Read Baibul, Mizo Jeremia 18 Bible Online

Jeremia 18 - Baibul, Mizo bible

Jeremia 18

¹LALPA lak ata Jeremia hnena thu lo thleng chuan,

²Tho la, belvawtu inah chuan zuk kal la, chutah chuan ka thute ka hriattir ang che, a ti a.

³Tichuan belvawtu inah chuan ka zuk kal ta a, a bel siamna khawlah chuan a lo thawk a.

⁴Hluma bel a siam lai chu a lo that loh chuan belvawtu chuan tha a tih angin bel dangah a din leh mai thin a.

⁵Tichan LALPA thu chu ka hnenah a lo thleng leh a:

⁶Aw Israel chhungte u, he belvawtu tih ang hian ka tithei lo che u em ni? Tih hi LALPA thu chhuak a ni. Ngai teh u, belvawtu kuta hlum ang mai hian ka kutah in awm a ni, aw Israel chhungte u.

⁷Engtikah pawh hnam emaw ram emaw chungchang thu-ah, Ka pawtchhuak ang a, ka thiat ang a, ka tichhia ang, tiin lo sawi pawh ni i la.

⁸chu hna chuan a chung thu ka sai avanga a thil tha lo a hawisan chuan a chunga thil tha lo tih ka tum chu ka lamlet ang.

⁹Tin, engtikah pawh hnam emaw ram emaw chungchang thu-ah, Ka siam ang a, ka din ang, tiin lo sawi pawh ni i la,

¹⁰ka tawngka chhuak ngaithla loa ka mithmuha thil tha lo a tih chuan a tana thil tha tih ka tum chu ka lamlet bawk ang.

¹¹chuvangin Juda mite leh Jerusalema chengte hnenah chuan, LALPA'n heti hian a ti: Ngai teh u, in chungah thi tha lo ka suangtuah a, ka phiar mek che u a ni, mi tinin an awm dan tha lo hawisan se la, in awm dan leh in thiltihte siam tha rawh u, va ti phawt rawh.

¹²Nimahsela anni zawning, A awm lo e! Mahni remruat ang angin kan awm ang a, mi tin, mahni rilru ngawltawt sual ang zelin kan che ang, an ti thin a ni.

¹³Chuvangin LALPA chuan heti hian a ti: Hnam dangte zawt teh mah u, hetiang reng tu nge hre ngai? Nula Israel chuan thil tihbaiawm tak a tih tak hi.

¹⁴Lebanon vur chuan a tlang chhip a kiansan ngai em ni? Kawlvalenchham tui dai a luang kang ngai em ni?

¹⁵Ka mite erawh chuan mi theihnghilh a, Engmah lo mai hnenah rimtui an hal a; Chung chuan an hmasang kawngah a petektir, Kawngpui ni lo tumkawng lam an zawh a,

¹⁶An titiau zo ta e a ram chu, Kumkhuaa chek khum turin. Veivak apiangin mak tiin an lu an thing.

¹⁷Khawchhak thlipi angin hmelma hmaah ka theh darh ang, An vanduai niah chuan ka hmel ni lo, Ka tukkhum ka entir ang.

¹⁸Tin, anni chuan, Hawh u, Jeremia hi i phiar ang u, puithiam lak ata dan a reh dawn si lo a, mi fing lak ata thurawn a reh hek lo ang a, zawlnei lak ata thu a reh bawk hek lo ang. Hawh u, i sawichhe bawrh bawrh ang u khai, a thu reng reng i ngaihsak miah lo ang u, an ti a.

¹⁹Mi ngaihsak la, aw LALPA, Mi dodaltute thu hi bengvar ang che.

²⁰Sual hi thil tha rulhna em ni ngai? Anni zawngin ka nunna atan hum an hiat si. An laka i thinurna tikiang tur leh An tana thil tha sawi tura I hmaa ka din thin kha hre reng ang che.

²¹Tichuan an fate chu tampui-mitthi tawhtir la, Khandaih chakna tawntir rawh; An nupuite fa lu hlauhin hmeithai rawh se. An mipate hripuiin thi se la, An tlangvalte pawh indonaah khandaihin.

²²Runtute an hnen i thlentir phutin An in ata tap thawm thang rawh se. Mi man turin hum an hiat si a, Ka ke awhna'n thang an kam si a.Mahse nangin aw LALPA, Mi that tura an mi phairna zawng zawng i hria e. An khawlohna ngaidam suh la, I mit hmuhan an sualna thai bo hek suh. I hmaah chuan tlu hlawm se la, I thinur niah chuan ti nek ang che.

²³Mahse nangin aw LALPA, Mi that tura an mi phairna zawng zawng i hria e. An khawlohna ngaidam suh la, I mit hmuhan an sualna thai bo hek suh. I hmaah chuan tlu hlawm se la, I thinur niah chuan ti nek ang che.