Read Baibul, Mizo Joba 39 Bible Online

Joba 39 - Baibul, Mizo bible

Joba 39

¹Lung bang sathar no neih hun i hria em ni? Sazuk no neih hun i chhinchhiah thei em ni?

²An pai chhung thla zat i chhiarin, An hrin hunte i hria em ni?

³An bawk a, no an hring a, An vei zo mai a ni.

⁴An note chu an pian a tlang a, Ram palailengah an thang lian a, An kal darh a, an puite hnenah an kir tawh lo.

⁵Ram sabengtung tuin nge zawl chhuah? Ram sabengtung chak thlunna tu phelh nge?

⁶An awmna'n thlaler ka ruatsak a, An chenna'n ram tau;

⁷Khawpui hulum chu a hmusit a, Khaltu au ri a hre ngai lo

⁸A tlatna tlangpui dung a ni a, Thil hring apiang a zawng chhuak thin.

⁹I tan selepa chu chhawr theih em ni ang? I ran inah a riak duh ang em?

¹⁰Lei lehnaah hrui i bahtir thei ang em? I hnungah lei ruam a rawn chawk rual ang em ni?

¹¹A chak em avang maiin i ring thei dawn em ni? I hna chu i kawltir dawn em ni?

¹²I buhte i hruih zawla rawn dah khawm turin I ring mai thei em ni?

¹³Ostrich thla uangthuang takin a inkhawng vel a; mahse, a thla ki leh a hmulte chu an ngilnei em ni?

¹⁴Leiah a tui a hnutchhiah a, Vaivutah a khuh lum a,

¹⁵Miin a rap keh thei a, Ramsaten an chil keh thei tih a hre leh tawh lo.

¹⁶Ama no ni lo ang hrimin a note lakah a inchhu ngawng a, A thiltih chu a thlawn dawn emaw, a pawisa chuang lo.

¹⁷Pathianin finna a haihchhamtir a, Hriatthiamna a pek hek loh avangin.

¹⁸Tlan bo tuma a han insingsak meuh chuan Sakawr leh a chungchuangte chu a tham lo mai.

¹⁹Sakawr chaknate hi i pek em ni? A nghawngah thahrui i ban em ni?

²⁰Khau anga kat turin i siam em ni? A hnar tum dur dur hlauhawmzia te hi!

²¹Phai ruamah a ke a phiat tlut tlut a, A tha a so a, indo hriamhrei hmachhawn turin a chhuak a;

²²Hlauh reng a hre lo a, a zam ngai lo a, Khandaih lakah a tim ngai hek lo.

²³A chungah thla bawm a ri rawk rawk a, Fei leh thal a tle zawr zawr mai a.

²⁴Hlauhawm tak leh thinur takin a khawh puat puat a, tawtawrawt thawmah a ding hle hle thei lo.

²⁵tawtawrawt a rik phawt chuan, "Chei, Chei,' a ti a. Inbeihna chu hla takah a rim a hria a, Hotute rawl leh inbeihna hawhaw nen.

²⁶I finna avangin mu chu a thlawk chhoin Chhim lamah thla a zar em ni?

²⁷Muvanlai thlawk chho leh sang taka bu a chhep hi i thupek em ni?

²⁸Kham kovahte an cheng a, Lung tohlawt hmun him takah a riak thin.

²⁹chuta tang chuan ei tur a bihthla a, A mit chuan hla tak a hmu.A note pawhin thisen an dawt a, Saruang awmnaah chuan a awm zel a ni.

³⁰A note pawhin thisen an dawt a, Saruang awmnaah chuan a awm zel a ni.