Read Baibul, Mizo Joba 6 Bible Online

Joba 6 - Baibul, Mizo bible

Joba 6

¹Tichuan, Joba chuan a chhang a, heti hian a ti a,

²Aw, ka manganna hi buk ni teh se la, Ka vanduaina hi buknaah dah ni teh se la!

³Tuipui tiau aiin a rit dawn si: Chuvang chuan ka thu a bung a ni.

⁴Engkimtitheia thal ka chungah a awm si a, A tur chu ka thlarauin a in zo a; Pathian tihbaiawmna chuan mi ep a.

⁵Ram sabengtungin hlobet a peh laiin a hram em ni? Bawngpa pawh a buhpawl chungah a bu em ni?

⁶Tuina nei lo chu chi tel loin a ei theih em ni? Artui pawnvar pawh hian hanna a nei em ni?

⁷Ka nunna hian khawih pawh a duh lo e, Ka tan ei tur tenawm tak ang a ni.

⁸Aw, ka dil chu hmu thei teh i la! Pathianin ka thil chak chu mi te pe teh se!

⁹Pathianin mi rawtsawm mai duh teh se! A kut lekin mi tan chhum mai teh se la!

¹⁰Chuti pawhin thlamuanna ka la nei cheu, A ni, ka lawm cheu vang, natna thlah loh chung pawhin, Mi thianghlima thu chu ka phat loh avangin.

¹¹Ka chakna hi eng nge nia, ka han nghah rengna tur chu? Ka tawpna eng nge nia, ka han dawh rengna tur chu?

¹²Ka chakna hi lung chakna em ni? ka tisa pawh hi dar em ni?

¹³Tha han so tur reng ka nei lo a, Keimahah sawm khawm tur reng a awm lo.

¹⁴Chau tep tawh chungah chuan a thian a ngilnei tur a ni a. Engtimtithei tihna hawisantu chungah pawh.

¹⁵Ka unaute chu kawrte rum anga bumhmang an ni a, Kawrte tui relhtu ang mai hi;

¹⁶Tui khal avanga lo duma, Vur inthup thinna chu:

¹⁷A lum hun chuan an kang thin a, A lo sat chuan an hmun ata an bo thin.

¹⁸Sumdawng rualte chuan an kawng an rawn pensan a, Ram rovah an lut a, an boral a.

¹⁹Tema sumdawng rualte chuan an en a. Seba khualzinte chuan an beisei a;

²⁰An beisei tak a, an hlawhchham a, An va kal a, an hrilhhai a.

²¹Ka chungah chutiang chauh chu in ni, Ka chhiat tawh in hmu a, in hlau a.

²²'Mi pe teh u' emaw, 'In sum in pai mi hlan teh u' emaw

²³Hmelma kut ata mi chhan chhuak teh u' emaw Hnehchhiahtute kut ata mi tlan teh u' emaw ka ti em ni?

²⁴Mi zirtir u la, ka ngawi ang e; Ka bona lai mi hriattir rawh u.

²⁵Thu dik chu a chak em em! mahse, in thu hian eng nge a thawh?

²⁶Tawng mai mai hi zilh in tum em ni? Mi mangang tawng hi thli ang mai a ni.

²⁷A ni, pa nei lo chungah thum in vawr duh a, Sumdawnna'n in thian in hmang a.

²⁸Tunah mi en teh mah u, In hmai hmaah ka daw hauh lo ang.

²⁹Lamlet u la, mi dem mai teh suh u, Lamlet u la, ka thu rel fel a la ni hlei nem.Ka leiah dik lohna a awm em ni? Thil tha lo chu a thlei thei lo em ni?

³⁰Ka leiah dik lohna a awm em ni? Thil tha lo chu a thlei thei lo em ni?