Read Baibul, Mizo Jeremia 2 Bible Online

Jeremia 2 - Baibul, Mizo bible

Jeremia 2

¹Tin, LALPA thu chu ka hnenah a lo thleng a, heti hian a ti:

²Kal la, Jerusalem beng hriatah au rawh, LALPA chuan heti hian a ti: I tleirawl laia i ngilneihzia te, Inhual laia mi hmangaihziate kha ka hre reng e; Tuk loh ram, thlalera mi zuizia kha.

³Israel chu LALPA tana serh hran, a rah pung hmasa a ni, Amah ei raltu apiangin thiam loh an chang ang a, An chungah chhiatna a lo thleng ang, Tih hi LALPA thu chhuak a ni.

⁴Aw Jakoba chhungte leh Israel chhung zawng zawngte u, LALPA thu hi ngaithla rawh u;

⁵LALPA chuan heti hian a ti: In thlahtuten keimahah fel lohna eng nge an hmuh, Ka laka hla takah an leng bo a, Engmah lo mai an um a, an lo uanthuan tak ni?

⁶LALPA, Aigupta ram ata min hruai chhuak a, Thlaler, ram ro, khuarkhurum hmun, thihna hlim leh ram ro hmun, Tuma kal tlang ngai lohna, Tuma awm lohna hmuna Min hruai tlangtu kha khawiah nge an ti hek lo.

⁷Ram tha takah, a rah leh thatna ei turin, Ka hruai lut che u a, Mahse in han luh chuan Ka ram in tibawlhhlawh a, Ka rochan chu thil tenawmah in siam.

⁸Puithiamte pawhin, LALPA chu khawiah nge? An ti lo a, Dan hmangtuten mi hre hek lo, Roreltute ka lakah an hel a, Zawlneiten Baal hmingin thu an sawi a, Thil sawt lo turte an um a.

⁹Tichuan ka khing ang che u a, In fate fa lehte pawh ka la khing fo ang, Tih hi LALPA thu chhuak a ni.

¹⁰Kitim thliarkarah va kal u la, en rawh u, Kedarah mi tir u la, ngun takin ngaihtuah rawh u, Hetiang thil a awm ngai erawm hriatna'n.

¹¹Hnam dangte chuan an pathian an thlak ngai em ni, Pathian tak ni hlei lo pawh? Ka mite erawh chuan an ropuina chu, Thil sawt lo takin an thlak ta zawk a.

¹²Aw vante u, mak ti u la, Rap che u se la, tiau vek rawh u, Tih hi LALPA thu chhuak a ni.

¹³Ka miten thil pahnih an tisual si, Kei, nunna tuikhur hi mi kalsan a, Tuikhuah an ker a, Tuikhuah khi, tui tling thei lo tur chu.

¹⁴Israel chu chhiahhlawh em ni? Vanlunga piang em ni? Engati nge hnehchhiaha a awm tak ni?

¹⁵Sakeibaknei vanglaite chuan rum khumin, A chungah aw an chhuah a, A ram chu an titiau zo ta, A khawpuite pawh luahtu nei loin a kang fai ta

¹⁶Noph mi leh Tahpanes mite pawhin, I chhip an tikawlh zo ta.

¹⁷LALPA i Pathian chuan kawnga a hruai lai che a, I tlan bosan avangin, Chu chu i chunga i thlentir a ni lo'm ni?

¹⁸Nile tuite in tura Aigupta kawng i zawh hi, Eng nge i tan hlawk dawn ni? Luipui tui in tura Assuria kawng i zawh pawh hi,

¹⁹I suahsualna chuan a tuartir ang chia, I hnung tawlh thinna chuan a zilhhau vang che; Mi tihna nei loa LALPA i pathian i kalsan hi, Thil sual tak leh kha tak a ni tih hi, Lo hre chhuak la, hmu fiah tawh rawh, tih hi Lalpa, Sipaihote LALPA thu chhuak a ni.

