Read Baibul, Mizo Exodus 26 Bible Online

Exodus 26 - Baibul, Mizo bible

Exodus 26

¹Tin, biak buk, puanzar sawm neiin i siam bawk tur a ni; la zai sin tak kawp, dum pawl te, sen duk te, sen lar te hmangin cherub lemte thiam taka siam chuantirin i siam tur a ni.

²Puanzar chu a sei lam tawng sawm hnih leh tawng riat theuh a ni ang a, puanzar chu a hlai lam tawng li theuh a ni ang: puanzar zawng zawng chu inchen vek tur a ni.

³Puanzar pangate chu inzawm tur a ni a; tin, puanzar panga vekte pawh chu inzawm bawk tur a ni.

⁴Tin, puanzar zawm khat hmawrtawng ber tlangah chuan a beng a dum pawlin i siam tur a ni a, chutiang bawkin puanzar zawm lehlam hmawrtawng ber tlangah chuan i siam bawk tur a ni.

⁵Puanzar pakhatah chuan beng sawmnga i siam tur a ni a, tin, zawm khat puanzar tlangah pawh chuan beng sawmnga i siam bawk tur a ni a; chung bengte chu a inep thiah tur a ni.

⁶Tin, rangkachak chilhbehnate sawmnga i siam tur a ni a, a chilhbehnate chuan puanzarte chu i chilh bet tur a ni a: tichuan biak buk chu pindan pakhat a lo ni tur a ni.

⁷Tin, biak buk chung khuhna'n kel hmul puanzarte i siam tur a ni: puanzar sawm leh pakhat i siam tur a ni.

⁸Puanzar chu a sei lam tawng sawmthum theuh a ni tur a ni a, tin, puanzar chu a hlai lam tawng li theuh a ni tur a ni: puanzar sawm leh pakhatte chu inchen vek tur a ni.

⁹Tin, puanzar pangate chu i thui zawm vek tur a ni a, tin, puanzar paruk pawh chu thui zawm bawk tur a ni a, puan in hma lama puanzar a parukna chuan a khuh tur a ni.

¹⁰Tin, puanzar zawm khat tlangah chuan beng sawmnga i siam tur a ni a, tin, puanzar zawm lehlam tlangah pawh chuan beng sawmnga siam bawk tur a ni

¹¹Tin, dar chilhbehna sawmnga i siam tur a ni a, tin, chu mi chilhbehna chu puan tlanga a bengah chuan vuah tur a ni a, puan in chu chilh zawm vek tur a ni; pindan pakhat a lo nih theih nan.

¹²Puan in puanzar uai thla la chuang, a zatve la chuang chu biak buk kawmcharah a uai thla tur a ni.

¹³Tin, puan in puanzar a dung lam hmawr tuak ve vea tawng khat ve ve la chuanga chu biak buk bang lehlam lehlam khuhna'n a uai thla tur a ni.

¹⁴Tin, berampa vun chhum senin puan in chung khuhna te, savun tha chi vunin a chunga khuh lehnate i siam tur a ni.

¹⁵Tin, biak buk ban rem khawm turte chu ngil taka dingin thingri thingin i siam tur a ni.

¹⁶Tin, ban rem khawm sei lam chu tawng sawm ni se la, tin, a vang lam chu tawng khat leh a chanve ni theuh rawh se.

¹⁷Ban rem khawm tinah chuan ke pahnih inzawmin a awm tur a ni: chutiang chuan biak buk ban rem khawm zawng zawng chu i siam tur a ni.

¹⁸Tin, biak buk atan ban rem khawm chhim chhawng chhim lampang atan chuan ban rem khawm sawmhnih i siam tur a ni.

