Read Baibul, Mizo Thufingte 28 Bible Online

Thufingte 28 - Baibul, Mizo bible

Thufingte 28

¹Mi suaksualte chu tuma um lohin an tlanchhia a, mi felte erawh chu sakeibaknei angin an huai.

²Ramin a bawhchhiat chuan puipate an inthlak zut thin, mi thil ngaihdan thiam leh hriatna neitute vang erawh chuan ram chuan a din rei phah ang.

³Mi rethei hnehchiahtu mi renchham chu ei tur engmah hnutchhiah nei loa thli len bo vek ruah ang a ni.

⁴Dan hawisantute chuan mi suaksual an fak thin a, dan zawmtute erawh chuan an kalh thin.

⁵Mi tha lo chuan rorel an hre thiam thin lo a; LALPA zawngtute erawh chuan engkim an hrethiam thin.

⁶Mi hausa awm dan dik loa awm ai chuan mi rethei awm dan dik taka awm chu a tha zawk.

⁷Tupawh dan zamwtu chu fapa fing a ni a, mi virte thian erawh chuan a pa mualphona a thlensak thin.

⁸A pung uma a sum tipungtu chuan mi rethei lainattu tan a khawlsak a ni.

⁹Dan ngaithla duh loa hnuchhawntu chu a tawngtaina pawh tenawm a ni.

¹⁰Mi tha, kawng tha loa kal botirtu chu ama hum laihah ngei a tla ang a, mi tha famkimte erawh chuan thil tha an rochung ang.

¹¹Mi hausa chu ama ngaihin a fing a; nimahsela mi rethei thil ngaihdan thiamte chuan an lai lang ang.

¹²Mi fel hlawhtlinnaah chuan ropuina nasa tak a awm a; mi sual an dinchan erawh chuan mite an biru thin.

¹³Bawhchhiatna zeptute chu an hmuingil lo ang a, zep loa inpuanga hawisantute chuan zahngaihna an hmu ang.

¹⁴LALPA tih reng mi chu a nihlawh e, thinlung tikhauhtu erawh chu vanduainaah a tlu lut ang.

¹⁵Mi rethei chunga roreltu suaksual chu sakeibaknei rum ang leh savawm pawng vak ruai ruai ang a ni.

¹⁶Thil ngaihdan thiam lo hotu chu mi hnechhiahtu a ni thin a, awhna hawtu erawh chuan a dam chhung a tisei ang.

¹⁷Mi thisen phurtu chu khuarkhurumah a tlan lut ang a, tumahin hum suh se.

¹⁸Tupawh dik taka awm chu chhanchhuahin a awm ang a, dik lo taka awm erawh chu a tlu thuai ang.

¹⁹A lei lettu chuan chhang a ngah ang a, mi lelo zuitu erawh chu a pachhe hle ang.

²⁰Mi rinawm chuan malsawmna a ngah ang a, hausak thuai tum erawh chu hrem lohin a chhuak lo ang.

²¹Mi thlei bik neih hi a tha lo a, miin chhang them vangin an bawhchhe tur a ni hek lo.

²²Mi fir chuan sum a um a, a chungah tlakchhamna a lo thleng dawn tih a hre hek lo.

²³Leia mi fak dertu ai chuan mi zilhtu chuan a hnua fak a hlawh tam zawk ang.

²⁴A nu emaw, a pa emaw rawk a, "Bawhchhiatna a ni lo e," titu chu Tiboraltu thian a ni.

²⁵Mi rilru duham chuan inbeina a chawk chhuak a, LALPA-a rinna nghattu erawh chu tihthauin a awm ang.

²⁶Mahni rilru ring maitu chu mi a a ni a, fing taka chetla mi erawh chu chhanchhuah a ni ang.

²⁷Mi rethei thil petu chu a tlachham lo ang a, maimitchhinsantu erawh chuan anchhia nasa tak a dawng ang.Mi suaksual an dinchanin mite an biru a, an boralin mi fel an pung thin.

²⁸Mi suaksual an dinchanin mite an biru a, an boralin mi fel an pung thin.