Read Baibul, Mizo Leviticus 11 Bible Online

Leviticus 11 - Baibul, Mizo bible

Leviticus 11

¹Tin, LALPA'n Mosia leh Arona a bia a,

²Israela thlahte chu bia u la, 'Lei chunga sa zawng zawng zinga nungcha in ei turte chu he'ng hi a ni.

³Sa zinga a tin kaka, tin kak chhuak, thialret thial chi tawh phawt chu in ei thei ang a.

⁴Amaherawhchu thialret thial emaw tin kak chhuak emaw zinga mi hengte hi chu in ei tur a ni lo; sanghawngsei, thialret thial mah se la, a tin a kak loh avangin; in tan a bawlhhlawh a ni.

⁵Tin, sazupui, thialret chu a thial naa, mahse a tin a kak loh avangin; in tan a bawlh- hlawh a ni.

⁶Tin, zupui, thialret chu a thial naa, mahse a tin a kak loh avangin; in tan a bawlhhlawh a ni.

⁷Tin, vawk, a tin chu a kak a, a kak chhuak naa, mahse thialret a thial loh avangin; in tan a bawlhhlawh a ni.

⁸An sa in ei tur a ni lo a, an ruang pawh in khawih tur a ni lo a, in tan a bawlhhlawh a ni.

⁹Tuia cheng zawng zawngah hengte hi in ei thei ang: tuifinriat leh lui leh tuia awm pangparh leh phuhlip nei tawh phawt chu in ei thei ang.

¹⁰Tuia cheng zawng zawngte leh tuia nungcha awm zawng zawng zinga tuifinriata mi te, luia mi te, pangparh leh phuhlip nei lo apiangte chu in tana thil tenawm a ni a,

¹¹in tan thil tenawm a ni ang; an sa in ei tur a ni lo a, an ruangte chu thil tenawmah in neih tur a ni.

¹²Tuia mi pangparh leh phuhlip nei lo tawh phawt chu in tan thil tenawm a ni.

¹³Tin, sava zinga mi chu he'ng hi thil tenawma in neih tur a ni; ei loh tur a ni a, thil tenawm an ni: mupui te, lungdup te, muarla te,

¹⁴mute te, ngawihup chi reng reng te;

¹⁵choak chi reng reng te;

¹⁶sava sang te, vabak te, tuifinriat sava te, mu chi reng reng te;

¹⁷hrangkir te, luidung mu te, chingpirinu te,

¹⁸chhimbuk sialki nei te, tuivalawng te, mulukawlh te;

¹⁹kanghlai te, dil sava chi reng reng te, chhuangtuar leh bak te.

²⁰Thla nei ke palia kal chi zawng zawngte chu in tan thil tenawm a ni.

²¹Amaherawhchu thla nei, ke palia kal chi pawh lei chunga perhna'na an ketang chunglama bawp nei zawng zawngte zinga mi hengte hi in ei thei ang;

²²hengte pawh hi in ei thei ang; khaukhuap chi reng reng te, khauekthingtial chi reng reng te, perhpawng chi reng reng leh khau chi reng reng te.

²³Amaherawhchu thla nei, ke pali nei, a kala kal chi zawng zawng chu in tan thil tenawm a ni vek ang.

²⁴Tin, he'ng avangte hian bawlhhlawh in lo kai ang: tupawh, sa ruang khawih apiang chu tlai lam thlengin an bawlhhlawh ang a;

²⁵tin, tupawh he'ng ruang latu apiangte hian an puante an su tur a ni a, tlai lam thlengin an bawlhhlawh ang,

²⁶Ran a tin kak a, tin kak chhuak lo, thialret pawh thial lo chi zawng zawng chu in tan thil bawlhhlawh a ni a; tupawh chung khawih apiang chu an bawlhhlawh ang.

²⁷Tin, fuliafa zawng zawng zinga ke bawra kal apiangte chu in tan thil bawlhhlawh a ni a; an ruang khawih apiang chu tlai lam thlengin an bawlhhlawh ang.

²⁸Tin, an ruang latu apiang chuan an puante an su tur a ni a, tlai lam thlengin an bawlhhlawh ang; in tan thil bawlhhlawh a ni.

