Read Baibul, Mizo Exodus 39 Bible Online

Exodus 39 - Baibul, Mizo bible

Exodus 39

¹Tin, la dum pawl te, a sen duk te, a sen lar te hmangin hmun thianghlima rawngbawlna tura silhfen mawi takte an siam a, Arona tan silhfen thianghlimte an siam bawk a; LALPA'n Mosia'n thu a pek ang khan.

²Tin, rangkachak zai te, la dum pawl te, a sen duk te, a sen lar te, la zai sin tak kawpte hmangin puithiam kawr chu a siam a.

³Rangkachak chu pan takin an chhu per a, la dum pawl te, a sen duk te, a sen lar te, la zai sin tak tea mi themthiam takin a zeh turin an zai thlur seng a.

⁴A dar bak thui belhbawmin an siam a: a hmawr ve vea thui belhbawm a ni.

⁵Tin, chumi kawr chunga kawnghren tur themthiam taka tah chu, chu mi kawr chi bawk tluan khat vek a ni a: rangkachak zai te, la dum pawl te, a sen duk te, a sen lar te, la zai sin tak kawp tea tah a ni; LALPA'n Mosia thu a lo pek ang khan.

⁶Tin, Israela thlahte hming ang zelin nemnaa ziak ang chuanna rangkachak zai phiara phum onukion lungahte chuan an ziak a.

⁷Tin, Israela thlahte hriat rengna lung atan puithiam kawr darbakah chuan a bel a; LALPA'n Mosia thu a pek ang khan.

⁸Tin, awmbel chu puithiam kawr siam ang bawk mi thiam tak siam angin rangkachak zai te, la dum pawl te, a sen duk te, a sen lar te, la zai sin tak kawpte hmangin a siam a.

⁹Chu chu kil li nei ani a; awmbel chu an thuah a: a dung lam chu khap ani a, a vang lam chu khap bawk ani a, thuah a ni.

¹⁰Tin, chutah chuan lunghlute tlar liin an zep a: tlar khatna chu saridon te, topazion te, smarangdon te a ni a.

¹¹Tin, tlar hnihna chu anthrax te, sappheiros te, sardonukion te a ni a.

¹²Tin, tlar thumna chu huakinthos te, akates te, amethutos te a ni a.

¹³Tin, tlar lina chu krusolithos te, berullion te, onukion te ani a: rangkachak zai phiara phum fel thet a ni.

¹⁴Tin, lungte chu Israela thlahte hming ang zelin, sawm leh pahnih chu an hming an zelin a ni a; hming nemnaa chuang ang, hnam tin, an hming ang zelin, hnam sawm leh hnam hnihte tan chuan a ni.

¹⁵Tin, awmbel chauh chuan hruihrual ang khaidiat te, rangkachak hlir hlakherh an siam a.

¹⁶Tin, rangkachak zai phiar pahnih leh rangkachak khang pahnih an siam a; tichuan awmbel tlang hmawr ve veah chuan khangte chu an vuah a.

¹⁷Tin, rangkachak khaidiat herh pahnih chu awmbel tlang hmawr ve vea khang pahnihah chuan an thlung a.

¹⁸Tin, khaidiat herh hmawr leh lam pahnihte chu rangkachak zai phiar pahnihah chuan an zawm a, chu chu puithiam kawr hma lama darbakah chuan an thlung a.

¹⁹Tin, rangkachak khang pahnih an siam a, chung chu awmbel kil pahnih, puithiam kawr dep chu lampangah chuan an vuah a.

²⁰Tin, rangkachak khang pahnih an siam a, chu chu a hma lama puithiam kawr darbakna pahnih hnuai lam pang, a inzawmna lai vel, pithiam kawr hrenna themthiam taka tah chu lamah chuan an vuah a.

²¹Tin, puithiam kawra khangahte chuan awmbela khangte chu hrui dum pawlin an chilh zawm a, themthiam taka tah puithiam kawr hrenna chung lama a awm theihna'n leh awmbel chu puithiam kawr nen a inhran loh nan; LALPA'n Mosia thu apek ang khan.

