Read Baibul, Mizo Thufingte 4 Bible Online

Thufingte 4 - Baibul, Mizo bible

Thufingte 4

¹Ka fapate u, pa zirtirna chu ngaithla u la, hriatthiamna chu hre turin ngaithla rawh u;

²Zirtirna tha tak ka fah si che u a; ka zirtirna hi hawisan suh u.

³Ka pa fapa ka ni a, ka nu fa, fapa mal duata duat ka ni a.

⁴Min zirtir a, ka hnenah, "I thinlung chuan ka thute hi vawng reng se la; Ka thupekte hi zawm la, nung rawh," a ti a.

⁵Finna nei la, hriat thiamna nei rawh; theihnghilh suh la, ka kaa thu chhuakte hi chhiat lam pansan suh.

⁶Hawisan suh la, a humhim ang che; hmangaih la, a veng ang che.

⁷Finna hi thupui ber a ni a; chuvangin fina hi nei rawh; a ni, i thil neih zawng zawng chan pawhin finna hi nei rawh.

⁸Chawimawi la, anin a chawi sang ang che; i lawm chuan zahawmah a siam ang che.

⁹Khawngaihna lukhum i lu a khumtir ang a, mawina lallukhum a pe ang che.

¹⁰Aw ka fapa, ka thu ngaithla la, pawm rawh; tichuan i dam chhung kum a lo tam ang.

¹¹Finna kawngin ka zirtir chia, thatna kawngah ka hruai chia.

¹²I kal laiin i pheichheh a zang ang a; i tlan pawhin i petek lo ang.

¹³Zirtirna chu vuan tlat la, chhuah suh; vawng tlat rawh, i nunna a ni si a.

¹⁴Mi suaksual kawngah chuan lut suh la, mi sual kawngah chuan kal suh.

¹⁵Pumpelh la, a kiangah kal suh; hawisan la, kal zel rawh.

¹⁶Pawi an khawih phawt loh chuan an mu ngai lo a, tute emaw tal chhiatna an thlensak loh chan an mut a chhuak thei lo.

¹⁷Suahsualna chhang an ei a, nunrawnna uain an in thin.

¹⁸Mi felte kawng erawh chu chhun en la tak pawha eng zual deuh deuh, eng fim tak ang a ni.

¹⁹Mi suaksualte kawng chu a thim a, eng nge an chhuih an hre lo.

²⁰Ka fapa, ka thu ngaithla la, ka thu sawiah i beng dawh rawh.

²¹I mithmuh ata chhuahtir suh; i thinlung lai takah pai rawh.

²²A hmutute tan nunna ani a, an tisa zawng zawng tan hriselna a ni si a.

²³Thil dang bera aiin i thinlung veng tha rawh, nunna lo chhuahna a ni si a.

²⁴Tawng chaltlai bansan la, mi bum ching suh.

²⁵I mitin hma lam en la, ngil takin hma lam thlir rawh.

²⁶I ke tan kawng tirualrem la, i kawng zawng zawng tihngheh ni rawh se.Ding lam emaw, vei lamah emaw peng suh; sual ata i ke sawn rawh.

²⁷Ding lam emaw, vei lamah emaw peng suh; sual ata i ke sawn rawh.