Read Baibul, Mizo Thufingte 1 Bible Online

Thufingte 1 - Baibul, Mizo bible

Thufingte 1

¹Israel lal Davida fapa Solomona thufing;

²Finna leh zirtirna, hriat theihna tur te, hriatthiamna thu ngaihruat dan thiamna te;

³Felna te, rorel te, hleih nei loa hmang hre taka zirtirna pawm dan thiamna te;

⁴Mi mawlte remhriatna neihtir tur te, tlangvalte hriatna leh ngaihruat thiamna neihtirna tur leh

⁵Mi fingten an hriat a, an thiamna te a lo pun a, thil ngai thiam miin rorelna fingte a man a man thiamna tur te,

⁶Thufing leh a hrilhfiana te, mi fing thu leh an thuril sawite hriatthiamnate chu.

⁷LALPA tih hi finna bul a ni a; nimahsela mi ate chuan finna leh zirtirna an hmusit thin.

⁸Ka fapa, i pa zirtirna che chu ngaithla la, i nu zirtirna che chu hawisan suh.

⁹I lu tan parthi mawi tak a ni ang a, i nghawng tan thi ang a ni dawn si a.

¹⁰Ka fapa, mi sualin an thlem che chuan zawm suh.

¹¹Hawh te, thisen chhuah turin i chang ang khai, a vang engmah awm loin pawi khawih lote chu i chang ru teh ang;

¹²Seol angin a nung chungin i lem teh ang, an puma khuarkhuruma tla angin.

¹³Thil hlu tak takte kan nei ang a, rallak sumin kan in kan tikhat dawn nia.

¹⁴Kan zingah lo tel ve la, tangka ip kan intawm dawn nia," te an tihin,

¹⁵Ka fapa, an zingah chuan tel ve suh la, an kawng ata inthiarfihlim rawh.

¹⁶An kete chu thil sual lamah an tlan a, thisen chauh turin an hmanhmawh ruai thin.

¹⁷Len chu a lo thlawn maia zar a ni, eng sava mithmuhah pawh.

¹⁸Chungte chuan anmahni thisen an chang a, an nunna chang ru an ni.

¹⁹Chutiang chu a ni, hlawknaa duham apiangte kawng chu; a neitute nun a laksak thin.

²⁰Kawtthlerah finna chu ring takin a au a, kawtthler thuamahte chuan a aw a chhuah a;

²¹Mipui inkhawmna lai berah a au a, khawpuiah khaw luhna kawngkhar bulah chuan a au chhuak a.

²²Nangni mi mawlte u, eng chen nge mawlna in ngainat dawn? Eng chen nge hmusittute hmuhsitnaah in hlim ang a, mi ate'n finna in huat dawn?

²³Ka zilhna che u lamah hian lo hawi rawh u: ngai teh u, in chungah ka thlarau ka leih ang a, ka thu ka hriattir ang che u.

²⁴Ka ko che u a, in duh lo a, ka kut ka phar a, tuma'n in ngaisang lo a;

²⁵Ka remruat zawng zawng chu engmah loah in ngai zawk a, ka zilhna reng reng in pawm duh lo a.

²⁶Chuvangin kei pawh in vanduai ni chuan ka nui ang a, in hlauh hun a lo thlen chuan ka nuihsan ang che u,

²⁷In hlauhna thlipui anga a lo thlen a, in vanduaina thawngaleivir anga a lo thlen a, hrehawmna leh manganna in chunga a lo thlen hunin.

²⁸Chutichuan min ko ang a, nimahsela ka chhang lo ang: zing takah min zawng ang a, nimahsela min hmu lo ang;

²⁹hriatna chu an huat a, LALPA tihna chu an thlan loh avangin:

³⁰Ka remruat pakhat te mah an duh lo a, ka zilhna zawng zawngte chu an ngainep a.

³¹Chuvangin anmahni kawng rah chu an ei ang a, anmahni suangtuahnain an tlai ang.

³²Mi mawlte hnungtawlhna chuan anmahni a that ang a, mi ate hlawhtlinnain anmahni a tiboral ang.Ka thu pawm apiangte erawh chu him takin an awm ang a, thil tha lo hlau loin an awm hle hle ang.

³³Ka thu pawm apiangte erawh chu him takin an awm ang a, thil tha lo hlau loin an awm hle hle ang.