²⁰Hman ata tawh i nghawngkawl titliakin, I hruite pawh i tichat tawh si a, I rawng ka bawl tawh lo ang, i ti a, Tlang sang tinahte, thingbuk hnuai apiangah te, Kunin i hur thil i ti a.

²¹Chi dik tak hmangin grep tha tak ka phun che a, Eng tiziaa inleta, ka tan grep suaka lo chang ta nge i nih?

²²Chingalin insilin sabawn tam tak hmang mah la, I khawlohna chu ka mithmuhah a lang tho a ni, Tih i Lalpa PATHIAN thu chhuak a ni.

²³Ka intibawlhhlawh hlei nem, Baal-te pawh ka um hek lo, Engtin nge i tih theih le? Kawr ruama i awm dante en la, I thiltih takte chu hre rawh; Sanghawngseila hur lai ang riai i nih kha.

²⁴Ram sabengtung thlalera awm thin, A hur laia hnar len ruai ang;A chakna chu tuin nge dal zo ang? A zawngtu chu intihah duh suh se, A hunah chuan an hmu mai ang.

²⁵I keah pheikhawk bun loin awm suh la, I dang pawh ro suh se; Nang erawh chuan, Beisei a bo zo ta, Awze mite ka ngai a, anmahni ka um ang, i tia.

²⁶Rukru an phawka a zak angin, Israel chhungte an zak ta. Anmahni te, an lal te, an hotu te, An puithiam te, an zawlneite pawh.

²⁷Thing bul hnenah, Ka pa i ni, tia, Lung bul hnena, Mi hringtu i ni titute chu: Hmachhawn loin an tukkhum chhah mi chhawn ta zawk a, An mangan hunah erawh chuan, Tho la, min chhandam ta che, an ti ang, I pathian, i siamte kha khawiah nge an awm tak ni?

²⁸Anni chu tho zawk se la, i mangan laiin an chhandam thei mahna che; Aw Juda, i pathiante chu i khawpuite zat lai an ni alawm.

²⁹Engah nge ka chungah in vui fo le? In zain ka chungah thil in tisual si, Tih hi LALPA thu chhuak a ni.

³⁰In fate ka vua a, a sawt lo, An that phah chuang hek lo: Sakeibaknei koham ang maiin, Nangmahni khandaih chuan in zawlneite a ei ral a.

³¹Aw thangtharte u, LALPA thu hi hre rawh u, Israel tan thlaler ram ang ka ni em ni? Thim chhah mup ram ka ni em ni? Ka mite chuan engah nge, "Kan chhuak fel ta, I hnenah kan let leh lo ang," an tih hi?

³²Nula chuan a incheimawinate a theihnghilh theiin, Mo thar chuan a inthuamna a theihnghilh thei em ni? Ka mite erawh chuan ni chhiarsen loh chhungin Mi lo theihnghilh ta.

³³Ngaizawngtu hmuh theihna turin i awm dan i va uluk ve! Hmeichhe sual hnenahte pawh i awm dan i zirtir tak hi.

³⁴I puanfenahte pawh mi rethei pawikhawih lote Nunna thisen a lang a: Mi in an rawk lai kut man pawh ni si lo. Chu achhapah nangmah chuan,

³⁵Thiam ka chang e, ka lakah thinurna a dai e," I la ti leh ta lai a, Ngai rawh, "Ka sual lo e," i tih avangin, I chung thu ka rel ang.

³⁶I awm dan thlak zung zungin, Engah nge i vahvel thin? Assuria i zahpui ang bawk khan, Aigupta pawh i la zahpui ang.I kutte khumin an hnen ata i la chhuak leh ang, LALPA'n i rinnate chu a paithla si a, Anmahniah chuan i hmuingil lo ang.

³⁷I kutte khumin an hnen ata i la chhuak leh ang, LALPA'n i rinnate chu a paithla si a, Anmahniah chuan i hmuingil lo ang.