Read Baibul, Mizo Exodus 9 Bible Online

Exodus 9 - Baibul, Mizo bible

Exodus 9

¹Chutichuan LALPA'n Mosia hnenah, "Pharaoa hnenah va lut la, 'LALPA, Hebraite Pathianin, ka mite hian ka rawng an bawl theihna'n chhuahtir rawh.

²I chhuahtir phal loh a, i la hren reng zawngin,

³ngai teh, phula i rante chungah chuan LALPA kut a awm dawn a ni, sakawr chungah te, sabengtung chungah te, sanghawngsei chungah te, bawng rualchungah te, beram tualchungah te chuan: hri nasa tak mai a lo leng ang.

⁴Tin, LALPA'n Israel-ho ran leh Aigupta mite ran chu a tihrang ang a; tichuan Israela thlahte ta chu pakhat mah a thi lo ang, a ti e,' tiin hrilh rawh," a ti a.

⁵Tin, LALPA chuan "Naktukah LALPA'n he ramah hian chutiang chu a ti dawn e," tiin hun a ruat ta a.

⁶Tin, LALPA chuan atukah chutiangin a ti ta a, tichuan Aigupta mite ran zawng zawng chu a thi ta vek a; nimahsela Israela thlahte ran chu pakhat mah a thi ve lo a.

⁷Tin, Pharaoa chuan mi a tir a, tin, ngai teh, Israel mite ran chu pakhat mah a lo thi ve ta lo a. Nimahsela Pharaoa thinlung chu tiluhlulin a awm a, mite chu a chhuahtir phal ta lo a.

⁸Tin, LALPA'n Mosia leh Arona hnenah, "Rawhtuina meia mi vut va thum u la Pharaoa mithmuhah Mosia'n van lamah teh chiam rawh se.

⁹Tin, Aigupta ram zawng zawng chungah hian vut dip takah a lo chang ang a, tin, chu chuan Aigupta ram chhung zawng zawnga mi leh sa chu khawihli a veitir theuh ang a, a durh leu chiam ang," a ti a.

¹⁰Tin, rawhtuina meia vut chu an la a, Pharaoa hmaah chuan an va ding a; tin, Mosia chuan van lamah a han teh chiam a; tichuan mi tin leh sa tinin khawihli durh leu an lo vei ta vek a.

¹¹Tin, khawihli avang chuan mitlak dawithiamte chuan Mosia chu an chelh ta lo a; mitlak dawithiamte leh Aigupta mi zawng zawngte chuan khawihli chu an vei vek si a.

¹²Tin, LALPA'n Pharaoa thinlulng chu a tihkhauhsak a; tichuan an thu chu a ngaithla duh ta lo a; LALPA'n Mosia hnena a sawi tawh ang khan.

¹³Tin, LALPA'n Mosia hnenah, "zing takah tho la, Pharaoa hmaah va ding la, tin, a hnenah, 'LALPA, Hebraite Pathianin, ka miten ka rawng an bawl theihna'n chhuahtir rawh.

¹⁴Tun tumah zawng i chungah leh i chhiahhlawhte chungah leh, i mite chungah hian ka hril zawng zawngte hi ka lentir dawn e; tichuan khawvel zawng zawngah hian keimah ang reng reng hi tumah an awm lo tih i hria ang.

¹⁵Chuti ni suh se la, ka kut ka thawh ang a, nang leh i mite hi hriin ka hrem ang a, khawvel ata hi ka tiboral daih tawh tur che a ni:

¹⁶nimahsela he mi avang ngawt hian ka tungding chia, ka thiltihtheihna entir tur che leh khawvel zawng zawnga ka hming a lo than theih nan.

¹⁷Ka mite lakah hian i la induh cheuin, i la chhuahtir lo ang maw?

¹⁸ngai teh, naktuk hetih hunah hian rial tam pui, Aigupta ram a lo awm tirh ata, tun thleng pawha la tla ngai lo chu ka tlaktir ang.

¹⁹Chutichuan phula i rante leh i neih apiangte chu khungtir thuai rawh khai; mi tin leh sa tin phula awm, ina khung loh tawh phawt chu, rialin a deng ang a, an thi ang, a ti e,' ti rawh," a ti a.

²⁰Pharaoa chhiahhlawhte zinga LALPA thu pawisa apiang chuan an chhiahhlawhte leh an rante chu in chhungah an tlan luhtir a:

²¹tin, LALPA thu ngaisang lo apiang chuan an chhiahhlawhte leh an rante chu phulah chuan an awmtir mai a.

²²Tin, LALPA chuan Mosia hnenah, "van lamah i kut han lek rawh, Aigupta ram zawng zawngah hian mihring chungah te, sa chungah te, Aigupta ram chhunga loa thlai tinreng chungah te chuan rial a lo tlak nan," a ti a.

²³Tin, Mosia chuan a tiang chu van lamah a han lek a: tin, LALPA chuan khawpui ri leh rial a zuk tir a, tin, leiah chuan mei te a lo tla a; tichuan LALPA'n Aigupta ramchungah chuan rial a tlaktir chiam a.

²⁴Chutichuan rial, mei leh riala inpawlh, nasa em em mai, Aigupta ram zawng zawngah chuan, Aigupta hnam lo awm a chin, chutiang reng reng la awm ngai lo chu a lo awm ta a.

²⁵Tin, rial chuan Aigupta ram zawng zawnga phula awm zawng zawng, mihringte leh sate chu a deng a; tin, rial chuan loa thlai tinrengte chu a deng a, phula thing tinrengte chu a titliak vek a.

²⁶Gosen ram, Israela thlahte awmnaah chauh chuan rial a tla ve lo a.

²⁷Tin, Pharaoa chuan Mosia leh Arona chu a kohtir a, an hnenah, "Tun tum zawng thil ka tisual ta a ni e: LALPA chu mi fel a ni a, kei leh ka mite hi kan sual a ni e.

²⁸LALPA hnenah ngen rawh u; he'ng khawpui ri dur durte leh rialte hi a tawk tawh e; tichuan ka chhuahtir ang che u a, in awm tawh lo ang e," a ti a.

²⁹Tin, Mosia'n a hnenah, "Khua ata hi ka chhuah veleh, LALPA lamah ka kut ka phar ang a, khawpui rite chu a reh ang a, rial pawh a awm tawh hek lo ang; tichuan lei hi LALPA ta a ni tih i hria ang.

³⁰Nimahsela nang leh i chhiahhlawhteho hi zawngin LALPA Pathian hi in la tih chuang lo tih ka hria a ni," a ti a.

³¹Nimahsela buh leh vai buhtun chu a deng chhe lo, a la to rih loh avangin.

³²Tin, Mosia chu Pharaoa hnen atangin khua ata chu a chhuak a, tin, LALPA lamah a kut a phar a: tichuan khawpui rite leh rial tla chu a lo bang ta a, tin, leichungah ruah pawh chu a baw tlawrh tlawrh ta lo a.

³³Tin, Pharaoan ruah leh rial leh khawpui rite chu a bang ta tih a hriat veleh, a sual leh ta sauh a, amah leh a chhiahhlawhte nen an thinlung an tikhauh ta a.Tin, Pharaoa thinlung chu tihkhauhin a awm a, tichuan Israela thlahte chu a chhuahtir phal ta lo a; LALPA'n Mosia hmanga a lo sawi tawh ang khan.

³⁴Tin, Pharaoa thinlung chu tihkhauhin a awm a, tichuan Israela thlahte chu a chhuahtir phal ta lo a; LALPA'n Mosia hmanga a lo sawi tawh ang khan.