Read Baibul, Mizo Jeremia 21 Bible Online

Jeremia 21 - Baibul, Mizo bible

Jeremia 21

¹Lal Zedekian Malkiza fapa Pasura leh Maaseia fapa puithiam Zephania te chu Jeremia hnenah a tir a,

²Babulon lal, Nebukadnezzara chuan min do ta si a, LALPA chuan a thiltih ropui tak a tih thin ang khan min pui duh mialin, a kirtir leh mai law maw tih LALPA min lo zawhsak teh se, tia sawi turin, chuta Jeremia hnena LALPA thu lo thleng chu hei hi a ni.

³Tin, Jeremia chuan an hnenah, "Zedakia hnenah chuan hetiangin va sawi rawh u:

⁴Israelte Pathian, LALPA chuan heti hian a ti: Ngai rawh, Babulon lal leh Kaldai mi, kulh pawna hualtu che i dona ralthuam hriamhrei chu ka tikir dawn a ni; tin, he khawpui chhungah hian anni chu ka hruai khawm ang.

⁵Keimah ngei pawhin thinrim leh lungni lo tak leh thinur takin ban pharin ban tha chak hmangin ka do ang che.

⁶Hemi khuaa cheng mihringte leh rante hi ka tihlum ang a, hripuiin an thi ang.

⁷Chumi hnuah chuan, LALPA thu chhuak chuan a ti, lal zedekia leh a thuihruaite leh midang he khuaa hri leh khandaih leh tama thi lo te chu Babulon lal Nebukadnezzara kutah leh an hmelmate kutah leh anmahni thah tumtute kutah chuan ka pe ang. Khandaih hriamin a that ang a, a khawngaih hauh lo ang a, a zuah hek o ang a, a lainat bawk hek lo ang.

⁸Tin, he'ng mipuite hnenah hian heti hian va sawi rawh; LALPA chuan heti hian a ti: Ngai rawh u, thihna kawng leh nunna kawng ka dahsak che u hi.

⁹He khawpui chhunga awm chu khandaihin emaw, tamin emaw, hriin emaw an thi ang;Kaldai a hualtu che u hnena chhuaka inpete erawh chu an nung ang, an nunna chu indona lawmman atan a ni ang.

¹⁰He khawpui thatna tur ni lo, a chhiatna tur ka tum tlat tawh a ni; Babulon lal kutah pek a ni ang a, ani chuan meiin a hal ang, tih hi LALPA thu chhuak a ni.

¹¹Juda lal chhungte chungchang thuah chuan; LALPA thu hi ngaithla rawh u,

¹²Aw Davida chhungte u! LALPA chuan heti hian a ti: Zingah chuan ro dik takin rel ula, Tiduhdahtu kut ata, rawk tuara chu chhan chhuak u la, Chutilochu ka thinurna mei angin a chhuak ang a, Tuma thelh rual lohin a kang ang e, In thilsual tih avang hian.

¹³Ngai teh u, ruam zawla chengte u, Nangni ruam zawl lungpuia chenga, Tute nge kan awmnaah lo lut ang? Titute u, Ka khing dawn che u a ni, LALPA thu chhuak chuan a ti.In thiltih rah ang zelin ka hrem ang che u a, A ram ngawah chuan mei ka chhuak ang a, A vel zawng zawng chu a kang ral ang, LALPA thu chhuak chuan a ti.

¹⁴In thiltih rah ang zelin ka hrem ang che u a, A ram ngawah chuan mei ka chhuak ang a, A vel zawng zawng chu a kang ral ang, LALPA thu chhuak chuan a ti.