Read Baibul, Mizo Isaia 63 Bible Online

Isaia 63 - Baibul, Mizo bible

Isaia 63

¹Edom ram atanga lo kal, Bozrah khua atanga silhfen thihsen sin saw tu nge ni? A puan sina ropui tak, nasa taka chaka lo kal saw? Keimah, fel taka thu sawia, chhandam kawnga mi chak taka kha ka ni.

²Eng vangin nge i puan sin kha a sen a, i silhfente pawh kha grep sawrna khura rap sawrtu silhfen anga a awm ni?

³Keimah chauhin grep sawrna khurah ka rap sawr a; mi tin zinga mi pakhat mah ka hnenah an awm ve lo va: a ni, anni chu ka thinurin ka rap a, ka thinrimin ka chil a; tichuan an nunna thisen chu ka silhfenahte hian thehin a awm a, ka puan zawng zawng hi ka tibawlhhlawh ta a.

⁴Phuba lak ni chu ka thinlungah a awm si a, ka mi tlante kum chu a lo thleng ta bawk a ni.

⁵Tichuan ka han en a, tanpuitu tur reng reng an awm lo a; chelh dingtu reng reng an awm lo chu mak ka ti a: chuvangin keima ban ngei hian chhandamna mi thlen a; ka thinrimna chuan mi chelh ding ta a.

⁶Tichan mi tin chu ka rap bet a, ka thinrimin ka tirui a, an nunna thisen chu leiah ka baw ta.

⁷LALPA thil engkima min vur avangin LALPA ngilneihzia thute leh LALPA fakna thute ka sawi ang a; a khawngaihnate leh a ngilneihna a nasat avangin Israela chhungte laka a thatna nasa taka an chunga a vur thu pawh kha ka sawi bawk ang.

⁸Ani chuan, "Ka mite, fa adera ti lo turte, an ni ngei mai," a ti si a: chutichuan anmahni chhandamtuah a lo awm ta a.

⁹An manganna zawng zawngah chuan ani chu amangang ve thin a, vantirhkoih, a hmaa awm mi chuan, anni chu a chhanhim bawk thin a: a hmangaihna leh a khawngiahnain a tlan ta hlawm a; hmasang ni zawng zawngah chuan anmahni a puain anmahni a pawm thin.

¹⁰Nimahsela an hel a, a thlarau thianghlim chu an tilungngai ta a: chuvangin anmahni dotua awm tura tihlamletin a awm a, amah ngei chuan anni chu a bei ta a.

¹¹Chumi lai chuan amite chuan Mosia hmasang nite chu an hre reng a, heti hian an ti, "Tuifinriat atanga a beram rual vengtue nena anmahni hruai chhotu kha khawiah nge? A thlarau thianghlim an zinga dahtu kha khawiah nge?

¹²A ban ropui tak Mosia ding lama kaltirtu kha khawiah nge? Kumkhaw hming insiam nana an hmaa tui tithentu kha khawiah nge?

¹³An inchhuih lohna tura tui thuk taka, thlalera sakawr hruai anga anmahniho hruaia kaitu kha khawiah nge?

¹⁴Ruama ran chhukte angin LALPA thlarau chuan anniho chu a chawlhtir a: chutiang chuan, hming ropui tak i insiamna'n i mite chu i hruai kha," tiin.

¹⁵Van atang khan rawn thlir thla la, i thianghlimna leh i ropuina awmna atang khan rawn en teh: i thahnemngaihna leh i thiltih ropui takte khakhawiah nge? i thinlunga i ngaihna leh i lainatnate kha kalak ah tihrehin a awm ta .

¹⁶Abrahama'n min hre loin, Israela pawhin min ngaihsak lo mah se la, nang chu kan pa i ni si a ; nang chu , aw LALPA,kanpa i ni a; i hming chu chatuan ata keimahni min tlantu a ni .

¹⁷Aw LALPA, nangin eng vangin nge i kawng atangtea min vah botir thina, nangmah tih lo tura kan thinlung min tihkhauhsak thin le? i chhiahhlawh, i roluah hnamte avang hian, lokir leh rawh .

¹⁸I mi thianghlimte chuan rei lo te chauh an nei a; min dotute chuan i hmun thianghlim chu an rap che ta a.An chunga ro i rel ngai lohte ang a,i hming pu ngai lote ang chu kan lo ni ta.

¹⁹An chunga ro i rel ngai lohte ang a,i hming pu ngai lote ang chu kan lo ni ta.