Read Baibul, Mizo Jeremia 1 Bible Online

Jeremia 1 - Baibul, Mizo bible

Jeremia 1

¹Benjamina rama Anathoth khuaa puithiamte zinga mi Hilkia fapa Jeremia thute;

²Juda lal, Amona fapa Josia hun lai, a lal kum sawm leh pathumnaah chuan a hnenah LALPA thu a lo thleng a.

³Juda lal, Josia fapa Jehoiakima lal lai pawhin a lo thleng a; Juda lal Josia fapa Zedekia kum sawm leh kum khatna tawp, Jerusalem sala hruai thla ngana thleng khan.

⁴Tin, LALPA thu chu ka hnenah a lo thleng a;

⁵Pum chhunga ka siam hma chein ka hria che a, Chhul ata i chauh hma pawhin ka serh hrang che a, Hnamte hnena zawlneiah ka ruat tawh a che," tiin.

⁶Tin, kei chuan, "E, Lalpa PATHIAN, ngai teh, thu ka sawi thiam lo, ka naupang si," ka ti a.

⁷LALPA erawh chuan ka hnenah heti hian a ti a: Ka naupang, ti suh, Ka tirhna che apiang hnenah i kal ang a, Thu ka pek che apiang i sawi tur a ni.

⁸Anmahni avangin hlau suh la,Chhan chhuak tur chein i hnenah ka awm e, Tih hi LALPA thu chhuak a ni.

⁹Tichuan, LALPA chuan a han ban a, a ka a khawih a, tin, LALPA chuan ka hnenah, "Ngai rawh, i kaah ka thute ka dah ta,

¹⁰En teh, hnamte leh lal ram chhungah te,Pawt chhuak tur te, thiat tur te, tichhe tur te, Paih thla tur te, siam tha tur leh din turin Hemi niah hian ka dah che ni," a ti a.

¹¹Chu lo pawh LALPA thu ka hnenah a lo thleng a, "Jeremia, eng nge i hmuh?" a ti a, Tin, kei chuan," Vai umkhal thing tang ka hmu," ka ti a.

¹²Tin, LALPA chuan ka hnenah, "I hmu fuh hle mai: ka thu hlen turin ka inralring reng a ni," a ti a.

¹³Tin, LALPA thu chu a vawi hnihnaah ka hnenah a lo thleng leh a, "Eng nge i hmuh?" tiin. Tin, kei chuan, "Bel so bawrh bawrh, a rawng hmar lam hawisan ka hmu," ka ti a.

¹⁴Tichuan, LALPA chuan ka hnenah heti hian a ti a: Rama cheng zawng zawngte chungah hmar lam ata thil tha lo a lo chhuak ang.

¹⁵Ngai teh, hmar lam lal ram hnam zawng zawng ka ko dawn si a, tih hi LALPA thu chhuak a ni; an lo kal ang a, Jerusalem kawngka luhnaah te, a vel kulh bang zawng zawng bulah te leh Juda khawpui zawng zawngahte an lalthutthleng an hung theuh ang.

¹⁶Mi kalsan a, pathian dangte hnenah rimtui an hal a, anmahni kut chhuak ngei an bia a; he'ng an suahsualna zawng zawng chungchanga ka thu relte chu ka puang ang.

¹⁷Chuvangin puan veng la, tho la, thu ka pek zawng zawng che chu an hnenah va sawi rawh; an hmaah ka tizam ang che.

¹⁸Ngai rawh, he mi niah hian ram pum pui te, Juda lal te, a hotu te, a puithiamte leh chumi rama mi lakah chuan khawpui kulh nei leh thir ban leh ngen bangah ka siam che hi.An bei ang chia, mahse an hneh lo ang che: chhan chhuak tur chein i hnenah ka awm si a, tih hi LALPA thu chhuak a ni.

¹⁹An bei ang chia, mahse an hneh lo ang che: chhan chhuak tur chein i hnenah ka awm si a, tih hi LALPA thu chhuak a ni.