¹⁹Tin, chu mi ban rem khawm sawmhnih nghahchhan atan chuan tangkaraw tlang kerkuak sawmli i siam tur a ni; a ke pahnih atan ban rem khawm pakhat nghahchhan kerkuak pahnih i siam tur a ni:

²⁰tin, biak buk sir lehlam hmar chhawng lam atan ban rem khawm sawmhnih i siam tur a ni:

²¹Chung atan chuan tangkaraw tlang sawmli kerkuak nen, ban rem khawm pakhat atan nghahchhan kerkuak pahnih keh, ban rem khawm dang pakhat atan nghahchhan kerkuak pahnih i siam bawk tur a ni.

²²Tin, biak buk kawmchar khawtlang chhawng lam atan chuan ban rem khawm paruk i siam tur a ni.

²³Tin, biak buk kawmchar kil ve ve atan chuan ban rem khawm pahnih i siam tur a ni.

²⁴Tin, a hnuai lamah chuan thlawp tur a ni, chutiang bawkin a chhip lam khang hmasa ber thlengin tih vek tur a ni: chutiang chuan a pahnih chuan tih ve ve tur a ni; chung chu a kil pahnih atan a ni tur a ni.

²⁵Tin, ban rem khawm pariat, a nghahchhan tur tangkaraw tlang kerkuak sawm leh paruk nen a awm tur a ni; ban rem khawm pakhat atan nghahchhan kerkuak pahnih zel.

²⁶Tin, thingri thingin bangrel, biak buk bang lehlam ban remkhawm atan panga, biak buk bang lehlam ban rem khawm atan panga,

²⁷tin, biak buk kawmchar khawthlang chhawng lam ban rem khawm atan pawh panga i siam tur a ni.

²⁸Tin, bangrel laita, ban rem khawm lai taka mi chuan ban rem khawm hmawrtawng ber atangin a lehlam hmawrtawng ber thlengin a thil tlang tur a ni.

²⁹Tin, ban rem khawmte chu rangkachak tiin i luan tur a ni a, tin, bangrelte thil nan rangkachak khangte i siam tur a ni: tin, chung bangrelte chu rangkachak tiin i luan bawk tur a ni.

³⁰Chutichuan tlanga ka entir dan ang chiah che khan biak buk chu i sa tur a ni.

³¹Tin, puanzar tur la zai sin tak kawp te, a dum pawl te, a sen duk te, a sen larte hmangin cherub lemte mi thiam tak siam chuantirin i siam tur a ni.

³²Chu chu thingri ban pali rangkachak tia luanah chuan i zar tur a ni, a banna chu rangkachaka siam tur a ni, tin, tangkaraw tlang kerkuak palia inphun tur a ni.

³³Tin, chu mi puanzar chu puanzar chilhbehnate hnuai lamah chuan i zar a ni a, tin, chu mi puanzar chhung lamah chuan thuthlunna bawm chu i dah lut tur a ni: tichuan puanzar chuan hmun thianghlim leh hmun thianghlim ber chu a daidansak dawn che u nia.

³⁴Tin, zahngaihna thutphah chu hmun thianghlim berah thuthlunna bawm chhungah chuan i dah tur a ni.

³⁵Tin, puanzar pawn lamah chuan dawhkan i hung tur a ni a, tin, biak buk chhim chhawng lam dawhkan epah chuan khawnvar dahna i hung tur a ni: tichuan dawhkan chu hmar lampangah chuan i dah tur a ni.

³⁶Tin, Puan in kawngkaa zar tur la zai sin tak kawp te, a dum pawl te, a sen duk te, a sen lar te hmangin, puan zeh mawi thiam taka zeh nen i siam tur a ni.Tin, puanzar zarna tur chuan thingri ban panga i siam tur a ni a, chung chu rangkachak tiin i luan tur a ni; a bannate chu rangkachaka siam tur a ni: chung hunna atan chuan dar tlang kerkuak panga i chhung tur a ni.

³⁷Tin, puanzar zarna tur chuan thingri ban panga i siam tur a ni a, chung chu rangkachak tiin i luan tur a ni; a bannate chu rangkachaka siam tur a ni: chung hunna atan chuan dar tlang kerkuak panga i chhung tur a ni.