Read Baibul, Mizo Leviticus 6 Bible Online

Leviticus 6 - Baibul, Mizo bible

Leviticus 6

¹Tin, LALPA chuan Mosia a bia a,

²Tupawhin, thil tisualin, LALPA thu bawhchhe ta se la, sum kawltir thu emaw, hlepthu emaw, rukrukthu emawa a thenawmte tihderin a thenawmte bum ta se la,

³a nih loh leh, thil bote chharin, tihderin dawtin chhia chham ta se la, he'ng thil zawng zawng a enga pawh hi a tihsual chuan,

⁴heti hi a ni ang a, a sual ngei a, thiam loh a chan chuan a thil ruk te, buma a thil lak te, a hnena sum kawltir te, thil bo a chhar te,

⁵dawta chhia a chhamna thil engpawh chu a rul leh tur a ni; a kim chiahin a rul leh vek ang a, a hmun ngaa thena hmun khat chu, a chuangin a belh ang: thiam loh a chan ni chuan a neitu chu a pe tur a ni.'

⁶A bawhchhiat thawina beram rual zinga mi i ngaiha awm tawk, berampa sawiselbo bawhchhiat thawinaah LALPA tan puithiam hnenah a rawn kai tur a ni:

⁷tin, puithiamin LALPA hmaah inremna a siamsak ang a, ngaihdam a ni ang, thiam loh channa tura thil a tih apiang chungchangahte chuan," tiin.

⁸Tin, LALPA'n Mosia a bia a,

⁹Arona leh a fapate hnenah, 'Hei hi halral thilhlan dan tur chu a ni: Halral thilhlan chu maicham chunga a halnaah chuan zankhuain a tuk thlengin a awm ang a: tin, maichama mei chu a nung reng tur a ni.

¹⁰Tin, puithiam chuan a puan zai sin silhfen a inbel ang a, a tisa khuhna'n a puan zai sin kekawr a ha ang a; tin, maichama halral thilhlan kang vapte chu a la ang a, maicham sirah a dah tur a ni.

¹¹Tin, a silhfen chu a hlip ang a, silhfen dang a inbel ang a, a vapte chu daipawn lam hmun faiah a kalpui tur a ni.

¹²Tin, maicham chunga mei chu tihnun reng a ni ang a, a mit tur a ni lo; tin, puithiam chuan tuk tin thing a tuah ang a, halral thilhlan chu a dah fel ang a, chutah chuan remna thilhlante thau chu a hal tur a ni.

¹³Maichamah mei a nung reng ang a, a mit tur a ni lo.

¹⁴Tin, hei hi chhangphut thilhlan dan tur chu a ni: Arona fapate chuan maicham bulah, LALPA hmaah an hlan tur a ni.

¹⁵Tin, anin a vei khatin chhangphut thilhlana mi, chhangphut dip tak leh a hriak leh chhangphut thilhlan chunga beraw zawng zawng chu a la chhuak ang a, chu chu LALPA tana rimtui tak, hriat rengna atan maichamah a hal tur a ni.

¹⁶Tin, lak bangte chu Arona leh a fapaten an ei tur a ni chu chu hmun thianghlimah dawidim tel loin an ei ang a; inbiakna puan in kawtlaiah an ei tur a ni.

¹⁷Dawidim telin ur tur a ni lo. Meia ka thilhlana an chanvo atan ka pek a ni; chu chu sual thawina leh bawhchhiat thawina anga thil thianghlim tak a ni.

¹⁸Arona thlah mipa zawng zawngin an ei tur a ni. Chu chu LALPA tana halral thilhlan chungchang thuah in thlahte zel chena kumkhaw dan a ni ang: tupawh chu mi khawih apiangte chu tihhran an ni ang,' tiin thu pe rawh," tiin.

¹⁹Tin, LALPA chuan Mosia a bia a,

²⁰Hriak thiha a awm nia Arona leh a fapaten LALPA hnena an hlan tur thilhlan chu hei hi a ni; chhangphut thilhlana hlan thin tur, chhangphut dip tak epha hmun sawma thena hmun khat, zingah a chanve, tlaiah a chanve.

²¹Urna thlengah hriak pawlha siam tur a ni. A inchiahchhuah hunah i rawn la lut ang a: a phel te tein chhangphut thilhlan chu LALPA tana rimtuiah i hlan tur a ni.

²²A fapate zinga mi a thlaktu, hriak thih puithiam chuan a hlan ang a: kumkhaw dan tur angin LALPA tan halral vek tur a ni.

²³Puithiam chhangphut thilhlan apiang chu halral vek tur a ni a, ei hauh loh tur a ni," tiin.

²⁴Tin, LALPA chuan Mosia a bia a,

²⁵Hei hi sual thawina dan tur chu a ni: halral thilhlan talh thinaah sual thawina pawh chu LALPA hmaah talh tur a ni: chu chu thil thianghlim tak a ni.

²⁶Sual thawina hlantu puithiam chuan a ei ang a; inbiakna puan in kawtlaiah, hmun thianghlimah ei tur a ni.

²⁷Tupawh chu mi sa khawih apiangte chu tihhran an ni ang: tin, a thisen chu eng puanah pawh theh per ni se la, a kaina apiang chu hmun thianghlimah i su tur a ni.

²⁸A chhumna hlum bel chu tihkeh tur a ni a: dar bela chhum a nih erawh chuan nawh faia tleuh fai tur a ni;

²⁹Puithiam chhungkuaa mipa tawh phawt chuan chu mi chu an ei thei ang. Chu chu thil thinghlim tak a ni.Sual thawina, a thisen, hmun thianghlima inremna siamna tura inbiakna puan ina rawn lak chu ei tur a ni lo: hal tur a ni.

³⁰Sual thawina, a thisen, hmun thianghlima inremna siamna tura inbiakna puan ina rawn lak chu ei tur a ni lo: hal tur a ni.