Read Baibul, Mizo Sam 119 Bible Online

Sam 119 - Baibul, Mizo bible

Sam 119

¹Kawnga mi tha famkimte chu an eng a thawl e, LALPA dan zawhtute chu.

²A thuhriattirte zawmtute chu an eng a thawl e, Thinlung zawng zawnga zawngtute chu.

³A ni, anni chu fel lohna reng reng an ti lo a; A kawngahte chuan an kal thin.

⁴Nangin i thununna thute chu thupekin min pe a, Thahnemngai taka kan zawm theihna turin.

⁵Aw, i thuruatte chu zawm turin Ka awm dante hi tihnghehin awm teh se la aw!

⁶Chu mi hunah chuan ka mualpho lo ang, I thupekte zawng zawng ka pawisak hunah chuan.

⁷Thinlung dik tak puin lawm thu ka hrilh ang che, I rorelna felte chu ka zir hunah chuan.

⁸I thuruat chu ka zawm ang e. Aw mi kalsan hlen suh ang che.

⁹Tleirawlin engtin nge a awm dan a tihthianghlim ang? I thu ang zela a awm dan veng thain.

¹⁰Ka thinlung zawng zawng hian ka zawng chia: Aw, i thupekte ka kal bosan chu phal lul suh ang che.

¹¹I chunga thil ka tihsual lohna'n I thu chu ka thinlungah ka khawl khawm a.

¹²Aw LALPA, i eng a thawl e; I thuruatte chu mi zirtir ang che.

¹³I kaa i rorel chhuak zawng zawngte chu Ka hmuiin ka hriattr ta.

¹⁴I thuhriattir kawngah chuan ka hlim a, Hausakna zawng zawnga ka hlim ang maiin.

¹⁵I thununna thute chu ka ngaihtuah ang a, I kawngte chu ka ngaihsak bawk ang.

¹⁶I thuruat chungahte chuan ka lawm ang a: I thu chu ka theihnghlh lo ang.

¹⁷Ka nun theihna turin i chhiahhlawh chungah hian tha takin ti ang che; Chutichuan i thu ka zawm ang.

¹⁸I dan thu atanga thilmak ka hmuh theihna'n, Ka mitte hi mi tihvarsak ang che.

¹⁹Leiah hian mikhual ka ni a: I thupekte chu ka lakah zep suh ang che.

²⁰Ka nunna hi keh sawmin a awm a, Englai pawha i rorelnate a ngaih avangin.

²¹Mi chapo, anchhe dawngte chu, i zilhhau a, I thupekte vah bosan thinte chu.

²²Sawi chhiatna leh hmusitna hi ka hnen ata la bo ang che; I thuhriattirte chu ka zawm si a.

²³Mi liante pah an thu a, mi sawisel a: Nimahsela i chhiahhlawh hian i thu ruatte chu a ngaihtuah zawk si a.

²⁴I thuhriattirte chu ka lawmna a ni a, Rem mi ruatsaktute pawh a ni.

²⁵Ka nunna hi vaivutah a bet tlat a: I thu ang zelin mi tiharh ang che.

²⁶Ka awm dante chu ka hriattir chian, nangin mi chhang a: I thuruatte chu mi zirtir ang che.

²⁷I thununna kawng chu mi hriat thiamtir ang che: Chutichuan i thilmak tih thute chu ka ngaihtuah ang.

²⁸Ka nunna hi lungngaih avangin ka tuiral thin. I thu ang zelin mi tichak ang che.

²⁹Awm dan dik lo hi ka hnen ata la sawn la: I dan khawngaih takin mi pe ang che.

³⁰Awm dan rinawm ka thlang a: I rorelnate ka hmaah ka awmtir a.

³¹I thuhriattirahte hian ka bet tlat a: Aw LALPA, mi timualpho suh ang che.

³²I thupek kawngah chuan ka tlan ang. Ka thinlung hi i tihzau hunah chuan.

³³Aw LALPA, i thuruat kawng chu mi entir ang che; Tichuan a tawp thlengin ka zawh dawn nia.

³⁴Hriat thiamna mi pe ang hche, tichuan i dan chu ka vawng tha dawn nia; A ni, ka thinlung zawng zawng hian ka zawm ang.

³⁵I thupek kawngah mi kaltir ang che; Chu mi-ah chuan ka lawm si a.

³⁶I thuhriattir lamah chuan ka thinlung hi thlektir ang che, Duhamna lamah ni loin.

³⁷Thil engmah lo mai mai en lo turin ka mit mi laktir la, I kawngahte chuan mi tiharh ang che.

