu.

²Hebrai mi, chhiahhlawhah lo lei ang la, kum ruk rawng a bawl ang a: tin, a kum sarih kum chuan intlan lo pawhin a chhuak mai thei ang.

³Amah ngawta lo lut a nih chuan, amah ngawtin a chhuak leh mai ang: nupui nei a nih chuan a nupui pawh chu a chhuak tel ve bawk ang.

⁴A puin a nupui lo neihsak se la, tin, fanu emaw fapa emaw lo hrinsak se la; a nupui leh a fate chu a pu ta an ni ang a, anu erawh chu amah ngawtin a chhuak tur a ni.

⁵Amaherawhchu bawih chuan, ka pu te, ka nupui te, ka fate hi ka hmangaih em mai a; ka chhuak duh lo e, a tih tlat chuan,

⁶a puin Pathian hnenah hruai se la, kawngkaah emaw kawngka biangah emaw hruai sela; tin, a puin a beng chu thir zumin vit se la; tichuan kumkhuain a rawng a bawl tawh ang.

⁷Miin a fanu chu bawihnu atan hralh se la, chhiahhlawh mipate ang chuan a chhuak ve lo ang.

⁸A pu chuan a nupui atan lo hual se la, ani chuan a pu chu lo tilawm leh thei ta si lo se la, a intlantir leh tur a ni, a lo bum avang chuan hnam dangte hnena zawrh leh theihna a nei hlek lo ang.

⁹Tin, a fapa tana nupuia hualsak duh a nih chuan, fanute en ang bawkin a en tur a ni.

¹⁰Nupui dang lo nei leh mah se la, a ei tur sa te, a silhfen te, a nupui a nihna te kha a tihtlemchuansak tur a ni lo e.

¹¹Chu thil kawng thum chu a tih loh chuan tangka pe loin a chhuak mai thei ang.

¹²Tupawhin mi lo vua se la, chu mi chu thi ta se la, tihhlum ve ngei ngei tur a ni.

¹³Tin, miin tum reng vang ni lo a, Pathian chaltawhtir a nih erawh chuan, a tlan luhna tur hmun ka ruatsak ang che.

¹⁴Amaherawhchu miin tum lui rengin a thenawm chu fin vervekin thah tum se la, thi turin ka maicham ata chu hruai ang che.

¹⁵Tupawh a nu emaw a pa emaw vua apiang chu tihhlum ngei tur a ni.

¹⁶Tupawh mihring ru-a zuar emaw, a la kawl lai ngei emaw an hmuh chuan, chu mi chu tihhlum ngei tur a ni.

¹⁷Tupawh a nu emaw, a pa emaw anchhia lawh apiang chu, tihhlum ngei tur a ni.

¹⁸Tin, mi lo inhnial se la, pakhat chuan lungtumin chhu se la emaw, a kuttumin chum sela emaw, thih chu thi lo se la, amaherawhchu khumbetin tluk phah se la,:

¹⁹lo tho leh theiin tiang hawlin lo kal leh thei se la, a kut thlaktua chu chhuah tur a ni: a hun sen hu kha erawh chu a rul ang a, a dam feltir viah tur a ni.

²⁰Tin, miin a chhiahhlawh emaw, a bawihnu emaw tiangin vua se la, a kutah chuan lo thi ta se la, amah chu hrem ngei tur a ni.

²¹Amaherawhchu ni khat emaw, ni hnih emaw dam se la, hrem tur a ni lo ang: a chhiahhlawh chu a sum leh pai a ni si a.

²²Tin, mi lo insual ta se la, hmeichhe nau pai vaw palh ang se la, a nau pai chu lo tla se la, chhiatna dang erawh chu awm lo se la: chu hmeichhe pasal chuan a ngen zat chu chawitir ngei tur a ni; tichuan roreltute ruat ang zat chu a pe tur a ni.

²³Amaherawhchu chhiatna dang lo awm se la chuan nun aia nun,

²⁴mit aia mit, ha aia ha, kut aia kut, ke aia ke,

²⁵tihkan aia tihkan, hliam aia hliam, vuak aia vuak i tuattir tur a ni.

²⁶Tin, miin a chhiahhlawh mit emaw a bawihnu mit emaw vuain, lo tichhe ta se la, a mit avang chuan a chhuahtir tur a ni.

²⁷Tin, a bawihpa ha emaw, a bawihnu ha emaw lo vuak balsak se la, a ha avang chuan a chhuahtir tur a ni.

²⁸Tin, sebawngpain mipa emaw hmeichhia emaw lo sihlum ta se la, chu sebawngpa chu lunga denhlum ngei tur a ni a, tin, a sa chu ei tur a ni lo a; sebawngpa neitua erawh chu hrem loh tur a ni.

²⁹Amaherawhchu sebawngpa chuan tun hma pawhin mi sik lo hmang thin se la, tin, a neitu chu lo hriattir tawh bawk se la, nimahsela khung duh chuang loin, mipa emaw hmeichhia emaw lo sihlum ta se la, chu sebawngpa chu lunga denhlum tur a ni a, a neitu pawh chu tihhlum bawk tur a ni.

³⁰A tlana tlan turin lo tuk zawk se la erawh chuan a nunna aiah chuan an tuk zat apiang chu tlanna'n pek tur a ni.

³¹Mi fapa emaw, mi fanu emaw pawh lo sihlum ni se la, hetiang dan bawk hian rel tr a ni.

³²Sebawngpain bawihpa emaw, bawihnu emaw lo sihlum ta se la, an pu chu tangka sekel sawmthum a pe ang a, tin, sebawngpa chu lunga denhlum tur a ni ang.

³³Tin, miin khuarkhurum chhin lo hawng se la emaw, miin khuarkhurum lo siam se la emaw, lo chhin lo se la, sebawngpa emaw sabengtung emaw lo tla ta se la,

³⁴chu khuakhurum neitu chuan a rul tur a ni: ani chuan chung ran neitu chu tangka a pe ang a, tichuan anin ran thi chu a ruang a hlawm ang.

³⁵Tin, mi pakhat sebawngpain mi sebawngpa lo sihlum se la, sebawngpa dam zawka chu an zuar ang a, a man chu an insem ang: tin, a thia pawh chu an insem ang.Sebawngpa chuan tun hma pawhin mi sik lo hmang thin se la, tin, a neitu chuan khung duh si lo se la, sebawngpa aiah chuan sebawngpa vek chu a pe ngei ngei tur a ni a, tin, ran thi ruang chu a hlawm ang.

³⁶Sebawngpa chuan tun hma pawhin mi sik lo hmang thin se la, tin, a neitu chuan khung duh si lo se la, sebawngpa aiah chuan sebawngpa vek chu a pe ngei ngei tur a ni a, tin, ran thi ruang chu a hlawm ang.