Read Baibul, Mizo Thufingte 20 Bible Online

Thufingte 20 - Baibul, Mizo bible

Thufingte 20

¹Uain hi nuihzatbura mi siamtu a ni a, zupui hi insual bung bungna a ni; chu mi buma awmte chu an fing lo a ni.

²Lal vauna chu sakeibaknei rum ang a ni a, tupawh a thin tiur chu mahni nunna chunga thil tisual an ni thin.

³Intihbuaina ata lo inthiarfihlim hi thil duhawm a ni a, mi a apiangte chu an insual thin.

⁴Mi dawngdah chuan thlasik avangin lei a let peih lo a; chuvang chuan buh seng laiin kut a dawh ang a, engmah a nei lo ang.

⁵Remruatna chu mihring thinlungah tui thuk tak ang a ni a; nimahsela hriatthiamna nei chuan a phawrh chhuak ang.

⁶Rinawm tak niin an insawi theih a, rinawm tak tak tu nge hmu thei ang?

⁷Mi fel, ama remruat thiama awm mi fate chu an nihlawh e.

⁸Rorelnaa lal thu chuan a mitin thil tha lo zawng zawng a tibo thin.

⁹'Ka thinlung ka tithianghlim a, ka sual lakah ka thianghlim,' tu nge ti thei?

¹⁰Bukna dang dang te, tehna dang dangte hi LALPA mithmuhah angkhat rengin thil tenawm a ni ve ve.

¹¹Naupang takngial pawh a thiltihin a intilang thin, a thiltih chu a thianghlim leh a dik emawin.

¹²Hriatna beng leh hmuna mit hi LALPA siam ve ve a ni.

¹³Mut thlahlel suh, i lo pachhe dah ang e; i mit meng la, tichuan chhang kham khawp i nei dawn nia.

¹⁴'Engmah a nih loh hi, engmah a nih loh hi,' thil leitu chuan a ti thin a, a kal hnu chuan a chhuang leh viau si thin.

¹⁵Rangkachak te a awm a, lunghlu sente pawh a tam a; hriatna hmui erawh chu lungmawi hlu tak a ni.

¹⁶Hnam dang tana mawhphurtua inpe silhfen chu la la, tin, hnam dang tana inpe chu hrengah hmang rawh.

¹⁷Bumna chhagn chu miin tui a ti a, mahse a hnuah a ka chu lungtein a khat ang.

¹⁸Mi rawnin i thil tum chu buk la. Fel taka relin hmelma bei rawh.

¹⁹Mi kamtam tei vel ruai chuan thurukte a tilang thin a; chuvangin a ka zau taka ang chu pawl suh.

²⁰A nu emaw, a pa emaw anchhe lawhtu chu, thimtham lai berah a khawnvar tihmihsak a ni ang.

²¹Sum hi atirah deh chhuah thuai theih mah se la, a tawpah malsawm a ni kher lo ang.

²²'Sual chu ka thungrul teh mai ang,' ti suh la, LALPA ngaichang rih la, ani chuan a chhanhim ang che.

²³Bukna dang dang hi LALPA mithmuhah thil tenawm a ni a, khin dik lo hi a tha lo a ni.

²⁴Mihring kawngte chu LALPA ruat a ni a, engtin nge mihringin a kawng an hriat theih ang?

²⁵Pathian tan thil pe turin intiam thut suh, i inchhir leh dah ang e.

²⁶Lal fing chuan mi suaksualte a zap kiang a, an chungah sisep a ruai thin.

²⁷Mihring rilru chu LALPA khawnvar a ni a, pumpui chhungril lam zawng zawng pawh a en chhuak thin.

²⁸Zahngaihna leh thutakin lal a vawng tha a, a thutthleng chu zahngaihnaa tundinin a awm.

²⁹Tlangvalte ropuina chu an chakna a ni, putarte mawina chu an lu tuak a ni,Pem khawpa vuakna chuan thil tha lo a tleng fai a, vuakna chuan pumpui chhungril lamte pawh a fan.

³⁰Pem khawpa vuakna chuan thil tha lo a tleng fai a, vuakna chuan pumpui chhungril lamte pawh a fan.