³⁸I thu chu i chhiahhlawh hnenah hian tinghet ang che, Chu chu nangmah tihtu tan a ni.

³⁹Mi sawichhiatna ka hlauh hi la bo ang che, I rorelte chu a tha si a.

⁴⁰Ngai teh, i thununa thute chu hriat ka chak thin a: I felna avangin mi tiharh ang che.

⁴¹Aw LALPA, i ngilneihnate chu ka hnenah lo kal rawh se, I chhandamna ngei chu, i thu ang zelin.

⁴²Chutichuan, mi sawi chhetu chhanna tur ka nei ang; I thu ka ring si a.

⁴³Tin, thutak thu chu ka ka ata hi la chhuak vek suh ang che; I rorelnate chu ka beisei si thin a.

⁴⁴Chutichuan i dan chu ka zawm fo ang, Kumkhaw tlaitluanin.

⁴⁵Tin, dip dal loin ka leng ang; I thununna thute chu ka zawng si a.

⁴⁶I thuhriattir thute chu lalho hmaah ka sawi ang a, Ka zak lo ang.

⁴⁷Tin, i thupek, ka ngaihnat chungahte chuan, Ka lawm ang.

⁴⁸I thupek, ka ngaihnat lamahte chuan ka kutte ka phar ang a; I thuruatte chu ka ngaihtuah ang.

⁴⁹I chhiahhlawh hnena thutiam chu hre reng ang che, Nangin mi beiseitir avangin.

⁵⁰Chu chu ka hrehawmnaah pawh ka thlamuanna a ni: I thu chuan mi tiharh ta si a.

⁵¹Chapote chuan nasa takin mi nuihzabur a: Nimahsela i dan chu ka kalkawisan lo.

⁵²Aw LALPA, hmasanga i rorelte chu ka hre reng a, Ka inthlamuan thin.

⁵³Lungnih lohna nasa tak hian mi tlakbuak ta a, Mi suaksual i dan kalsantute avangin.

⁵⁴Ka khualzinna inah hian I thuruatte chu ka hla a ni thin.

⁵⁵Aw LALPA, zanah chuan i hming ka hre reng thin a, I dan pawh ka zawm thin.

⁵⁶Chung chu ka nei a, I thununa thute chu ka vawn that avangin.

⁵⁷LALPA chu ka chanvo a ni: I thu ka zamw ang tih ka sawi tawh kha.

⁵⁸Ka thinlung zawng zawngin i khawngaihna ka ngen a: I thu ang zelin mi khawngaih ang che.

⁵⁹Ka awm dante ka ngaihtuah a, I thuhriattir lamah chuan ka ke ka pen ta a.

⁶⁰I thupekte zawm turin Ka hmanhmawh a, rei ka rial lo.

⁶¹Mi suaksualho hruaihrualte chuan mi zem hlawm reng a; Nimahsela i dan chu ka theihnghilh lo.

⁶²Zan laiah lawm thu hrilh tur chein ka hto ang, I rorel felte avangin.

⁶³Nangmah tihtu zawng zawng leh, I thununna thute zawmtute thian ka ni.

⁶⁴Aw LALPA, leilung hi i ngilneihnain a khat a ni: I thuruatte chu mi zirtir ang che.

⁶⁵Aw LALPA, i thu ang zelin I chhiahhlawh hi i titha thin.

⁶⁶Ngaihtuah thiamna leh hriatna mi zirtir ang che; I thupekte chu ka ring si a.

⁶⁷Tihhreawma ka awm hma khan ka vak bo thin a; Tunah erawh chuan i thu ka zawm ta.

⁶⁸Nang chu i tha a, thil tha i ti bawk a; I thuruatte chu mi zirtir ang che.

⁶⁹Chapote chuan ka chungah dawt an phuahchawp a: Ka thinlung zawng zawng hian i thununna thute chu ka vawng tha ang.

⁷⁰An thinlung chu rilbawh thau angin a thau a; Kei erawh chu i dan chungah ka lawm thin.

⁷¹I thuruatte chu ka zir theihna'na Tihhreawma ka lo awm kha ka tan a tha a ni.

⁷²Rangkachak leh tangka sang tam tak ai chuan I kaa dan chhuak chu ka tan a tha zawk e.

⁷³I kutin mi siamin, mi din a ni: I thupekte chu ka zir theihna'n hriatthiamna mi pe ang che.

⁷⁴Nangmah tihtute chuan mi hmu ang a, an lawm ang; I thu chu ka beisei thin avangin.

⁷⁵Aw LALPA, i rorelte chu a fel tih leh, Nang chuan rinawm takin a ni, mi tihhreawm ni tih ka hria.

