Read Baibul, Mizo Exodus 6 Bible Online

Exodus 6 - Baibul, Mizo bible

Exodus 6

¹Tin, LALPA chuan Mosia hnenah, "Tunah zawng Pharaoa chunga ka tih dan tur chu i hmu tawh ang: kut chak tak avang chuan anmahni a chhuahtir ang a, tin, kut chak tak avang chuan a ram ata chu anmahni a hnawt chhuak ang," a ti a.

²Tichuan Pathianin Mosia a bia a, a hnenah, "Kei JEHOVA ka ni:

³Abrahama hnenah te, Isaaka hnenah te leh Jakoba hnenah te khan Pathian Engkimtitheiain ka lo inlar ta a, ka hming JEHOVA-in erawh chuan an hnenah ka la inhriattir lo a.

⁴Tin, anmahni hnenah chuan, Kanaan ram, an mikhualna ram, rei lo te an lo awm tawhna kha pek tumin ka thinlung chu ka lo tinghet ta bawk a.

⁵Tin, Israela thlahte Aigupta-hoten an bawiha te rum kha ka lo hre bawk a; tichuan ka thuthlung chu ka hre reng a ni.

⁶chuvangin Israla thlahte hnenah chuan, 'Kei Jehoa ka ni a, Aigupta-hote phurrit lak ata hi ka hruai chhuak ang che u a, an bawiha in awm hi ka chhuahtir ang che u; tin, nasa taka ngaihtuah che uin ban phar meuhin ka tlan ang che u:

⁷tin, ka mi atan ka nei ang che u a, tin, kei in tan Pathian ka ni ang a; tichuan kei hi Jehoa, in Pathian, Aigupta-ho phurrit lak ata hruaichhuaktu che u ka ni tih in hria ang a.

⁸Abrahama te, Isaaka te leh Jakoba te hnena ka ban meuha pek ka tumna ramah khan ka hruai lut ang che u a; tichuan in rochanah ka pe ang che u: kei Jehoa ka nih hi,' tiin hrilh ang che u," a ti a.

⁹Tin, Mosia'n Israela thlahte hnenah chuan chung thu chu a va sawi a: nimahsela rilru nguina avang leh nasa taka tihretheihna avang chuan Mosia thu chu an ngaithla duh lo a.

¹⁰Tin, LALPA chuan Mosia hnenah,

¹¹Va kal la, Aigupta lal Pharaoa hnenah Israela thlahte hi a ram ata chhuahtir turin va sawi rawh," tiin a sawi a.

¹²Tin, Mosia chuan LALPA hmaah, "Ngai teh, Israela thlahten ka thusawi an ngaithla duh si lo a; kei mi tawng mawh thusawi tehlul hi Pharaoan engtin nge a ngaihthlak ang ni?" tiin a sawi a.

¹³Tin, LALPA chuan Mosia leh Arona chu a bia a, "Aigupta ram ata Israelte hruai chhuak turin thu ka pe tawh che u a ni tih Israelte leh Aigupta lal chu hrilh rawh u," a ti a.

¹⁴Tin, he'ng hi an pate hnam bulpui berte chu an ni: Israela fa tir Reubena fapa te chu; Hanoka te, Pallua te, Hezrona te, Karmia te an ni a: hengte hi Reubena hnamte chu an ni.

¹⁵Tin, Simeona fapate chu Jemuela te, Jamina te, Obada te, Jakina te, Zohara te, Kanaan hmeichhe laka a fapa Saula te an ni: hengte hi Simeona hnamte chu an ni.

¹⁶Tin, hengte hi an thlahte ang zelin Levia fapate hming chu a ni: Gersona te, Kohatha te, Meraria te an ni a; tin, Levia dam chhung kum chu kum 137 a ni.

¹⁷Tin, an hnam ang zelin Gersona fapate chu Libnia leh Simeia te hi an ni.

¹⁸Tin, Kohatha fapate chu Amrama te, Izhara te, Hebrona te, Uziela te an ni a; tin Kohatha dam chhung chu kum 133 a ni.

¹⁹Tin, Meraria fapate chu Mahalia leh Musia an ni. hengte hi an thlahte ang zela Levia hnamte chu an ni.

²⁰Tin, Amrama chuan a pa farnu Jokebedi nupuiah a nei a; tin, Arona leh Mosia a hrinsak a: tin, Amrama dam chhung kum chu kum 137 a ni.

²¹Tin, Izhara fapate chu Kora te, Nephega te, Zikria te an ni.

²²Tin, Uziela fapate chu Misaela te, Elzaphana te, Sithria te an ni.

²³Tin, Arona chuan Aminadaba fanu, Nasona, farnu Elisebi chu nupuiah a nei a; tin, Nadaba te, Abihua te, Eleazara te, Ithamara te a hrinsak a.

²⁴Tin, Kora fapate chu Asira te, Elkana te, Abiasapha te an ni; hengte hi Kora ho hnamte chu an ni.

²⁵Tin, Arona fapa Eleazara chuan Putiela fanute zinga mi pakhat chu nupuiah a nei a; tin, Phinehasa a hrinsak a. Tin, hengte hi an hnam ang zela Levia thlah bulpui berte chu an ni.

²⁶Chu mi Arona leh Mosia te chu an ni LALPA'n, "Aigupta ram ata Israela thlahte hi an pawlho ang zelin hruai chhuak rawh u," tia a hrilh ni.

²⁷Chu mite chu an ni Aigupta lal Pharaoa va biaa, Israela thlahte chu Aigupta ram ata chhuahtir tura va betute chu: chu mite chu Mosia leh Arona chu an ni.

²⁸Tin, heti hi a ni a, Aigupta rama LALPA'n Mosia a biak ni chuan,

²⁹LALPA chuan, "Kei LALPA chu ka ni: Aigupta ram lal Pharaoa hnenah chuan i hnena ka sawi zawng zawng hi sawi rawh," tiin Mosia chu a bia a.Tin, Mosia chuan LALPA hmaah, "Ngai teh, kei mi tawng mawh ka ni si a, tichuan keia thusawi tehlul hi Pharaoan engtin nge a ngaihthlak ang ni?" a ti a.

³⁰Tin, Mosia chuan LALPA hmaah, "Ngai teh, kei mi tawng mawh ka ni si a, tichuan keia thusawi tehlul hi Pharaoan engtin nge a ngaihthlak ang ni?" a ti a.