Read Baibul, Mizo Exodus 35 Bible Online

Exodus 35 - Baibul, Mizo bible

Exodus 35

¹Tin, Mosia'n Israela thlah pung khawmho zawng zawngte chu a ko khawm a, an hnenah, "Heng hi a ni hi LALPA'n in tih tura thu a pek che u chu.

²Ni ruk chhung hna thawhna'n hman tur a ni a, a ni sarih ni erawh chu in tan ni thianghlim, LALPA tana chawlh derna chawlhni a ni tur a ni: tupawh chu mi nia hna thawk apiang chu tihhlum tur ani ang.

³Chawlhni chuan in chenna hmun reng rengahte chuan mei in chhem tur a ni lo," a ti a.

⁴Tin, Mosia'n Israela thlahte pung khawmho zawng zawng hnenah chuan, "Hei hi a ni hi LALPA'n thu apek che u chu,

⁵in zing ata LALPA tna thilhlan tur rawn la rawh u: tupawhin a thinlunga pek chak apiang chuan LALPA tana hlan tur chu rawn la rawh se; rangkachak te, tangka te, dar te,

⁶la dum pawl te, sen duk te, sen lar te, la zai sin te, kel hmul te nen;

⁷tin, berampa vun chhum sen te, savun tha mi te, thingri thingte nen;

⁸tin, khawnvar atan hriak te, hriak thih mi atan leh hal tur rimtui tak atan englo rimtui nen;

⁹tin, puithiam kawr leh kawr awma zeh turin onukion lungte leh lunghlute nen.

¹⁰Tin, in zinga mi themthiam apiang chu lo kal se la, LALPA'n siam tura thu a pek apiang chu siam rawh se;

¹¹biak buk te, a puan in te, a khuhna te, a chilhbehna te, a ban rem khawm te, a bangrel te, a ban te, a nghahchhan kerkuak te nen;

¹²bawm leh a zawnfung te, zahngaihna thutphah te, a daidanna tur puanzar nen;

¹³dawhkan leh a zawnfungte leh a hmanrua zawng zawng te, chhang dah te nen;

¹⁴tin, eng atan khawnvar dahna te leh a hmanrua zawng zawng te, a khawnvar te, chhit en atan hriak te nen;

¹⁵tin, rimtui halna maicham leh a zawnfung te, hriak thih mi te, hal tur rimtui tak te, tin, biak buk kawngkaa zar tur kawngka puanzar te nen;

¹⁶halrala thilhlanna maicham, a dar len leh a zawnfungte leh a hmanrua zawng zawng te, maihun leh a hun chhante nen;

¹⁷biak buk hung chhung kawtlaia puan zar te, a ban te, a ban nghahchhan kekuar te leh a hung chhung kawngkaa puanzar te nen;

¹⁸biak buk kil behna te, a hung chhung kawtlai kilh behna te, a hrui te nen:

¹⁹hmun thianghlima rawngbawlna tura silhfen mawi taka tah te, puithiam rawng a bawl huna hak tur puithiam Arona silhfen thianghlim leh a fapate silhfen te,' tiin," a ti a.

²⁰Tichuan Israela thlah pung khawmho zawng zawngte chu Mosia hnen ata an tin ta vek a.

²¹Tin, mi tin, thinlung taka phur sarh apiang leh rilru taka phal apiang chu an lo kal a, inbiakna puan ina hman tur leh rawngbawlna lam atana thil hman tul apiang leh silhfen thianghlim tur chu LALPA tan an rawn thawh hlawm a.

²²Tin, a hmei apain pek chak apiangte chu an lo kal a, banbun te, bengbeh te, hming nemna zungbun te, thi te, rangkachak incheina tinrengte an rawn la a; tin, mi tin rangkachak hlan tur nei apiangin LALPA tan an hlan theuh a.

²³Tin, mi tin la dum pawl te, sen duk te, sen lar te, la zai sin te, kel hmun te , berampa vun chhum sen te, savun tha mi te nei apiangin an rawn keng hlawm a.

²⁴Mi tin, tangka leh dar te thawh apiangin LALPA tana thilhlan tur an rawn keng a: tin, mi tin, thingri thing, hmanraw tinreng atana hman tlak nei apiangin an rawn la a.

²⁵Tin, hmeichhe themthiamho zawng zawngte chuan la an kai a, tin, chu an la kaih dum pawl te, sen duk te, sen lar te, la zai sinte chu an rawn keng hlawm a.

²⁶Tin, hmeiche themthiam phur sarhho zawng zawngte pawhin kel hmun an kai a.

²⁷Tin, puithiam kawr leh kawr awma zel turin roreltuten onukion lungte leh lunghlute an rawn keng a;

²⁸tin, rimtui te, hriak te nen; chhit en atan te, hriak thih mi atan te, hal tur rimtui tak atan te pawh.

²⁹Israela thlahte chuan LALPA hnenah duh thua thilhlan an rawn hlan a: mi tin, a hmei apa, LALPA'n Mosia kuta thil siam tura thu apek zawng zawngte siamna tura thinlunga chak taka kengtue chuan.

³⁰Tin, Mosia'n Israela thlahte hnenah chuan, "Ngai teh u, LALPA'n Juda hnama mi Hura fapa Uria, chu mi fapa Bezalela chu a thlang tawh e.

³¹Chu mi chu finna te, hriatthiamna te, hriatna te, kawng tinrenga themthiamna te nei turin PATHIAN thlarauin a tikhat tawh a,

³²thiltih tur fing taka suangtuah thiamna te, rangkachak leh tangkarua leh dar chher thiamna te,

³³lunghlute zeh tura phel thiamna te, thing zai mawi dan thiamna te, kawng tinrenga themthiamna te nei turin.

³⁴Tin, amah nen, Dana hnama mi Ahisamaka fapa Oholiaba nen mite zirtir theihna finna a pe ve ve a.Anni chu kawng tinrenga themthiamna te, englo ziak thiamna te, themthiamna te, la dum pawl te, sen duk te, sen lar te, la zai sin te zehmawi thiamna te, puan tah thiamna te, hnathawh tinreng thiamna te, thiltih tur fing taka suangtuah thiamna te nei turin thinlung finnain a tikhat tawh e.

³⁵Anni chu kawng tinrenga themthiamna te, englo ziak thiamna te, themthiamna te, la dum pawl te, sen duk te, sen lar te, la zai sin te zehmawi thiamna te, puan tah thiamna te, hnathawh tinreng thiamna te, thiltih tur fing taka suangtuah thiamna te nei turin thinlung finnain a tikhat tawh e.