⁷⁶I chhiahhlawh hnena i thutiam ang zelin Khawngaih takin i ngilneihna chu ka thlamuanna tur ni rawh se.

⁷⁷Ka nun theihna turin i lainatnate ka hnenah lo kal rawh se: I dan chu ka lawmna a ni si a.

⁷⁸Chapote chu mualphoin awm rawh se; dik lo takin mi titlawm ta si a: Nimahsela i thununna thute chu ka ngaihtuah ang.

⁷⁹Nangmah tihtute chu ka lamah hawi rawh se, Tichuan i thuhriattirte chu an hre dawn nia.

⁸⁰Ka mualpho lohna turin Ka thinlung hi i thuruatahte chuan tha famkimin awm rawh se.

⁸¹Ka nunna hi i chhandamna ngaiin a chau ta a: Nimahsela i thu ka beisei thin.

⁸²I thu thlirna'n ka mit a vai zo ta a, "Nangin engtikah nge mi thlamuan ang?" ka ti, ka ti thin a.

⁸³Meikhu ur savun peng ang chu ka lo ni ta si a; Nimahsela i thuruatte chu ka theihnghilh lo e.

⁸⁴I chhiahhlawh kum chin tur hi engzat nge ni dawn? Mi tiduhdahtute chungah hian engtikah nge ro i rel dawn?

⁸⁵Mi chapo, i dan anga awm lote chuan, Ka tlakna'n khuarkhurumte an lai a

⁸⁶I thupek zawng zawng hu a rinawm a ni: Anni chuan dik lo takah mi tihduhdah thin hi; mi tanpui ang che.

⁸⁷Anni chuan leiah hian mi tiboral thelh thelh a; Nimahsela i thununna thute chu ka hawisan si lo a.

⁸⁸I ngilneihna ang zelin mi tiharh ang che; Chutichuan i kaa thuhriattir chu ka zawm dawn nia.

⁸⁹Aw LALPA, kumkhua atan I thu chu vanah nghet takin a awm a.

⁹⁰I rinawmna chu chhuan zawng zawng thlengin a awm ang: Leilung hi i tinghet a, a awm reng a ni.

⁹¹Chungte chu vawiin hian i rorelte angin an awm reng a; Thil zawng zawng chu i chhiahhlawhte an ni si a.

⁹²I dan chu ka lawmna ni suh se la chuan, ka hrehawmnaah khan ka boral tawh tur a ni.

⁹³I thununna thue chu engtikah mah ka theihnghilh lo ang; Nangin chung chun mi tiharh ta si a.

⁹⁴I ta ka nih hi, mi chhandam ang che; I thununna thute chu ka zawng si a.

⁹⁵Mi suaksualte chuan mi tihboral tumin mi nghak thin a; Nimahsela i thuhriattirte chu ka ngaihtuah ang.

⁹⁶That famkimna zawng zawng tawp chu ka hmu ta a, I thupek erawh chu a zau khawp mai a ni.

⁹⁷Aw, i dan hi ka va ngaina em! Nilenga ka ngaihtuah thin a ni.

⁹⁸I thupekte chuan mi dotute aia fing zawkin mi siam a; Kumkhuaa ka hnena a awm fo thin aangin.

⁹⁹Min zirtirtu zawng zawng aiin finna ka nei zawk a ni; I thuhriattirte hi ka ngaihtuah a nih thin avangin.

¹⁰⁰Tarte ai chuan ka hre thiam zawk a ni, I thununna thute hi ka vawn that avangin.

¹⁰¹I thu ka zawm theihna turin Kawng sualah reng reng chuan ka kete hi pen ka phal lo.

¹⁰²I rorelna lakahte chuan ka peng lo; Nangin mi zirtir avangin.

¹⁰³I thute hi ka tan a va thlum em! A ni, ka ka atan a va thlum em! A ni, ka ka atan chuan khawizu aiin a thlum zawk.

¹⁰⁴I thununna thute avangin hriat thiamna ka nei thin: Chuvangin awm dan dik lo tinreng hi ka hua a ni.

¹⁰⁵I thu hi ka ke atante hian khawnvar a ni a, Ka kawng atan eng a ni.

¹⁰⁶I rorelna fel takte chu zamw turin Chhia ka chham a, ka tinghet bawk a.

¹⁰⁷Nasa taka tihhreawmin ka awm a: Aw LALPA, i thu ang zelin mi tiharh ang che.

¹⁰⁸Aw LALPA, khawngaih takin ka kaa duh thua thilpekte hi la la, I rorelnate chu mi zirtir ang che.

