Read Baibul, Mizo Sam 104 Bible Online

Sam 104 - Baibul, Mizo bible

Sam 104

¹Aw ka nunna, LALPA chu fak rawh. Aw LALPA ka Pathian, nang chu i ropui em em a;

²Chawimawina leh ropuinain i inthuam a. Nang chuan eng chu puan angin i inbel a; Vante khi puan in chung angin i kai pharh a:

³Ani chuan a pindan chungnung kalkhangte chu tuiahte khian a khang a: Chhumte khi a tawlailirah a siam a; Thli thla chungahte chuan a leng a:

⁴A vantirhkohte chu thliahte a chantir a; A rawngbawltute chu mei alh dur durah a chantir thin:

⁵Leilung nghahchhante chu a phum a, Kumkhuaa a nghin lohna'n.

⁶Nang chuan leilung hi tui thuk tak chu puan angin i sintir a; Tuite chu tlang chungahte chuan a awm po a.

⁷I zilhhauna avang chuan a tlan bo a; I khawpui ri thawm avang chuan a kal bo ta thuai a;

⁸Tlangahte a chho a, kawrahte a chhuk a, A tan hmun i buatsaih lamah chuan.

⁹A pelh loh turin ri i kham a; Lei chim pil tura alet leh tawh lohna turin.

¹⁰A ni chuan kawrahte chuan tuihnate a tir chhuak a; Tlang karahte chuan a luang a:

¹¹Chungte chuan ram sa tinrengte in tur a pe thin a; Ram sabengtungte chuan an tuihal an tireh thin.

¹²A kamahte chuan chungleng savante awmna an nei thin a. Thing buk zingahte chuan an hram thin.

¹³Ani chuan a pindan chungnung atangte khian tlangte chu tuiin a chawm thin a: Lei hi i thiltih rahtein a tlai thin

¹⁴Hlobet chu rante tan a totir thin a, Thlai chu mihring hmanah a totir bawk thin; Lei atangin ei tur a chhuahtir theihna'n:

¹⁵Mihring thinlung tihlawmna uain nen, A hmai tihmawmna tur hriak nen, Mihring thinlung tihchakna chhang nen.

¹⁶LALPA thingte chu a tlai thin; Lebanon tlanga sidar thing a phunnate chu.

¹⁷Chutah chuan savaten bu an chhep thin: Vacha erawh chu far thingte chu a in a ni.

¹⁸Tlang sangte chu sathar tan ani a; Luipuite chu sazupui tan inhumhimna a ni.

¹⁹Ani chuan thla khi hunbi hriatna'n a ruat a: Ni khian a tlak hun chu a hre thin.

²⁰Nang chuan thim i siam a, zan a lo ni thin a; Chu mi hunah chuan ramhnuaia sa tinrengte chu an tla chuak thin.

²¹Sakeibaknei vanglaite chuan an sa seh tur chu hahum zuiin, Pathian hnen ata an ei tur an zawng thin.

²²Ni a chhuak a, an kal bo a, An awmna puk theuhvahte chuan an mu thin a.

²³Mihring chu hna thawkin a chhuak a, Tlai lam thlengin a thawk rim thin.

²⁴Aw LALPA, i thiltihte chu a va tam em! Finnain i siam vek a ni: Leilung hi i hausaknain a khat a nih hi.

²⁵Sawta saw tuifinriat a awm, nasa tak, zau tak mai chu, Saw mi-ah sawn thil bawkvaka kal chhiar sen loh a awm a, Sa te leh sa liante chu.

²⁶Sawta saw lawngpuite a kal saw; Sawtah sawn Liviathan a awm, a chhunga inkhel tura i siamna chu.

²⁷Chung zawng zawng chuan an nghak theuh che a ni, A hun taka an chaw i pek theih thinna turin.

²⁸Anmahni i pek an chhar thin a; I kut i phar a, thatnain an tlai thin.

²⁹I hmai i thup a, an mangang thin a; An thaw chu i laksak a, an thi a,

³⁰An vaivutah chuan an kir leh thin. I thlarau chu i tir chhuak a, siamin an awm thin a; Lei chung pawh hi i siam thar leh thin.

³¹LALPA ropuina chu kumkhuain awm se la; LALPA ch a thiltihahte chuan hlim rawh se:

³²Ani chuan lei hi a en a, a khur thin a; Tlangte chu a khawih a, a khu chhuak thin.

³³Ka dam chhung zawngin LALPA chawimawiin hla ka sa ang a: Ka nun chhung zawngin ka Pathian fakin ka zai ang.

³⁴Ka ngaihtuahna hi a tan thlum ak ni rawh se; Kei chu LALPA-ah chuan ka hlim ang.Mi sualte chu lei atang hian tihboralin awm se la, Mi suaksualte chu awm tawh suh se. Aw ka nuna, LALPA chu fak rawh. LALPA chu fak rawh u.

³⁵Mi sualte chu lei atang hian tihboralin awm se la, Mi suaksualte chu awm tawh suh se. Aw ka nuna, LALPA chu fak rawh. LALPA chu fak rawh u.