Read Baibul, Mizo Thufingte 31 Bible Online

Thufingte 31 - Baibul, Mizo bible

Thufingte 31

¹Lal Lamuela thu te, thufing, a nu zirtirte chu.

²Ka fapa, aw ka rila rah, aw ka chhechham fapa, lo ngaithla teh.

³I chakna chu hmeichhia pe suh la, lal tichhe thin hnenah; i nunnate pawh.

⁴Aw Lemuel, lalin uain in tur a ni lo a, roreltute'n, khawiah nge rakzu an ti tur a ni hek lo.

⁵An in chuan, dan an theihnghilh ang a, mi retheite chungah ro an rel dik lo dah ang e.

⁶Boral dawn tepte chu rakzu pe u la, mi lungngai chu uain pe rawh u.

⁷In se la, a pachhiatna chu theihngilh se la, a hreawmzia hre reng lo rawh se.

⁸Tawng thei lote tan i ka ang la, hnuchhawnho zawng zawngte chungchang thu-ah te.

⁹I ka ang la, fel takin ro rel la, mi rethei leh renchhamte chungah ro rel rawh.

¹⁰Hmeichhe khawsak tha tu nge hmu thei ang? A man chu lunghlu sen mi aiin a sang zawk daih si a.

¹¹A pasal thinlung chuan a ring a, chhawrna a hmai lo ang.

¹²A dam chhungin chhe lam ni loin tha lam hlirin thil a tihsak thin.

¹³Beram hmul leh la a zawng a, a kutin lungawi takin a thawk thin.

¹⁴Sumdawng lawng ang a ni a, ram hla tak ata eitur a la thin.

¹⁵Khaw var hmain a tho a, a chhungte ei tur a pe thin; a chhiahhlawh nulate hnenah an tih tur te.

¹⁶Huan tur a ngaihtuah a, a lei a, a kutkawih chhuah ngeiin grep huan a siam thin.

¹⁷Chaknain a kawng a hreng a, a bante a tichak thin.

¹⁸A sumdawnna a hlawk tih a hria a, zanah pawh a khawnvar a mit ngai lo.

¹⁹A kutin hmui kut a chelh a, a kutin hmuithla a vuan a.

²⁰A kut mi rethei lamah a phar a, a ni, renchhamte thlengin a ban phak a.

²¹A chhungte vur a hlauhsak lo a, a chhungte zawng zawng chu puan sen lar sinin an awm si a.

²²Chhuatphah puan mawi a insiam a, a silhfen chu lazai sin mi leh puan senduk a ni.

²³Kulh kawngkaa an ram upate nen an thut hoin a pasal chu a hriat a ni.

²⁴Lazai sin silhfen a siam a, a zuar thin a, sumdawngte hnenah kawnghrente a thawn thin.

²⁵A silhfen chu chakna leh ropuina ani a, hun lo la thleng tura tan pawh a nui a.

²⁶Finnain a ka a ang a, a kaah chuan ngilneihna thu a awm.

²⁷An chhung khawsak dan a en tha a, dawngdahna chhang a ei lo.

²⁸A fate chu an tho a, Engthawli an ti a, a pasal pawhin a fak a.

²⁹Hmeichhe tam tak khawsak tha an awm a. Mahse nang chuan i khum vek a ni, tiin.

³⁰Duhsakna hi bumna a ni a, hmelthatna chu engmah a ni lo. LALPA tihtu hmeichhia erawh chu fak a ni ang.A kutkawih chhuah chu pe la, a thiltihin kulh kawngkaah chuan fak rawh se.

³¹A kutkawih chhuah chu pe la, a thiltihin kulh kawngkaah chuan fak rawh se.