¹⁰⁹Ka nunna hi ka kutah a awm fo thin a; Nimahsela, i dan chu ka theihnghilh ngai lo.

¹¹⁰Mi suaksualte chuan ka awhna'n thang an kam a; Nimahsela i thununa thute chu ka vah bosan lo e.

¹¹¹I thuhriattirte chu kumkhuaa rochunah ka la a; Ka thinlung tihlimtu a ni si a.

¹¹²Kumkhuain, a tawp thlengin, I thuruatte anga ti turin ka thinlung ka thlektir a.

¹¹³Rilru mumal nei lo mite chu ka hua a; I dan erawh chu ka ngaina a ni.

¹¹⁴Nang chu ka bihrukna hmun leh ka phaw i ni a: I thu ka beisei a ni.

¹¹⁵Nangni thil tha lo titute u, mi kalsan rawh u; Ka Pathian thilpekte ka vawn that theihna'n.

¹¹⁶Ka nun theihna turin i thu ang zelin mi chelh reng la, Ka beisei chungah hian zakin mi awmtir suh ang che.

¹¹⁷Mi kai ang che, tichuan ka him ang a, I thuruatte chu ka pawisa fo dawn nia.

¹¹⁸I thuruatte vah bosantu zawng zawng chu i hmusit a; An bumna hchu dawt a ni si a.

¹¹⁹Leia mi suaksualte zawng zawng chu englo ekchhia angin i tibo thin a: Chuvangin i thuhriattirte chu ka ngaina a ni.

¹²⁰Ka tisa hi nangmah tihin a khur a; I rorelnate chu ka hlau bawk a.

¹²¹Ro ka rel a, fel takin ka ti thin a ni: Mi hnehchhiahtute lakah mi thlahthlam suh ang che.

¹²²I chhiahhlawh chungchang thu-ah, a thatna turin a bul tum la: Chapoten mi hnehchhiah suh se.

¹²³I chhandamna thlirna'n ka mit a vai zo ta a, I thu fel tak thlirna'n nen.

¹²⁴I ngilneihna avangin i chhiahhlawh chungah hian ti la, I thuruatte chu mi zirtir ang che.

¹²⁵I chhiahhlawh ka ni a, hriat thiamna mi pe ang che; I thuhriattirte chu ka hriat theihna'n.

¹²⁶LALPA, thawh a hun ta; I dan hi engmah loah an siam ta si.

¹²⁷Chuvangin i thupekte chu rangkachak aiin ka ngaina a ni, A ni , rangkachak thianghlim ai pawhin.

¹²⁸Chuvangin kawng tinreng thua i thununna thu zawng zawngte chu dikin ka hria a; Awm dan dik lo tinreng hi ka hua a ni.

¹²⁹I thuhriattirte chu a mak a ni: Chuvangin ka nunna hian a vawng tha thin.

¹³⁰I thu hrilhfiah hian mite a tieng a; Mi mawlte chu a hriat thiamtir thin.

¹³¹Ka ka ka ang zau a, ka thaw hlawp hlawp a; I thupekte chu ka chak avangin.

¹³²Ka lam lo hawi la, mi khawngaih ang che, I hming ngainatutte i khawngaih ang khan.

¹³³Ka ke pente hi i thu-ah tinghet la; Sualna reng reng ka chungah thu neihtir suh ang che.

¹³⁴Mihring hnehchhiahna lakah chuan mi chhanhim ang che: Chutichuan i thununna thute chu ka zawm dawn nia.

¹³⁵I hmelin i chhiahhlawh chhun eng la; I thuruatte chu mi zirtir ang che.

¹³⁶Ka mittui hi lui tui angin a luang thla a, I dan an zawm loh avangin.

¹³⁷Aw LALPA, nang chu i fel a, I rorelte pawh a dik a ni.

¹³⁸I thuhriattirte chu fel tak leh Rinawm em emin thu i pe a.

¹³⁹Ka thehnemngaihna hian mi tiboral ta, Mi dotuten i thu an theihnghilh tak avangin.

¹⁴⁰I thu hi a thianghlim em em a ni; Chuvangin i chhiahhlawh hian a ngaina a ni.

¹⁴¹Mi te leh mi hmusit ka ni a: Nimahsela i thununna thute chu ka theihnghilh ngai lo e.

¹⁴²I felna chu kumkhaw felna tur ani a, I dan pawh thutak a ni.

¹⁴³Manganna leh thlaphanna chuan mi tlakbuak ta a: Nimahsela i thupekte hi ka lawmna a ni.

