Read Baibul, Mizo Sam 80 Bible Online

Sam 80 - Baibul, Mizo bible

Sam 80

¹Aw Israel-ho Vengtu, beram pawl anga Josef-ho hruaitu, beng lo chhi ang che; Nang cherubte chunga thua chu, lo eng chhuak ang che.

²Ephraim-ho leh Benjamin-ho leh Manase-ho mithmuhah chuan i chakna kha chawk tho lo, Mi chhandam turin lo kal ang che.

³Aw Pathian, min hawi kirtir leh la; I hmel kha tieng ang che, tichuan chhandamin kan awm dawn nia.

⁴Aw LALPA, sipaihote Pathian, Eng chen nge i mite tawngtaina chungah hian i thinur dawn le?

⁵Anni chu mittui chhangin i chawm a, Mittui hi in turintehna lian takin i pe thin.

⁶Nangin kan vela mite tan inhnialnaah min siam thin a, Min dotute chu an nui tlang thin.

⁷Aw sipaihote Pathian, min hawi kirtir leh a; I hmel kha tieng ang che, tichuan chhandamin kan awm dawn nia.

⁸Aigupta ram ata grep hrui i rawn la a: Hnam tin chu i hnawt chhuak a, i phun ta a.

⁹A hma i tifai zel a, Thuk takin zung a kai a, ram chu a awh ta vek a.

¹⁰Tlangte chu a hlim tuamin a awm hlawm a, A pengte chu Pathian sidar thingte ang mai a ni.

¹¹A tangte chu tuifinriat thlengin a zam chhuahtir a, A chawrnote chu Luipui thlengin.

¹²Engati nge a palte chu i tihchhiat ni?

¹³Ramhnuaia sanghal chuan a tichhia a,Ram sate pawhin an tlan thin.

¹⁴Aw sipaihote Pathian, khawngaih takin hawi kir leh ang che: Van atang khan rawn en chhuk la, he grep hui hi en la, rawn kan ang che,

¹⁵A kung i kut ding lamin a phun leh, A peng i tana i tihkhauh nen hian.

¹⁶Meiah a kang ta, kihin a awm ta: I hmela zilhhauhna avangin an boral thin.

¹⁷I kut kha i ding lama ki chungah awm rawh se, Mihring fapa i tana i tihchaka chungah hian.

¹⁸Chutichuan kan kirsan lo ang che: Min tiharh la, tichuan i hming kan lam dawn nia.Aw LALPA, sipaihote Pathian, min hawi kirtir leh la; I hmel kha tieng ang che, tichuan chhandamin kan awm dawn nia.

¹⁹Aw LALPA, sipaihote Pathian, min hawi kirtir leh la; I hmel kha tieng ang che, tichuan chhandamin kan awm dawn nia.