²⁹Tin, leia a bawha bawkvak chi zinga in tana thil bawlhhlawh chu hengte hi a ni: bui te, chaichim te, tangkeu chi reng reng te,

³⁰chawke te, tangkawng te, laitel te, kawlchawr te, laiking te.

³¹Heng hi a bawha bawkvak chi zawng zawng zinga in tana thil bawlhhlawh te chu an ni: tupawhin he'ng thi hnute hi an khawih chuan tlai lam thlengin an bawlhhlawh ang.

³²Tin, an thiha engpawh an delh chu a bawlhhlawh zel ang; hmanrua hman tawh phawt chu thing bungbel emaw, puan emaw, savun emaw, saiip emaw pawh ni se la, tuiah chiah tur a ni, tin, tlai lam thlengin a bawlhhlawh ang; chu mi zawhah chuan a thianghlim tawh ang.

³³Hlum bel, a enga pawh a tlakna apiang chu in tikeh zel tur a ni, a chhunga awm zawng zawng chu a bawlhhlawh a ni.

³⁴Chu mi bela ei mi awm zawng zawng pawh, chu mia awm tuia chiah tawh reng reng chu thil bawlhhlawh a ni ang; tin, in mi, in theih chi zawng zawng pawh, chu mi bela mi reng reng chu thil bawlhhlawh a ni angin

³⁵Tin, thil engpawh an ruang a englai pawhin a delh tawh phawt chu thil bawlhhlawh a ni zei ang; chhangurna emaw ur lumna bel emaw pawh tihkeh vek tur a ni, a bawlhhlawh tawh a, in tan thil bawlhhlawh a ni ang.

³⁶Amaherawhchu tuikhur emaw, tuizem, tui tling khawm emaw chu a bawlhhlawh lo ang a, an ruang khawih apiang erawh chu a bawlhhlawh ang.

³⁷Tin, chi, chin tur reng reng chu an ruang a englai pawhin lo delh ta ang se la, a bawlhhlawh lo a.

³⁸Amaherawhchu chi, tuia chiah hnu an ruang a englai pawhin delh se la, in tan thil bawlhhlawh a ni.

³⁹Ran in ei theih chi reng reng pawh thi se la, a ruang khawih apiang chu tlai lam thlengin a bawlhhlawh ang.

⁴⁰A sa ei apiang chuan a puante a su tur a ni a, tlai lam thlengin a bawlhhlawh ang: tin, a ruang latu pawhin a puante a su tur a ni a, tlai lam thlengin a bawlhhlawh ang.

⁴¹Tin, rannung lei chunga a bawha bawkvak chi zawng zawng chu thil tenawm an ni a, ei tur an ni lo.

⁴²A tlenga tleng chi leh ke palia kal chi emaw, ke tam tak nei chi emaw, lei chunga a bawha bawkvak chi reng reng chu in ei tur a ni lo, thil tenawm an ni si a.

⁴³A bawha bawkvak chi reng rengin irh intitenawm tur a ni lo a, in intihbawlhhlawh phahna turin, chung chuan in intibawlhhlawh tur a ni lo.

⁴⁴Kei hi LALPA in Pathian ka ni si a; chuvangin intithianghlim u la, thianghlimin awm rawh u; kei ka thianghlim si a, lei chunga cheng, a vaha vak, a eng ang chi mahin intibawlhhlawh suh u.

⁴⁵In Pathian ni tura Aigupta ram ata hruai chhuak chhotu che u LALPA chu ka ni si a,: kei ka thianghlim si a, chuvangin nangni pawh in thianghlim tur a ni.

⁴⁶Hei hi sa leh savate leh nungcha tuia cheng chi tinreng leh leia a bawha bawkvak chi tinrengte chungchang thua dan tur chu a ni:thianghlim leh thianghlim lo thleina tur leh nungcha ei theih mi leh nungcha ei theih loh mi thleina turin,' ti rawh u," tiin.

⁴⁷thianghlim leh thianghlim lo thleina tur leh nungcha ei theih mi leh nungcha ei theih loh mi thleina turin,' ti rawh u," tiin.