Read Baibul, Mizo Sam 86 Bible Online

Sam 86 - Baibul, Mizo bible

Sam 86

¹Aw LALPA, ka lamah hian i beng rawn dawh la, mi chhang ang che; Rethei leh pachhe tak ka nih hi.

²Ka nunna hi vawng tha ang che; Pathian ngaihsak mi ka ni si a: Aw, nang ka Pathian, nangmah ringtu, i chhiahhlawh hi chhandam ang che.

³Aw LALPA, mi khawngaih ang che; Nilengin ka au si thin chia.

⁴I chhiahhlawh nunna hi tihlim ang che; Aw LALPA, ka rilru hi i hnenah ka dah tlat si thin a.

⁵LALPA, nang chu i tha a, ngaihdam i peih a, A kotu apiang che chungah ngilneihna i ngah si thin a.

⁶Aw LALPA, ka tawngtainaah hian beng lo chhi la; Khawngaih ka dilna aw hi ngaithla ang che.

⁷Ka mangan ni chuan ka ko ang che; Nangin mi chhang dawn si a.

⁸Aw LALPA, pathiante zingah nang ang reng reng an awm lo a, I thiltihte ang hi thiltih reng reng a awm hek lo.

⁹Aw Lalpa, i siam hnam tinrengte chu an lo kal ang a, i hmaah an lo kun ang a; I hming chu an rawn chawimawi ang.

¹⁰Nang chu i ropui si a, thilmakte i ti bawk thin a: Nangmah chauh hi Pathian i ni.

¹¹Aw LALPA, i kawng chu mi entir ang che; i thutakah ka awm ang: I hming tih turin thinlung sakhat mi puttir ang che.

¹²Aw Lalpa, ka Pathian, ka thinlung zawng zawngin ka fak ang chia; I hming hi kumkhuain ka chawimawi ang.

¹³Ka chunga i ngilneihna chu a nasain; Ka nunna hi khuarkhurum hnuaihnung ber ata i chhanhim si a.

¹⁴Aw Pathian, mi chapote chuan mi bei a, Mi nunrawng awm khawmte chuan ka nunna hi tihbo tumin an zawng a, nang chu an hmaah an dah thin lo che.

¹⁵Nimahsela, aw LALPA, nang chu Pathian, lainatnaa khat, mi khawngaih thei, Thinnel, ngilneihna leh thutak ngah i ni.

¹⁶Aw, ka lam lo hawi la, mi khawngaih ang che; I chhiahhlawh i chakna pe la. I bawihnu fa hi chhandam ang che.Mi duhsakna tilang ang che; Mi hawtute chuan chu chu an hmuh a, an mualphona turin, LALPA, nangin mi tanpui a, mi thlamuan avangin.

¹⁷Mi duhsakna tilang ang che; Mi hawtute chuan chu chu an hmuh a, an mualphona turin, LALPA, nangin mi tanpui a, mi thlamuan avangin.