Read Baibul, Mizo Leviticus 21 Bible Online

Leviticus 21 - Baibul, Mizo bible

Leviticus 21

¹Tin, LALPA'n Mosia hnenah, "Arona fapa, puithiamte chu bia la, an hnenah, 'An chipuite zinga mitthi avangin tumah an intibawlhhlawh tur a ni lo;

²an chhung bul, an nu te, an pa te, an fapa te, an fanu te, an unau te,

³an farnu, an la awmpui, nula, pasal la nei lote avang chuan an intibawlhhlawh thei ang.

⁴An chipuite zinga a puipa ber an nih avangin an intibawlhhlawhin an intibawrhbang tur a ni lo.

⁵An lu an met kawlh tur a ni lo a, an khabe hmul sir tuak an tan tur a ni bawk lo a, an taksa an zai tur a ni hek lo.

⁶An Pathian tan mi thianghlim an ni tur a ni a, an Pathian hming an tihliau tur a ni lo; LALPA tana meia thilhlante, an Pathian tana ei tur chhiah te an hlan thin a ni a: chuvangin an thianghlim tur a ni.

⁷Hmeichhia, nawhchizuar emaw, hming hliau emaw, a pasal mak hnu emaw an nei tur a ni lo: an Pathian tan mi thianghlim an ni si a.

⁸Chuvangin i tithianghlim tur a ni; i Pathian tana ei tur chhiah chu an hlan thin si a, i tan mi thianghlim an ni tur a ni. Kei, LALPA a tithianghlimtu che u chu ka thianghlim si a.

⁹Puithiam tupawh a fanu nawhchizuara a intihbawrhban chuan a pa tibawrhbang a ni a, hal tur a ni.

¹⁰Unaute zinga puithiam lalber, a lu hriak thih mia thih tawh, silhfel bel tura tihhran tawh chuan a sam a thlah tur a ni lo a, a puante a pawt thler tur a ni lo a,

¹¹mitthi ruang awmnaah chuan a lut tur a ni lo a, a a nu emaw a pa emaw avangin a intibawrhbang tur a ni hek lo;

¹²hmun thianghlim ata chu a chhuak tur a ni lo a, a Pathian hmun thianghlim a tibawrhbang tur a ni bawk hek lo. A Pathian hriak thih mia tihhranna chu a chungah a awm si a: Kei hi LALPA chu ka ni.

¹³Nupuiah chuan nula la thianghlim a nei tur a ni.

¹⁴Hmeithai emaw, mak hnu emaw, hmeichhe hminghliau emaw, nawhchizuar emaw te chu a nei tur a ni lo a, ama chipui nula thianghlim nupuiah a nei tur a ni.

¹⁵Tin, a chipuite zingah a thlahte chu a tibawrhbang tur a ni lo. Kei hi LALPA, a tithianghlimtu chu ka ni si a,' ti rawh,

¹⁶Tin, LALPA'n Mosia a bia a,

¹⁷Arona hnenah, 'An chhuante zel thlenga i thlahte zinga chiangkuan lohna nei apiang chuan a Pathian ei tur chhiah hlan turin rawn hnaih suh se.

¹⁸Tupawh chiangkuanlohna nei apiang chuan an rawn hnaih hauh tur a ni lo: mitdel te, kebai te, hnarper te, fuke sei lutuk apiang te,

¹⁹ke tliak te, kut tliak te,

²⁰elkun te, mi tawngchham te, mit chiangkuang lo te, mi buar te, mi phuhlip te, tilmu kehte chuan;

²¹puithiam Arona thlah chiangkuan lohna nei reng reng chuan LALPA tana meia thilhlan hlan turin an rawn hnaih tur a ni lo: chiangkuan lohna nei an ni a, an Pathian ei tur chhiah hlan turin an rawn hnaih hauh tur a ni lo.

²²An Pathian ei tur chhiah, a thianghlim leh a thianghlim ber pawh chu an ei thei ve ve ang.

²³Amaherawhchu chiangkuan lohna nei an nih avangin puanzar chhungah emaw, maicham kiang hnaiah emaw zawng an lo kal thei lo ang, ka hmun thianghlimte an tibawrhbang dah ang e. Kei hi LALPA, anmahni tithianghlimtu chu ka ni si a,' ti rawh," tiin.Chutiang chuan Mosia chuan Arona leh a fapate leh Israela thlahte zawng zawng hnenah a sawi a.

²⁴Chutiang chuan Mosia chuan Arona leh a fapate leh Israela thlahte zawng zawng hnenah a sawi a.