¹⁴⁴I thuhriattirte chu kumkhua atan a fel a ni: Hriat thiamna mi pe ang che, tichuan ka nung reng ang.

¹⁴⁵Ka thinlung zawng zawngin ka ko chia; aw LALPA, mi chhang ang che: I thuruatte chu ka vawng tha dawn nia.

¹⁴⁶Ka ko thin chia; mi chhandam ang che. Tichuan i thuhriattirte chu ka zawm dawn nia.

¹⁴⁷Khawfing chat chu ka khalh a, ka au thin a: I thute chu ka beisei thin.

¹⁴⁸I thu ka ngaihtuah theihna turin Ka mitin zan vente chu ka men khalh thin.

¹⁴⁹I ngilneihna ang zelin ka aw hi ngaithla la: Aw LALPA, i rorelnate ang zelin mi tiharh ang che.

¹⁵⁰Ngaihtuahna sual umho chuan an an rawh hnaih a; Anni chu i dan hlata awm an ni.

¹⁵¹Aw LALPA, nang chu i hnai a; I thupek zawng zawng chu thutak a ni.

¹⁵²Hmasangin, i thuhriattirte atangin, Chung chu kumkhua atan i tinghet tih ka lo hre tawh.

¹⁵³Ka hrehawmzia hi ngaihtuah la, mi chhanhim ang che; I dan chu ka theihnghilh ngai si lo a.

¹⁵⁴Ka thu mi sawipuiin, mi tlann la; I thu ang zelin mi tiharh ang che.

¹⁵⁵Chhandamna chu mi suaksualte laka hla a ni; I thuruatte chu an zanw loh avangin.

¹⁵⁶Aw LALPA, i lainatnate chu a nasa a ni: I rorelnate ang zelin mi tiharh ang che.

¹⁵⁷Mi tiduhdahtute leh mi dotute chu tam tak an ni. Nimahsela i thuhriattirte chu ka kal kawisan lo.

¹⁵⁸Vervek taka titute chu ka en a, ka lungni lo a; I thu an zawm loh avangin.

¹⁵⁹I thununna thute ka ngainatzia hi ngaihtuah la; Aw LALPA, i ngilneihna avangin mi tiharh ang che.

¹⁶⁰I thu infinkhawm chu thutak a ni a; I thu infinkhawm chu thutak a ni a, I rorelna fel tinreng pawh hi kum khuain a awm reng ang.

¹⁶¹Mi lianten enga khawlawi loin mi tiduhdah a; Nimahsela ka thinlung chuan i thute a ni, a hlauh ni.

¹⁶²I thu-ah hian ka hlim a ni. Thil ropui tak rallaka hmutu angin.

¹⁶³Dawt hi ka huain ka ten a; I dan erawh chu ka ngaina a ni.

¹⁶⁴Ni khatah vawi sarih ka fak thin che a ni. I rorel felte avangin.

¹⁶⁵I dan ngainatute chuan thlamuanna nasa tak an nei a, Tlukna reng reng an nei lo.

¹⁶⁶Aw LALPA, i chhandamna ke beisei reng a, I thupekte angin ka ti thin.

¹⁶⁷Ka nunna hian i thuhriattirte chu a zawm thin a; Ka ngaina em em a ni.

¹⁶⁸I thununna thute leh i thuhriatirte chu ka zamw thin a; Ka awm dan zawng zawng hi i hmaa awm ani si a.

¹⁶⁹Aw LALPA, ka au thawm hi i hmaah lo hnai rawh se: I thu ang zelin hriat thiamna mi pe ang che.

¹⁷⁰Khawngaih ka dilna hi i hmaah thleng rawh se: I thu ang zelin mi chhanhim ang che.

¹⁷¹Ka hmui hian fakna thu sawi rawh se; Nangin i thuruatte chu mi zirtir thin avangin.

¹⁷²Ka lei hi i thu fakin zai rawh se; I thupek zawng zawng chu felna a ni avangin.

¹⁷³I kut chu mi tanpui turin inpeihsain awm rawh se: I thununa thute chu ka thlang si a.

¹⁷⁴Aw LALPA, i chhandamna chu ka chak thin a; I dan chu ka lawmna a ni.

¹⁷⁵Ka nuna hi nung rawh se, tichuan a fak dawn che nia. I rorelnate pawhin mi tanpui rawh se.Beram bo angin ka vak bo a; i chhiahhlawh hi zawng ang che; I thupekte chu ka theihnghilh ngai si lo a.

¹⁷⁶Beram bo angin ka vak bo a; i chhiahhlawh hi zawng ang che; I thupekte chu ka theihnghilh ngai si lo a.