Read Baibul, Mizo Jeremia 36 Bible Online

Jeremia 36 - Baibul, Mizo bible

Jeremia 36

¹Tin, heti hi a ni a, Juda lal Josia fapa Jehoiakima la kum linaah he thu hi LALPA hnen ata Jeremia hnenah a lo thleng a:

²Lahkhabu zial la la, chutah chuan i hnena ka thu sawi zawng zawng, Israel chung thu te, Juda chung thu te, hnam zawng chung thu te, i hnena thu ka sawi ni ata Josia hun lai ata vawiin ni thlenga thu chu ziak rawh.

³Juda chhungte chuan an chunga thil tha lo tih ka tum zawng zawng chu, an ngaihthlakin mitinin an awmdan sual an lamlet thei mahna, an khawlohna leh an sualna ka ngaihdam theihna'n," a ti a.

⁴Tin, Jeremia chuan Neria fapa Baruka a ko a, tin, Baruka chuan LALPA thu zawng zawng, a hnena a lo sawi tawh chu Jeremia tawngka ata lehkhabu zialah chuan a ziak a.

⁵Tin, Jeremia chuan Baruka hnenah, "Khuahkhirh ka ni a, LALPA inah chuan ka kal thei lo a,

⁶chuvangin nang kal la, LALPA thu ka tawngka ata lehkhabu ziala i zial kha chaw nghei niah, LALPA ina mipuite beng hriatah va chhiar chhuak rawh; an khawpui ata lo chhuak Judate zawng zawng beng hriatah pawh i chhiar chhuak bawk tur a ni.

⁷Mi tinin an awmdan sual an lamletin, LALPA hmaah khawngaih an dilna chu an thlen thei mahnaite chunga thinrimna leh thinurna LALPA-in a puan tawh chu a nasa em em si a," tiin thu a pe a.

⁸Tichuan Neria fapa Baruka chuan zawlnei Jeremia thupek zawng zawng ang zel chuan LALPA inah LALPA thu lehkhabua mi chu a chhiar ta a.

⁹Tin, heti hi a ni a, Juda lal Josia fapa Jehoiakima la kum ngana, thla kua naah chuan Jerusalema mi zawng zawngte chuan chaw nghei thu an puang ta a.

¹⁰Tin, Baruka chuan LALPA Kawngka Thar luhnaah, hung chhung chungnung zawka ziaktu Saphana fapa Gemaria pindan, LALPA ina miah chuan Jeremia thu lehkhabua mi chu,mi zawng zawng beng hriatah a chhiara a.

¹¹Tin, Saphania fapa Gemaria fapa Mikaia chuan lehkhabua mi LALPA thu zawng zawng chu a lo hriat chuan,

¹²lal inah a chhuk a, ziaktu pindanah chuan a lut a, tinngai teh, tah chuan hotu zawng zawng chu an lo thu a, ziaktu Elisama te, Semaia fapa Delaia te, Akbora fapa Elnathana te, Saphana fapa Gemaria te, Hanania fapa Zedekia te leh hotu zawng zawngte chu.

¹³Tin, Mikaia chuan mite beng hriata Barukan lehkhabua mi a chhiar thu a lo hriat zawng zawngte chu a hrilh a.

¹⁴Tin, hotu zawng zawngte chuan Kusia fapa, Selemia fapa Nethania fapa Jehudia chu Baruka hnenah an tir a, a hnenah, "Mite beng hriata i lo chhiar lehkhabu chu kengin lo kal rawh," ti turin. Tichuan Neria fapa Baruka chu lehkhabu zial kengin an hnenah a lo kal a.

¹⁵Tin, a hnenah, "thu la, kan beng hriat ngeiah chhiar rawh le," an ti a, tichuan Baruka chuan an beng hriatah a chhiar ta a.

¹⁶Tin, heti hi a lo ni a, chung thute chu an hriat chuan hlauin an in en hlawm a, Baruka hnenah chuan, "Heng thu zawng zawng hi lal kan hrilh ngei ngei ang," an ti a.

