Read Baibul, Mizo Leviticus 18 Bible Online

Leviticus 18 - Baibul, Mizo bible

Leviticus 18

¹Tin, LALPA chuan Mosia a bia a,

²Israela thlahte chu bia la, an hnenah, 'Kei hi LALPA in Pathian chu ka ni a.

³In awm tawhna Aigupta ram mite tih ang kha ti suh u la, ka hruai luhna tur che u Kanaan ram mite tih ang pawh ti suh ang che u; an dan pawh zawm bawk hek suh u.

⁴Ka rorelte chu in pawm ang a, ka dante chu zawhin in zawm tur a ni: Kei hi LALPA in Pathian chu ka ni.

⁵Chuvangin ka dan leh ka rorelte chu in zawm tur a ni: chu chu miin a tih chuan a nun phah ang: Kei hi LALPA chu ka ni.

⁶Tuma'n in chhung bulte reng reng chu an saruakna hlim turin in pan tur a ni lo: Kei hi LALPA chu ka ni.

⁷I pa saruakna, i nu saruakna chu i hlim tur a ni lo: i nu a ni a, a saruakna i hlim tur a ni lo.

⁸I pa nupui saruakna i hlim tur a ni lo, i pa saruakna a ni.

⁹I farnu, i pa fanu emaw, i nu fanu emaw, i pianpui emaw, i pianpui loh emawte saruakna pawh i hlim tur a ni lo.

¹⁰I fapaa fanu emaw, i fanua fanu emaw saruakna, an saruakna chu i hlim tur a ni lo. An saruakna chu nangma saruakna a ni si a.

¹¹I pa nupuia fanu, i pa hrin saruakna chu, i farnu a ni a, a saruakna i hlim tur a ni lo.

¹²I pa farnu saruakna chu i hlim tur a ni lo; i pa chhung bul a ni.

¹³I nu laizawn saruakna chu i hlim tur a ni lo, i nu chhung bul a ni si a.

¹⁴I pa unau saruakna chu i hlim tur a ni lo a, a nupui chu i pan tur a ni lo, i nu a ni.

¹⁵I monu saruakna chu i hlim tur a ni lo, i fapaa nupui a ni a, a saruakna i hlim tur a ni lo.

¹⁶I unaupa nupui saruakna chu i hlim tur a ni lo, i unaupa saruakna a ni.

¹⁷Nufa faa saruakna chu i hlim tur a ni lo: a saruakna hlim turin a fapaa fanu emaw, a fanua fanu emaw i nei tur a ni lo; i chhung bulte an ni a; suahsualna nasa tak a ni.

¹⁸I nupuia laizawn chu a saruakna hlim turin i nupui la dam chhung chuan i nei kawp tur a ni lo.

¹⁹Tin, hmeichhia a bawlhhlawh dan pangngaia a bawlhhlawh chhung chuan a saruakna hlim turin i pan tur a ni lo.

²⁰A laka intibawlhhlawh turin i vengpa nupui i mutpui tur a ni lo.

²¹Moleka puala meia tihluh turin i rila rahte reng reng i pe tur a ni lo a, i Pathian hming i tichhe tur a ni hek lo: Kei hi LALPA chu ka ni.

²²Hmeichhia angin mipa i pawl tur a ni lo; thil tenawm a ni.

²³Intihbawlhhlawhna turin ran reng reng i pawl tur a ni lo a, hmeichhia reng reng inpawltir turin ran hmaah a ding tur a ni hek lo; suahsualna chungchuang a ni.

²⁴Heng thil, a engamahah hian intibawlhhlawh suh u; he'ng thil zawng zawngah hian in hmaa ka hnawhchhuah tak hnamte chu an lo bawlhhlawh tawh a;

²⁵ram pawh chu a bawlhhlawh tawh a ni: chuvangin chuta a khawlohna chu ka hrem a, ram chuan a chhunga awmte chu a luak chhuak ta vek a.

²⁶Chuvangin nangni chuan ka dan te, ka rorelte in zawm tur a ni a, he'ng thil tenawm hi a engamah in ti tur a ni lo, in rama mi reng emaw, ram dang mi in zinga khawsate pawhin;

²⁷(he'ng thil tenawm zawng zawng hi in hmaa he rama awmte khan an lo ti tawh a, ram pawh chu a bawlhhlawh tawh a ni:)

²⁸in hmaa awm hnam a law chhuak ang bawka in tihbawlhhlawha ram chuan a luak chhuah ve lohna tur che uin.

²⁹Tupawh he'ng thil tenawm hi a engapawh titu apiang chu an chipuite zing ata tuithlarin an awm ang.Chuvangin he'ng thil tenawm in hmaa an chin ang hi in chin ve lohna'n leh chungah chuan in intihbawlhhlawh lohna'n ka thupek hi in zawm tur a ni: Kei hi LALPA in Pathian chu ka ni,' ti rawh," tiin.

³⁰Chuvangin he'ng thil tenawm in hmaa an chin ang hi in chin ve lohna'n leh chungah chuan in intihbawlhhlawh lohna'n ka thupek hi in zawm tur a ni: Kei hi LALPA in Pathian chu ka ni,' ti rawh," tiin.