Read Baibul, Mizo Sam 108 Bible Online

Sam 108 - Baibul, Mizo bible

Sam 108

¹Aw Pathian, ka thinlung hi a nghet a ni; Hla ka sa ang, a ni, fakna hla ka sa ang, ka ropuina ngeiin.

²Perhkhuang leh tingtangte u, harh rawh u: Kei chu zing takah ka harh ang.

³Aw LALPA, mi tin, zingahte lawm thu ka hrilh ang che: Hnam tin zingah nangmah fakin ka zai ang.

⁴I ngilneihna chu van khum khawpin a nasa si a, I thutak chuan van dumte khi a tawng hial bawk a.

⁵Aw Pathian, nang chu van khum daih khian chawimawiin lo awm ang che: I ropuina chu leilung zawng zawng chungah hian chawimawiin awm bawk rawh se.

⁶I duh takte hi chhanhima an awm theihna'n, I kut ding lamin chhandam la, min chhang ang che.

⁷Pathianin a thianghlimnaah chuan heti hian a sawi a, "Ka hlim ang a: Sekem khua chu ka sem ang a, Sukoth ruam chu ka sem darh bawk ang.

⁸Gilead ram chu ka ta a ni a; Manase ram ka ta ani a; Ephraim ram pawh chu ka lu humhimna a ni a; Juda ram chu ka laltiang a ni.

⁹Moab ram chu ka insilna bel a ni a; Edom rmaah chuan ka pheikhawk ka paih ang a: Philistia ram chu ka au khum ang.

¹⁰Khawpui kulh neiah chuan tuin nge mi hruai lut ang? Edom ramah chuan tuin nge mi hruai ang?

¹¹Aw Pathian, nangin min thlauthla a ni lo'm ni? Aw Pathian, kan sipaihote hnenah lah i chhuak ve ta si lo.

¹²Dotute bei turin min tanpui ang che: Mihring tanpuina chu engmah lo mai mai a ni si a.Pathian zarah huai takin kan ti ang: Ani chu min dotute rap bettu tur a ni si a.

¹³Pathian zarah huai takin kan ti ang: Ani chu min dotute rap bettu tur a ni si a.