Read Baibul, Mizo Exodus 4 Bible Online

Exodus 4 - Baibul, Mizo bible

Exodus 4

¹Tin, Mosia chuan, "Ngai teh, mi ring duhin ka thu an pawm lo ang: 'LALPA chu i hnenah a inlar ngut lo ang e,' an ti mai awm si a," tiin a chhang a.

²Tin, LALPA chuan a hnenah, "I kuta mi kha eng nge ni?" a ti a. Tin, ani chuan, "Tiang," a ti a.

³Tin, ani chuan, "Leiah khan han paih teh," a ti a. Tin, leiah chuan a han paih a, tin, rulah a lo chang ta a; tin, Mosia chuan a tlansan ta a.

⁴Tin, LALPA chuan Mosia hnenah, "I kut khan han ban la, a meiah han la teh, (tin, a kut chuan a han ban a, a han la a, tin, a kutah chuan tiangah a lo chang leh ta a):

⁵LALPA, an thlahtute Pathian, Abrahama Pathian, Isaaka Pathian leh Jakoba Pathian chu i hnenah a rawn inlar ngei a ni tih an rin theihna turin," a ti a.

⁶Tin, LALPA chuan a hnenah, "I kut khan i awm zuk zen teh," a ti leh a. Tin, a awm chu a zuk zen a: tin, a han pawrh chhuah leh chuan, ngai teh, a kut chu vur anga varin a lo phar ta a.

⁷Tin, ani chuan, "I kut khan i awm zuk zen leh teh. (Tin, a awm chu a zuk zen leh a; a awm ata a han pawrh chhuah chuan, ngai teh, a tisa dang ang bawk chuan a lo awm leh ta a.)

⁸Tin, heti hi a ni ang a, an rin duh loh che a, chhinchiahna hmasa zawk chu an pawm duh loh chuan, chhinchhiahna hnuhnung zawk tal chu an ring ang.

⁹Tin, heti hi a ni ang a, chung chhinchhiahna pahnih ngei pawh an rin loh a, i thusawi pawh chu an pawm loh chuan, lui tui i zuk thal ang a, lei charah i bun ang a; tin, lui ata tui i zuk thal chu lei charah chuan thisenah a lo chang dawn nia," a ti a.

¹⁰Tin, Mosia chuan LALPA hnenah, "Aw LALPA, kei zawng tun hma lamahte leh i chhiahhlawh hnena thu i rawn sawi hnuah pawh hian mi tawnghmang thiam ka ni ve ngai lo a ni: mi tawng ban leh mi tawng mawh ka ni si a," a ti a.

¹¹Tin, LALPA chuan a hnenah, "Mihring ka hi tu siam nge ni a, mitvar te, mitdel te pawh hi tu tih nge ni? Kei LALPA hian a ni lo em ni?

¹²chuvangin kal mai rawh, i ka chu keima'n ka awmpui zel ang a, i sawi tur chu ka hrilh zel ang che," a ti a.

¹³Ni lo e, LALPA, mi dang tir zawk ta mai che," a ti a.

¹⁴Tichuan LALPA chu Mosia chungah a thinur ta a, a hnenah, "I unaupa Arona, Levia chi chu a awm lo'm ni? Ani zawngin tawnghmang a thiam tih ka hria a ni. Ngai teh, nangmah hmuak turin a lo kal nghe nghe a sin: tin, a hmuh che zawngin a thinlung chu a lawm hle mai ang.

¹⁵Chutichuan nangin amah chu bia langin, thute chu fah vek ang che: tichuan i ka leh a ka chu keima'n ka amwpui zel ang a, in tih tur chu ka hrilh zel ang che u.

¹⁶Tin, ani chu mipui hnena i thu sawi chhawngtu a ni ang: tin, heti hi a ni ang a, i tan ka a ni ang a, tin, nang chu a tan Pathian ang i ni ang.

¹⁷Tin, nangin he tiang hi i keng ang a, chu chuan thilmakte chu i ti ang," a ti a.

¹⁸Tin, Mosia chu a kal a, a pu Jethro hnenah a kir leh ta a, tin, a hnenah, "Aigupta rama ka uanu awmte chu an la dam emaw an hnenah khawngaih takin ka va hawng rih ang e," a ti a. Tin, Jethroa chuan Mosia hnenah, "Thlamuang takin kal ta che le," a ti a.

¹⁹Tin, LALPA chuan Midian ramah Mosia hnenah chuan, "Kal la, Aigupta ramah chuan va kir leh tawh rawh le: nangmah tihhlum tumtute kha an thi vek tawh e," a ti a.

²⁰Tin, Mosia chuan a nupui leh a fapate chu a hruai a, sabengtung chungah a chuantir a, tin, Aigupta ramah chuan a kir leh ta a: tin, Mosia'n Pathian tiang chu a keng a.

²¹Tin, Lalpa chuan Mosia hnenah, "Aigupta ram i thlen hun chuan i kuta thilmak zawng zawng ka kentir che hi Pharaoa hmaah chuan ti ngei ngei ang che: nimahsela a thinlung ka tihkhauhsak ang a, tichuan mite chu a chhuahtir phal lo ang.

²²Tin, nangin Pharaoa hnenah chuan, 'LALPA'n, Israela hi ka fapa, ka fa tir a ni e:

²³tichuan i hnenah, ka fapa chuan ka rawng a bawl theihna'n chhuahtir rawh khai ka ti a; tin, i chhuahtir phal lo vei a i fapa, i fa tir chu ka tihlum ang, a ti e,' ti ang che," a ti a.

²⁴Tin, heti hi ani a, kalkawnga riah hmunah chuan LALPA'n Mosia chu a zuk tlawh a, tihhlum a tum ta a.

²⁵Tin, Zipori chuan meilung a la a, Tin, a fapaa serhvun chu a tan a, Mosia ke a tawhtir a; tichuan, "Ka tan pasal thisen chhuah hmang i lo nih hi le," a ti a.

²⁶Chutichuan, "Serh tan avangin pasal thisen chhuah hmang i lo nih hi" a ti a.

²⁷Tin, LALPA'n Aron hnenah, "Mosia hmuak turin thlalerah va kal rawh," a ti a. tin, a kal ta a, Pathian tlangah chuan a va hmu a, a fawp a.

²⁸Tin, Mosia chuan LALPA'n a tirh thu zawng zawngte leh thilmak a tihtir tur zawng zawngte chu Arona a hrilh vek a.

²⁹Tin, Mosia leh Arona chuan Israela thlahte upaho zawng zawng chu an ko khawm vek a:

³⁰tin, LALPA'n Mosia hnena a sawi zawng zawngte kha Arona chuan a sawi chhawng leh vek a, tin, mipuite hmuhah chuan thilmakte chu a ti a.Tin, mite chuan an awih ta a: tin, LALPA'n Israela thlahte chu a zuk kan a, an hreawmziate a zuk hmu ta a ni tih an hriatin an lu an kun a, chibai an buk ta a.

³¹Tin, mite chuan an awih ta a: tin, LALPA'n Israela thlahte chu a zuk kan a, an hreawmziate a zuk hmu ta a ni tih an hriatin an lu an kun a, chibai an buk ta a.