Read Baibul, Mizo Joba 3 Bible Online

Joba 3 - Baibul, Mizo bible

Joba 3

¹Hetih hnu hian Joba chuan a ka a ang a, a pianna ni chu anchhia a lawh ta a.

²Tichuan Joba chuan, heti hian a sawi a:

³Ka pianna ni chu boral rawh se, Mipa fa a pai ta e, tihna zan nen chuan.

⁴Chu ni chu thim lo ni se, Chung lam atangin Pathianin ngaihsak lo se; Eng pawh chu a chungah eng suh se;

⁵Thim leh thihna hlim chuan an ta atan chuhse, Chhumin bawh reng mai se la; Chhun tithimtu zawng zawng khan tihlau rawh se.

⁶Chu zan chu zawng thimin chelh reng mai se la, Chu kuma nite zingah chuan him ve lo se la; Thla chhiarna zingah pawh lo tel suh se.

⁷Chu zan chu zan khawhar lo ni se, tah chuan hlim thawm leng suh se.

⁸Ni anchhelawh thiamte chuan anchhia lawh rawh se, Leviathan chawh thawh thiamte chuan.

⁹A vartian arsi chu thim se la, Eng lo nghak se, hmu si lo se la. Zing khawfingchat pawh hmu hek suhse:

¹⁰Ka nu chhul kawngka a lo khar loh avang leh Ka mithmuha buaina a thup hek loh avangin.

¹¹Engati nge chhula ka lo thih loh? Engati nge pum ata ka chhuaha ka thaw a lo tawp loh?

¹²Engah nge mal chunga mi lo chawi? Engah nge ka hnek tur hnutein mi lo hmuah?

¹³Chutin ka mu ang a, ka reh riai tawh tur; Ka muhil ang a, ka chawl tawh tur:

¹⁴Lei lalte leh remruatpuitute, Hmun ram lo indinsaktute nen chuan;

¹⁵A nih loh leh, hotute rangkachak sum neia, Tangkaa an in tikhatute nen chuan:

¹⁶A nih loh leh, a hun loa piang thup bo ang ka ni tawh tur, Nausen eng hmu ngai lote ang mai hian.

¹⁷Tah chuan mi suaksualten chawhbuai an bang a, Tah chuan mi chaute pawh an chawl a.

¹⁸Tah chuan mi tangte an chawl hahdam hlawm a, Vengtu aw pawh an hre lo.

¹⁹Tah chuan mi lian mi te an awm za a. Chhiahhlawh pawh a pu lakah a fihlim.

²⁰Engah nge hreawm tuar hnenah eng pek a niha, Engah nge rilrua mangang hnenah nunna pek a nih?

²¹Thih chak em ema, hmu si lo, Ro phum zawn aia nasaa zawngtu,

²²Thlan an hmuha lawma, nasa taka hlim em em tur hnenah chuan?

²³Mi a kawng thup bosaka hnenah engati nge eng pek a nih ? Pathianin huang a hung hnan hnenah chuan?

²⁴Ka ei dawn pawhin ka thaw a pik a, Ka rum chu tui angin a luang chhuak a.

²⁵Ka tihzawng tak ka chungah a lo thleng a, ka hlauhzawng tak ka hnenah a lo thleng.Ka hahdam lo a, ka awm hle hle thei lo a, ka chawl thei hek lo; buaina a lo thleng zawk a ni.

²⁶Ka hahdam lo a, ka awm hle hle thei lo a, ka chawl thei hek lo; buaina a lo thleng zawk a ni.