Read Baibul, Mizo Thufingte 23 Bible Online

Thufingte 23 - Baibul, Mizo bible

Thufingte 23

¹Roreltute nena chaw eia in thut dunin i hmaa mi chun takin en rawh.

²I ril a tam hle chuan insum deuh ang che.

³Bumna chaw mai a nih hre rengin a tuina ngawt it suh.

⁴Intihausa turin intihah suh la, nangma fina fin bang rawh.

⁵Thil awm lo chungah i mit i nghat dawn em ni? Sum chuan thla a insiam ngei ngei a, mupui van lama thlawk thin ang hian.

⁶Mi fir chhang chu ei suh la, a thil tuihnaite it hek suh.

⁷A suangtuah ang chiah zelin a ni, a awm ni, "Ei rawh, in rawh," a ti ang chia; mahse a rilru chuan ngaimawhna che a nei lo.

⁸I chaw bar chu i luak chhuak ang a, i thu thlum tak chu i chan ang.

⁹Mi a benghriatah chuan thu sawi suh, i thu fingte chu a ngainep dawn si a.

¹⁰Hmakhawsanga ramri lo kham chu sawn suh la, pa nei lote loah inrawlh suh.

¹¹Anmahni tlantu chu a chak a, i chungah an thu a sawipui dawn si a.

¹²Zirtirna lamah i rilru nghat la, i beng chu hriatna thu lamah.

¹³Naupang thunun tim suh, tiangin vaw mah la, a thi dawn si lo a.

¹⁴Tiangin i vua ang a, tichuan Seol ata a nunna i chhanchhuak ang.

¹⁵Ka fapa, i rilru a fin chuan ka thinlung a lawm tak tak ang.

¹⁶A ni, i kain thil dik a sawiin ka rilru a hlim ang.

¹⁷I thinlungin mi sual awt suh se; nilengin LALPA tihin awm zawk rawh.

¹⁸Lawmman a awm ngei dawn si a, i beisei chu tihboin a awm lo ang.

¹⁹Ka fapa, ngaithla la, fing la, kawngah chuan i thinlung hruai rawh.

²⁰Uain heh mite zingah leh sa heh mite zingah tel suh;

²¹Zu rui mite leh sa heh mite chu an lo rethei dawn si a. Nguinain puan chhia a sintir ang.

²²I pa, a hringtu che thu pawm la, i nu chu a lo tarin hmusit suh.

²³Thu dik chu lei la, hralh leh tawh suh; a ni, finna te, zirtirna te, hriatthiamnate nen.

²⁴Mi fel pa chu nasa takin a hlim ang a. Fa fing hringtu chuan a chungah lawmna a nei ang.

²⁵I nu leh pa chu hlim takin awm se la, a hringtu che chu hlim takin awm rawh se.

²⁶Ka fapa, i thinlung min pe la, ka awm danahte hian i mit tlung rawh se.

²⁷Nawhchizuar chu khuarkhurum thuk tak a ni a, hmeichhe sual chu khuarkhurum zim a ni;

²⁸A ni, rukru angin mi an chang a, mihring zingah vervekna an tipung thin.

²⁹Tute nge chungpik thin a, tute nge lungngai thin a, tute nge inhau thin? Tute nge thubuai nei thin a, tute nge a vang awm loa hliam tuar thin a, tute nge mit sen rem rum thin le?

³⁰Zu hmuna awm reng thinte, zu chawhpawlh in thinte an ni.

³¹Uain a sen kak laiin en suh, noa a zia a lan lai te, a luan thlak zaih zaih lai tein;

³²A tawpah chuan rul angin a chu a, rul tur tha mi angin mi a chu thin.

³³I mitin thil mak takte a hmu ang a, i thinlungin thu chaltlai takte a chhahchhuak ang a.

³⁴A ni, mi tuifinriat lai taka mu ang emaw, lawng puanzarna chhipa mu ang emaw i ni ang.'Min vua a, a na si lo, min vel a, ka hre lo, engtikah nge ka lo harh ang aw? Kan in leh bawk thin ang,' i ti ang.

³⁵'Min vua a, a na si lo, min vel a, ka hre lo, engtikah nge ka lo harh ang aw? Kan in leh bawk thin ang,' i ti ang.