¹⁷Tin, Baruka chu, " Heng thu zawng zawng hi a ka ata eng tiziaa ziak nge i nih, min hrilh teh khai?" tiin an zawt a.

¹⁸Tin, Baruka chuan, "Heng thu zawng zawngte hi a tawngkain mi hrilh a, lehkhatuiin lehkhabuah chuan ka ziak mai a ni," tiin a chhang a.

¹⁹Tin, hotute chuan Baruka hnenah, "Kal la, Jeremia nen chuan biru rawh u; tuma'n in awmna hre suh se," an ti a.

²⁰Tin, hungchhngah lal hnenah an lut a; lehkhabu zial erawh chu ziaktu Elisama pindanah an dah ta a, a thu zawng zawngte chu tawngkain lal an hrilh a.

²¹Tichuan lal chuan lehkhabu zial la turin Jehudia a tir a, ziaktu Elisama pindan atang chuan a la a. Tin, Jehudia chuan lal leh lal bula ding hotu zawng zawngte beng hriatah a chhiar a.

²²Thla kuana a ni a, lal chu a thlasik inah chuan a thu a, a hmaah chuan meihawl thuka vam a awm a.

²³Tin, heti hi a lo ni a, Jehudia chuan thlep thum emaw, thlep li emaw a chhiar chuan lal chuan a chemtein a zai bung a, thuk meiah chuan a zial bu pum kangral vek turin a theh lut zel a.

²⁴Tin, lal leh a rawngbawltu, he'ng thu zawng zawng ngaithlatu tumahin an hlau lo a, an silhfen an thler hek lo.

²⁵Chu chang ni loin Elnathana leh Delaia leh Gemaria te chuan lehkhabu zial chu hal lo turin lal hnenah an ngen a: mahse a ngai thla duh lo.

²⁶Tin, lal chuan lal fapa Jerahmeela leh Azriela fapa Seraia leh Abdeela fapa Selamia te chu ziaktu Baruka leh zawlnei Jeremia te man turin thu a pe a: mahse LALPA chuan anni chu a thukru a.

²⁷Tin, lehkhabu zial leh Jeremia ka ata Barukan a ziak zawg zawng thute lalin a halral hnuah chuan LALPA thu chu Jeremia hnenah a lo thleng a,

²⁸Lehkhabu zial dang la la, lehkhabu zial hmasaa thu zawng zawng, Juda lal Jehoiakiman a halral takte chu ziak leh vek rawh.

²⁹Tin, Juda lal Jehoiakima chungchang chuan heti hian ti ang che: LALPA chuan heti hian a ti:' Babulon lal a lo kal ngei ang a, he ram hi a tichhiain, heta ta mi leh sa a tiboral vek ang, tia ziakna chu, engah nge chutiang thu i ziak, tiin lehkhabu ziak chu i lo halral ta a:

³⁰chuvangin Juda la Jehoiakima chungthu-ah chuan LALPA chuan heti hian a ti: Davida thutphahah chuan mi thu tur a nei lo ang: a ruang pawh chu chhun nisa ah leh zan vur hnuaiah paih chhuah a ni ang.

³¹Tin, an khawlohna avangin amah leh a thlahte leh a rawngbawltute ka hrema ang: tin, anmahni leh Jerusalema chengte leh Juda mite chungah chuan an chunga ka puan tawh, an ngaihthlak loh thil tha lo zawng zawngte chu ka rawn thlen ang," tiin.Tichuan Jeremia chuan lehkhabu dang a la a, ziaktu Baruka, Neria fapa chu a pe a, ani chuan chutah chuan Jeremia ka ata lehkhabu ziak tawh zawng zawng, Jehoiakima meia a hal ral tak thute chu a ziak a: chumi bakah a anpui thu tam tak a belh bawk a.

³²Tichuan Jeremia chuan lehkhabu dang a la a, ziaktu Baruka, Neria fapa chu a pe a, ani chuan chutah chuan Jeremia ka ata lehkhabu ziak tawh zawng zawng, Jehoiakima meia a hal ral tak thute chu a ziak a: chumi bakah a anpui thu tam tak a belh bawk a.