²²Tin, puithiam kawr kawrfual, a dum pawl hlir hlaka tah a siam a,

²³tin, kawrfual lai tak chu kawr ban bul angin a tiawng a, a awng chu a thler chhiat thei mai lohna turin a tlang vel chu a chep a.

²⁴Tin, kawrfual femahte chuan pawmgranet lem- a dum pawl te, a sen duk te, a sen lar te, la zai kawptein an siam a.

²⁵Tin, rangkachak hlir hlak tengengte an siam a, chung tengeng chu kawrfual femah a velin pawmgranet inkarahte chuan an dah a, pawmgranet inkar zelah an dah a ni;

²⁶tengeng pakhat leh pawmgranet pakhat zel kawrfual femah a velin rawngbawlna tura inthuamna'n an dah a; LALPA'n Mosia thu apek ang khan.

²⁷Tin, Arona leh a fapate tan chuan la zai sin taka tah kawrte an siama. La zai sin taka siam puithiam lukhum te, la zai sin taka siam diar tha tak te, la zai sin tak kawpa siam la zai sin kekawr te,

²⁸la zai sin taka siam puithiam lukum te, la zai sin taka siam diar tha tak te, la zai sin tak kawpa siam la zai sin kekawr te,

²⁹la zai sin tak kawp te, a dum pawl te, a sen duk te, a sen lar te hmanga puan zehmawi thiam taka zeh kawnghren te nen; LALPA'n Mosia thu a pek ang khan.

³⁰Tin, lukhum thianghlim atana rangkachak phek chu rangkachak hlir hlakin an siam a, a pangah chuan hming nemnaa chuang ang, "LALPA PUAL" tih an chuantir a,

³¹Tin, puithiam lukhum chu lama bel turin hrui dum pawlin an thlung a; LALPA'n Mosia thu a pek ang khan.

³²Chutichuan ibiakna puan in biak buk hna zawng zawng chu an zo ta a: tichuan LALPA'n Mosia tih tura thu a pek ang chiah zelin Israela thlahte chuan an ti a.

³³Tin, Mosia hnenah biak buk an rawn kalpui a, Puan in te, a hmanrua zawng zawng te, a chilhbehna te a ban rem khawm te, a bangrel te, a ban te, a nghahchhan kerkuak te nen;

³⁴Berampa vun chhum sena siam a khuhna te, savun tha mia siam a khuhna te, a daidanna tur puanzar te nen,

³⁵thuhriattirn bawm le a zawnfung te, zahngaihna bawm le a zawnfung te, zahngaihna thutphah nen,

³⁶Dawhkan te, a hmanrua zawng zawng te, chhang dah te nen,

³⁷rangkachak hlir hlaka siam khawnvar dahna te, a khawnvar, khawnvar dah tur te, a hmanrua zawng zawng le chhit en atan a hriak nen;

³⁸rangkachak maicham te, hriak thih mi te, hal tur rimtui tak te, Puan in kawngkaa zar tur puan zar te nen,

³⁹dar maicham te, a dar len te, a zawnfung te, a hmanrua zawng zawng te, maihun leh a hun chan te nen;

⁴⁰biak buk hun ngchhung kawtlai puanzar te, a ban e, a ban nghahchhan kerkuak te, a hung chhung kawngkaa puanzar te, a rui te, a kilhbehna te, inbiakna puan in biak bung chhung a hmanraw thil zawng zawngte nen;

⁴¹mun thianghlima rawngbawlna tura silhfen mawi taka tah te, puithiam Arona leh a fapaten puithiam rawng an bawl huna an hak tur silhfen thianghlimte nen.

⁴²LALPA'n Mosia tih tura thu a pek ang zawng zawng chu Israela thlahte chuan an ti vek a.tin, Mosia'n chu hnathawh zawng zawng chu a han en a, ngai teh, an lo zo vek tawh a; LALPA thupek ang takin an zo vek a ni: tichuan Mosia'n anni chu mal a sawm a.

⁴³tin, Mosia'n chu hnathawh zawng zawng chu a han en a, ngai teh, an lo zo vek tawh a; LALPA thupek ang takin an zo vek a ni: tichuan Mosia'n anni chu mal a sawm a.